🌹هن القوارير🌹 (في طور التنزيل )

part3

👑👑 هن القوارير 👑👑
شمس الغريب

الجزء 3
صبح الصباح كانت موجدة الفطور ليه وشي لعيبات دارتهم ليه فالصاك ديال الخدمة وهي كانت لابسة حوايجها ديال البارح نيت باش يديها لدارهم كما واعدها
عبد الخالق من بعد الباك دار دبلوم ديال الميكانيك ومن بعد تمارة ديال بصح والبريكولات من قنت لقنت سهل عليه الله فواحد الخدمة فالوزين وهو فسن 24 قدر يشري هاد البرطمة ديال السكن الاقتصادي بالكريدي وملي وصل 26 سنة خطبو ليه عائلته ضياء لي كانت عندها 18 سنة ويالاه خدات الباك من بعد ما عطاهم الاوكي ديال الزواج وفالصيف الموالي أي ملي أصبح أعمارهم 27 - 19 سنة تزوجو من بعد ما تسلم الدار دياله وعاونوهم عائلاتهم بفراشها وتجهيزاتها لي تافقو عليهم باش يكون كادويات ديال العرس من بعد الزواج عاد بداو كيتعرفو على بعضياتهم ولحسن حظهم لقاو راسهم كيتشابهو هادءين بجوج بيهم كيبغيو النقا بجوج بيهم اي لقاو نقاط مشتركة بيناتهم وقدرو يدوزو خمس سنين زواج مفاهمين وكيبانو الكوبل الاروع الحاجة الوحيدة لي ناقصاهم هي الوليدات
عبد الخالق من بعد ما هز الأشياء دياله: يالاه اا ضياء بقاي مع داركم اليوم حتى العشية وندوز من وراك حيت غادي نتعطل عندي ساعات إضافية فالخدمة شي ماكينات خاسرين
ضياء: واخا
هادشي لي قدرات تقول مزال حزينة وحتى هو لاحظها عارف بلي مزال مقلقة منه ومن كلامه لي كان جارح خصوصا وأنها مزال متشبتة برايها ممكن يكونو كيولدو غير شي مشكل هرموني وصافي وصلات لدارهم لي ما بعيداش على دار ناسها نفس الحومة ونفس الحي تقريبا كانت فاستقبالها اختها الصغرى لي عندها 18 سنة نفس السن لي تخطبات فيه ضياء
كانت البنت واقفة كتسخن يديها بفعل البرد ديال الصباح وكتسنى فاختها تبان باينة عليها بنت نشيطة وضحوكية غير بانت ليها اختها طلقات ضحيكة خلات سنيناتها البويض المستفين وعيون البندق يلمعو وتقيبات الزين يتحفرو دوخ لي ما يدوخ
حلات على ضياء الباب واستقبلتها بعناق حار: الزين ديالي الضياء لي مضوي عليا على السلامة يا ختي توحشناك
بادلاتها ضياء العناق: رااااحة منين نزل عليك هاد الحنان ؟!!؟
راحة شيرات على عبد الخالق من البعد وهي كتقاد زيفها وهزات ضياء بقرصة على الاحراج لي دارت ليها ودعوه وجرات اختها ودخلو لقلب دارهم لقات باها وامها فايقين كل واحد شاد مصحف فقنت والتسبيح فيديهم لابسين بجوج بيهم ملابس بيضاء الاب بجلابة الحبة سخونة وطربوش دائري فاسي سخون ولحيته الرمادية مزينة بشرته البيضاء وامها مقابلة ليه حتى هي بقميص ابيض بالراندة وزيف ابيض ورامية عليها الكاب مسخن كتافها
استقبلوها بالاحضان موحشين فلذة كبدهم وجلسو يسولوها على الحال
عبد الله (آب ضياء): على سلامتك اا بنتي الله يفرشك ويغطيك بالرضا
كانت جنب الأم ديالها (فاطمة) معنقاها وهي كتشم ريحتها ومبتاسمة للاب ديالها حتى دخلات راحة هازة زلايف ديال الحسوة بالأعشاب ديال الصباح لي توحشاتها فطور دارهم لا يعلى عليه تقادات فالجلسة وكأنها ما كتاكلش فدارها مستقبلة ديك الزلافة وعينيها غير كيدورو لي شافها يقول كتوحم
