🌹هن القوارير🌹 (في طور التنزيل )

part122

👑👑 هن القوارير 👑👑
شمس الغريب

الجزء 122:

دخل هو وياها لعندهم وهي شافت فدادا: دادا يالاه نمشيو
أم نوح: فين تمشيو يهديك الله وداك الغدا لمن درناه
عايدة: خالتي خاص دادا ترتاح من الطريق
أم نوح: مالها جات على رجليها دخلي دخلي الله يهديك.. امضرا اا نوح تفكات جرة
نوح حرك راسه: مممم
نقزات هي: تفكات جرة.. وعاودات تزوجات هي gاااع
شاف فيها نوح بنظرة الله يعطينا وجهك: حرام تستري شي حاجة
شافت فيه داداها: حرااااااام اا وليدي

دوزو معاهم داك النهار من ورا الغدا اتاي وهي بقات جالسة معاهم حتى نزل نوح على خاطره هو لي غايوصلهم للدار ودعو أمه لي جلسات تتسنى قدوم زوجها من سفريته لي ما بعيداش من أجل العمل.. على أمل أنها تزورهم وهما يعاودو لها الزيارة فالقريب غير البعيد
فرحتها لمن تعطيها بقدوم داداها غير دخلت هي وياها قالت لك خاصها ترتاح بدات كتجبد هي وياها اش جايبة لها من المغرب وكل واحد اش مصيفط لها حتى وصلات للبواطات ديال نهيلة
دادا: هادو صيفطاتهم ليك نهيلة والله انا بيدي ما عرفت اش فيهم

خداتهم عايدة كتحل البواطة لي شابعة سولوفان حتى طاحت فحب حياتها بريوات الاولين لي كونجلي كانو ديال الحوت ووحدين ديال الدجاج والثالثة كانت ديال اللوز
نزلو دموعها عايدة: باقي عاقلة !!!
دادا: وعلاش مالها لي ما تعقل؟ علاش نتوما دوزتو قليل؟ ياك كان عماد مسكين مقسوم نصين يديك نتي للبريوات وهي للنصوصة هذا كبدة هذا صوصيص
عرفات عايدة بلي داداها ما فراسها والو وكملات ملي جبدات ليها بواطة فيها السفوف
دادا: هذا عماد وصاني نصايبو ليك قالك غاتكوني ضعافيتي.. الساعة بان ليا نوح رااد لك البال أكثر مني

حشمات فالبلاصة: اش كتقولي اا دادا عادي غير حيت وقفت معاه
داداها: ايوة جمعي راسك على هاد الحساب السيد يالاه طلق وعنقني نعنقك فدارهم وتباتي عندهم بلا موجب شرع مالنا ياك اودي لباس.. عاونتيهم كثر خيرك بالحق تخمدي فداركم إلى بغاك راه كيعرف بااك.. سمعتي ولا نعاود
حركات راسها عايدة خاص توجد راسها للدخول والخروج بالشوار
باقي كطلب زهرها يوقف معها وقف وهو كيشوف فيها كيجمع معها الطابلة يعاونها
جلال بشوفة فشكل خلاتها كانت غادي تقوليه ما بغيتش نمشي: ونتي تقدري تباتي بعيد عليا.. ونتي داك نهار جيت للصالون باش ما نشعلش عليك الضوء تبعتيني
ما رضاتش وهزات نيفها للسماء: اااه اه مالك كما انت تقدر تبات وانا بعيدة حتى انا نقدر نبات.. واصلا راه دار بابا هاديك 
جلال شير لراسه: أنا قلت نقد نبات بعيد عليك.. يالاه نوضي بدلي نوصلك نشوفو اخرتها.. بالحق إلى ما قدرتش نصوني عليك تخرجي
حركات ليه راسها معفرة: اييوة إلى انت ما قديتيش أما أنا نقد

ضحكاته بديك عزة النفس ما باغياش تبان زعما بلي راه مشروطة فيه وهي راه باينة من الطيارة قداش مزعوطة فيه ولفين واصلة الزعطة دخلات بدلات وجمعات حوايج قلال فالصاك وخرجات لقاته حتى من الماعن خشاهم فالماكينة يتغسلو جا قرصها على خدها بمضايقة وهي مقلقة زعما وهي راه فالداخل ما كرهاتش طير عليه
من تما للدار وقبل لا يديها مشا لمركز للتسوق تقضى عدة حاجات وكأنه مقضي للدار دياله وعمر ليها هي الحاجات لي كتبغي فهاد الفترة ولي كل مرة كطلبو يجيب لها من برا عاد مشا للدار بيها