🌹هن القوارير🌹 (في طور التنزيل )

part37

👑👑 هن القوارير 👑👑
شمس الغريب

الجزء 37:

فبرطمة كبيرة خارجة ريحة سانيكروا وريحة العود فكل ركن من أركان الدار إلا الكوزينة لي خارجين منها روايح الطياب ولكن ما عاطيش بزاف دليل على أنه ما طايبش تما
فبيتها لي رجعاته انثوي بدوك الألوان ديالها لي طاغيين على اللمسة الرجالية لي فيه واقفة كتمشي وتجي عليهم بواحد الفراشة جاتها زوينة والقفاطن ديال الدار مرميين فوق فوتوي طويل عندها تما وهما كيشوفو فيها بنفس النظرة واش من نيتك

نجاة: دبا جبتينا من صبااااح سيدي ربي باش تورينا اش غا تلبسي
نعمة: الطياب كومونداه راجلك من برا...
قاطعاتها: هو لي بغا
نعمة: الدار جاب لها راجلك عيالات دارو بيها نقاها كيتشم من لتحت
قاطعاتها ثاني: هو لي بغا
حيدات صندالتها ناوية تنوض تزوقها على قلة النفس لي فيها وهي هربات تخبات ورا نجاة لي محامية بيها
نعمة معصبة عليها: واش هاد الراجل فينما يبغي يدير عراضة للعائلة خاصو يخسر مانضة الشهر ولا هبلتي ولا مالك الراجل اييه كيبغي المرأة الزوينة النقية ماشي غير فحالتها حتى فخربتها....
قاطعاتها خايفة وكضحك فنفس الوقت راحة هي راحة: والله والله الى بغيت انا لي نطيب داكشي لاش عيطت عليكم غير باش توقفو معايا وترشدوني ما بغيتش نقولها لضياء حيت حتى هي عيانة ورحيمة مع ولدها ملي قيدت شنو خاصني قال ليا (ترخات) ما تعدبيش راسك راني كومونديت.. ملي نضت الصباح بديت نجفف حيد ليا الكراطة وقال ليا غا يجيو جوج عيالات نتي غير بقاي مرتاحة ليا صافي وحشمت نقولكم بلا ما تجيو وها نتوما ختارو معايا اش نلبس
جراتها نجاة: اااح على الفارة جاب لها الله لي ما يبغيش يمحنها
نعمة ميقات: كيشفتي هي غادي غير تبغي تمحن له راسها هادي راه واحد اللفعة
لبدات عينيها راحة ببراءة وختارو لها ديك الفراشة نيت هي لي واتاتها وداتهم للكوزينة هي وجدات غير الgوتي ل جوج طوابل وحدة رجال والثانية نسا صايبات كيكات ودي ميني طاغت والحلوى شرات بلاطويات ديال اللوز وشي مملحات المهم داكشي هماوي
أما العشاء كومونداه معاذ برا على صالاد كبيرة - بسطيلة الحوت - الشواء

غير اذن العصر استقبلت راحة لالة راضية ونسرين وزينة بفراشتها وابتسامة عريضة على وجهها هما الاولين وصلو جات سايقة بيهم نسرين دخلات هي وياهم فرحانة وهما جايبين ليها دي كادو وخرج عندهم معاذ بقندورة خفيفة جات عليه كتهبل أما نعمة ونجاة مشاو ما بغاوش حشمو مشاو حتى يجيو مع لاخرين غير عذباتهم وعذابها راحة بحال اسمها شوية ها هما دقو حتى هما جاو غير النسا بلا ولادهم من غير هارون لي تربية جابتهم ضياء واخا كلشي عنده البيرمي غير طموبيل باها هي لي كتسوقها

تسالمو وجلسو يتعاودو قلوبهم خالية من شر باينة من وجوههم الخيرة خرج سلم عليهم معاذ ثاني ورجع لبيته يتكى وهما برا قولها وضحك عليها إلى شفتيهم من البعد تقول شي ديفيلي ديال الجلالب جلابة تنسيك فالاخرى ما معيقينش بالماكياج وزوينات بزاف تبارك الرحمان وضياء فايتاهم بحاجة وحدة وماشي حتى فايتاهم غير كثيرة فيها الحياء والصوت الهابط والحياء راه كيزيد المرأة جمال فوق جمال
العيالات جالسات مجمعات وغير تصلات المغرب دخلو الرجال برفقة معاذ لي كان حتى هو فالمسجد وجاو مجموعين صوت الرجال والأطفال فالدروج دخلو وجلسو فالصالون الكبير لي جاي فالداخل من بعد ما ألقوا السلام غير بالفم على العيالات لي جالسين فالدخلة ديال الدار جاو عندهم وليداتهم كيتجاراو جلسو جنبهم
هي خطفات شويفة صغيرة ما بانش ليها عاد رجعات فيها الروح ولات خايفة منه من بعد التهديد لي دار لها عاد شافت عصبيته وندمات علاش اختبرت صبره وكانت خايفة من هاد المجية لا يكون فيها شي لقاء غريب معه ثاني

