🌹هن القوارير🌹 (في طور التنزيل )

part55

👑👑 هن القوارير 👑👑
شمس الغريب

الجزء 55:

عرس اسطوري كان فرحات فيه ضياء من قلبها ونسات المشكل لي عندها ضحكات مع العائلة وشطحات والفيديوهات وصلو لصاحب دعوتها من البرgاgة زينة كتصور وتصيفط ليه لي محمقاه فرح وطلع ليه النشاط ملي بانت ليه فرحانة وعقله كيفصل ويخيط لهناء لي علاش رجعات بعد هاد المدة كاملة علاش باغيا تنغص عليه حياته واش هذا هو جزاءه وخيره معها

الرجال غير تعشاو وصلاو وكل واحد صلى على قبلته ومشا فحاله كاين لي دا معاه مراته كاين لي خلاها مع العيالات لي نايضة عندهم بكل ما تحمل الكلمة من معنى كانت بقات لها آخر لبسة تقريبا لا غوب لي ما بغاتهاش واختارت أنها تلبس تكشيطة بيضاء كلها أحجار جات بحال الغوب نيت ولكن تقليدية بالسفيفة وكلشي ولكن جات على شكل كسوة مفخفخة من لتحت وكلها محجرة ولات كتبان ضياء بحال شي جوهرة ثمينة

دخل جلال عندهم كان لابس كوستار اسود وعطاته الزيانة وريدة بيضاء يديرها ف الجيب باش يتماشى هو وياها كان حال فمه ف ضياء بهاد المعنى كل لبسة كانت كتخليه فاهي فيها ولكن هادي لا خلاص خلاته بلا عقل تخيل حتى عيا كيف كانت غاتجيها هاد التكشيطة ولكن ما جاتش فباله بهاد الكمية ديال الجمال فاق من سباته

ضياء: غير خليه ليا مطلوق هكا اصلا راه شعري هاك
الزيانة عجباتها الفكرة اول مرة تخدم لشي بنت شعرها كيرلي وجاو المشيطات فنين ودبا لي بغات تطلق شعرها فهاد اللبسة بغات غير تهزه من على وجهها باش يبان وتخليه مطلوق اكيد غادي تجي فاتنة وهادشي عارفو سي جلال لي بداو فيه الألوان

جلال كيحاول يهدئ راسه: لا اا اختي غير خليه مجموع بديك المشيطة راه جا زوين
ضياء دارت عاقدة حواجبها: ولكن انا بغيت نطلقوو
جلال كيكز على سنانه: ضيااااء هضرت صافي
حيدات المقبط الأساسي لي شاد المشطة وفررر تحل الشعر وبقاو لاسقين غير الفيليلات الزيانة ترعات فمها المشطة راه خدات لها شي ساعة تقريبا أو أكثر وغير حيت شعر ضياء زوين أما نسرين وزينة ضربو بيديهم على وجههم كيقولو فراسهم مشات فيها ضياء مسكينة أما نجاة رحيمة نعمة وراحة تصدمو فضياء

بدا كيرخف فالكرافاط والزيانة ونجاة انسحبت هي والبنات كلهم حتى من الزيانة عيطو عليها باش تخليهم على انفراد لأنه جلال عنده المشكل ف المشطة بالحق ضياء فوقما كتشوفو كتفكر الأمس كله من الحمام حتى للبحر
هو كيقرب لها وهي كتبعد خايفة منه لأبعد الحدود وعارفة بلي غلطات غوتات عليه قدام لي ما كيقدروش يهزو فيه العين نقصات من راجلها عاد الطريقة باش نطرات الفيليل وخلات شعرها بدوك المقابط بحال شي دومة عامرة بالببوش قدام كلشي يعني طبيعي تشوف دوك الشوفات لي دوبوها بالخوف عمرها شافتهم ومتوقعة أي تصرف غادي يدير

لصقات مع الحيط لي من وراها ما بقا لها فين تمشي وهو بقاو ليه خطوات قلال ويوصل لها اصلا غير الطريقة باش كيتمشى كفيلة باش تخلي قلبها يوقف
وصل عندها بيناتهم ميليمترات قلال ويلصق معها هبط وجهه لعندها كتحس بانفاسه كتحرقها فوجهها سخااااان عينيها ضاغي تجمعو فيهم الدموع ما بقا لهم والو وينزلو