راحة بعدات عليها البلاطو: غير بشوية عليك اا ختي راه ما درناش بحسابك
فاطمة تبسمات ليهم: نعطي لبنتي زلافتي
ضحكو لبعضياتهم وبدات ضياء كدور فعينيها: ماما فين رحيمة ؟
فاطمة: دبا تهبط راكي عارفة مسكينة ثقلات ما بقيتش نخليها تفيق بكري وعاد راه نجاة كتجي مسكينة ملي تفيق وتصيفط الدراري للمدرسة كيحطها خوك عاد يمشي للخدمة
عبد الله براحة: الله يرضي عليكم كاملين
ما كملاش عشر دقائق بانت رحيمة لي هي زوجة أخ ضياء هابطة مضاربة مع كريشتها بنت زوينة حتى هي فالعشرينات زعرة وعويناتها زرقين تقول ماشي من المغرب لابسة بيجامة واسعة وزيف جاي معها تبسمات ليهم وصبحات عليهم وقصدات باب الدار تفتحو ملي تسمع الدقان وفعلا كانت نجاة زوجة الاخ الثاني وهي العروسة الأولى كانت سمراء بحروف سوداء ترتاح لها من الشوفة الأولى تسالمات مع رحيمة ودخلو بجوج سلمو عليهم وفرحو بضياء
نجاة تعتبر اختهم الكبرى لانها زوجة الابن البكر: والله الى غبرتي علينا حتى توحشناك نيت يا لالة وزيانيتي ما شاء الله
ضياء حشموها وتخشات فحوايجها حتى تكلمات رحيمة: لوكان غير عيطنا اا مي على نعمة ما حدنا مجموعين
وداكشي لي كان عيطو عليها وهي بدورها علمات راجلها لي رحب بالفكرة وخلاها تمشي فالطاكسي بحكم هو خدام ما يقدرش يوصلها نصف ساعة كانت عندهم تعانقو ودخلو للكوزينة مجموعين ضاغي كملو شغالهم وجلسو مجمعات كيبانو كلهم خواتات ما بيناتهم لا حسد ولا ضغينة من بعدما عاودات ليهم ضياء باختصار وبلا تفاصيل المشكل لي قالق راحتها
نجاة: ايوة لواه الطب راه تقدم وانا راه ختي ما ولدات على عشر سنين وها نتي شفتيها كركبات جوج متابعين راه ربي لي خلق الدواء ماشي العباد
نعمة بابتسامة: و هانتي انا وامجيد راه واخا آخر طبيب كان قال بلي امجيد عمرو يدير الولاد واخا هكاك ما فقدش الأمل باقي باغي يمشي للأطباء ومسكين كل مرة يقولي إلى بغيتي طلقي ا بنت الناس باش ديري وليدات راه ما يبقاش فيا الحال ولكن ما نقدرش اا ختي
ضحكات راحة من القلب تقول كيقولو ليها النكات: الحب اا ختي الحب ويلي نتي امجيد إلى قاليك ما غانتغداش فالدار كتبغي طجي
ضحكو البنات على راحة لي اسم على مسمى بالها ديما مرتاح وهي ديما فراحة ما عندها لي يقلق راحتها السيدة ما مسوقاش للدنيا ولي فيها وهي مختلفة كليا على خواتاتها تقولي ماشي بنت سي عبد الله ولالة فاطمة
رحيمة: اييوة يدير الله الخير ها نتي راه نعمة فكرات تربي وليد من الخيرية لي فالطلعة
خرجات ضياء عينيها: شي بيبي صغيور
حركات نعمة راسها بالنفي: لا عنده سبع سنين بغيتو يكون عارف من الاول باش ما نلقاوش مشكل من بعد يعرف بلي حنا ماشي والديه الحقيقيين باش ما يتصدمش ليا من بعد هو محتاج والدين يحنو عليه ويعطيوه الحب وحنا محتاجين وليد نعطيوه الحنان

              💣💣💣💣💣 توقاعتكم وآرائكم 💣💣💣💣💣

ضياء تزادتها دوخة فوق دوخة وتفكير على تفكير
واش حتى هي دير بحال نعمة اختها ؟ واش عبد الخالق يوافق ؟