ناضو العيالات دخلو لواحد البيت مفرش باش يصليو فراحتهم راحة كانت هي ومعاذ
فالكوزينة كيداكرو على اش يسبقو فالحطان وهي واقفة كتراري بهارون لي كيبكي حيت روبو هي ما كتصليش حتى تسمع دقات خفيف 100% هي بوحدها لي غادي تكون سمعاته وخايفة تمشي تحل الباب تجاهلته المرة الأولى والثانية ولكن تعاود الثالثة وحشمات خافت لا يجي شي حد ويلقاها ما حلاتش الباب وهي متأكدة بنسبة ماشي قليلة بلي هو لي فالباب

تقدمات هازة هارون وحلاته وفعلا لقاته هو جابد التيلي يمكن يالاه غا يصوني هز عينيه فيها من لتحت الفوق وعاود هبطها ثاني وطلعها بنفس النظرة المعتادة وتقدم ببطء شديد مقرب لها خلاها كترجف وزاد كمل عليها حط يديه فوق يديها هاز معها هارون وقرب أكثر حتى ولات كتشم غير ريحته المريحة أما هو طبع بوسة على جبين هارون لي تبسم تبسيمة ديال لي بيبي وكيبعد وجهه هراته اللحية الرطبة ديال جلال

جلال لي بعد سكران بريحتها ديال العود الخفيييف مع ريحة هارون ديال لي بيبي حس براسه ترفع مزيج بيناتهم ترسخ له فنغانغه وبقات ديك الريحة كدور فراسه فقط
جلال بنبرة هادئة وتخلي الإنسان يفضح جميع أسراره: اشنو سمية الباغفام لي دايرة
بحال لا دار لها الطلاميس: ****** هي ديال العود
جلال: وعقلي على حتى لي دايرين لهاد الغزال.. وديري فبالك بلي على قبل هاد الريحة خاصنا الأولاد فأسرع وقت

دخل ملي بان ليه الغاشي جاي مخليها شادة الباب محلول وزاد طالق ابتسامة غير هو وراسه " غير نتي لي تخليني حال فمي بحال المسحور " قال هاد الجملة مع راسه ودخل لعند الرجال لوكان ما العيالات لي بانو ليه كيخرجو من البيت لي كاين فواحد الدخيلة كون راه باقي مقنت هو وياها تما
هي لي فاقت على تفركيش هارون فصدرها كيقلب على البزولة تبسمات وغير قربات باش تبوسو طلعات معها ريحته لي لصقات ف هارون سدات الباب وجلسات مطلعة هارون لعندها وكتستنشق أكبر كمية قدات تهزها ريتها من ديك الريحة ما طلقات هارون يرضع عند أمه غير بالكشايف

ناضت لعند راحة باش تعاونها فالحطان حيت غير هو لي كاين بدات كدريسي ليها داكشي ديال دواز اتاي تعلم مع موهبة كبيرة كتبان محترفة واخا ما خداتش دبلوم ولا دارت شي تجربة كبيرة ولكن عندها حب المجال والتعلم ديال خمس سنين فاليوتيوب وعند لي شاف الكبار فمواقع التواصل عاد اللمسة الخاصة
راحة: وااااو هادشي عاد بان انا فالأول حشمت نحطو
ضياء وقفات شادة نصها هازة جلابة من جناب وكتشوف ف المنظر الأخير كانو عاطيين لباب المطبخ بظهرهم ما شافتوش هو لي حاضي كل انش منها وملي شاف معاذ جاي حبسو مسكين حتى روى عطشه عاد حنحن ودار براسه يالاه جاي ومعاذ من وراه كيحرك راسه بلا حول مبتاسم عمرو ما دخل لشي كوزينة ملي قشعها دخلات قال لمعاذ ما غاتحطوش للناس شي كأس ديال اتاي نوض نهز معاك غير بيناتهم وهو راه غرضه بها هي أما هما لهلا يشربو لهم

شاف فراحة: كاين شي اتاي ا مراة ولد خويا
ضياء طلعاتها الحمورية غير بوحدها ومعاذ كيشوف فالدريساج باعجاب: والله اا ختي ضياء إلى تبارك الله عليك راه نتي خاص تقري لي فالصونطر 
فرحات بزاف وهي كتشوف الإعجاب فعينيه والمدح لما قدمته اناملها: بالصح ولكن انا عاد بديت نعرف شحال من حاجة
جا هز الصينية من جنبها متعمد يزيد يخلي ريحته تغلغل معها: إلا الحgرة الإنسان ما ينقصش من نفسه.. انا كتباني ليا فوق المحترفين
خرج وخلاها كتغزل هزات بدورها الصينية ديال العيالات وهي كلها كترعد باش تهرب من ديك البلاصة

          
الله يا جلال الله باغي تسكت للبنت القلب
              💣💣💣💣💣 توقاعتكم وآرائكم 💣💣💣💣💣