🌹هن القوارير🌹 (في طور التنزيل )

part7

👑👑 هن القوارير  👑👑
شمس الغريب

الجزء 7
مرو دوك الأيام غير فالتحضيرات من هادي لهادي وراحة واخدة عطلة ورااحة نيت عطاوها ليها خواتاتها وعيالات خوتها باش ما تتعبش وتبان عليها تمارة فنهارها

العشية تعاشات وفدار عائلة ضياء كيتشمو الذ المأكولات على بعد أمتار وريحة العود منين ومنين كتشم واخا ماشي شي حاجة جديدة عليهم دائما الرائحة الطيبة كتخرج من دارهم والجيران كل حوارهم على النسوبية بين هاد جوج عائلات لي هما من أحسن العائلات فهاد الحي وناس الحومة حالفين ما يدخلو لديورهم حتى يدخلو عائلة معاذ لدار راحة ويشوفو اش جابو ليها

ما خلاوهمش يتسناو بزاف حتى بانو جوج سيارات وحدة بي ام فالاسود والثانية ديال الأخ دياله ميرسدس وقفو ونزلو واحد ينسيك فالثاني من رجال ونساء من لباسهم يبان البرهان عائلة ميسورة وملي نزلو الكاضويات لي جايبين معاهم ماركات معروفة مدات راضية لولدها البوكي ديال الورد وهي فرحانة غادي طير بالفرحة وخوه مدات ليه واحد بنفس الحجم ديال البوكي غير هاد المرة هاد الآخر كان ديال الشوكولا مزين بيه بطريقة زوينة والثالث فيه التمر معمر تقول خطبة كبيرة وهما عاد جايين يطلبو يديها ويتفاهمو مع عائلتها خلاو الناس حالين فامهم ما بقاو بغاو يسدوه

استقبلوهم فالباب بالعطر كيخرج من المراش ومن فامهم لي فيه غير الكلمة الطيبة رحبو بيهم ودخلوهم ل صالونات مفرقين الرجال فقنت والنسا فقنت آخر دخلات راضية هي وعروستها الأولى وبنتها الوحيدة والضحكة واصلة فين وفين ليهم باينة فرحتهم لقاو فاستقبالهم نعمة وضياء مع نجاة ورحيمة حتى هما فابهى الحلل ومستقبلينهم بنفس الفرح والسرور

والرجال كذلك فالصالون الكبير مجموعين ولاد سي عبد الله بجوج ونسابه بجوج مستقبلين سي محمد وولاده بثلاثة الكبير لي مزوج ومعاذ مولاي السلطان وابنه الصغير لي فرحان أكثر من العريس حيت قربات نوبته حتى هو مسكين كيحلم

راضية تبسمات لرحيمة: ايوة قربتي يا بنتي الله يفكك على خير
الكل ردد امين وبقاو كيهضرو على الولادة والنفاس من موضوع لآخر عاد تفكرو العروسة لي مشوجرة فالبيت قنطات شوية وتخرج لراسها هي وتهنى كتسمع الضحك والتقهقيه وهي فالبيت كيف المنفية
راضية: ايوة فين لالة راحة الغزالة
فاطمة: نوضي اا ضياء عيطي عليها اا بنتي الله يرضي عليك
يالاه خرجات من الصالة تسمع الدقان فباب

كانت غادية في أمان الله تعيط لاختها حتى تسمع الدقان فالباب ناض حكم يفتح حتى بانت ليه قاليها تشوف معها شكون ما سخاش بالجماعة ما عطاتش للأمر أهمية ومشات تحل الباب نسات راسها بلي راه خطبة اختها وهي واخدة زينتها يعني كانت مقادة وجهها ولابسة للمناسبة محلقة على الحالة

كيف حلات الباب كان الشخص حاني راسه هز راسه وعاود هبطه وعاود هزه بسرعة كانت بحال شي لوحة فنية تحفة قدامه لعن الشيطان وقال مع راسه بلي هاز عينيه فالعروسة لأنها بانت ليه مقادة ولابسة لون قريب للابيض واصلا هي وراحة بصح كيتشابهو فالملامح
فيقاته ملي تكلمات وخرج صوتها كيف شي موسيقى تطرب الاذنين: نعام اا سيدي
ما بقاش هز فيها عينيه: الله يخليك عيطي ليا على معاذ ولا رضا ولا حمزة ولا شي حد فخوتك إلى جات على خاطرك
استغربت وخافت مشات كتسرع بخطواتها مخلياه كيشوف فاي حاجة إلا هي وهز يديه نفس عليه صدايف الشوميز حاس براسه تخنق وعنقه ولا أحمر وتشنجو عروقه حوايجو لصقو عليه

كان رجل فالثلاثينات تقريبا 30 حتى 32 سنة لابس شوميز بيضاء مع سروال توب رمادي فاصلاهم صمطة فالاسود اللامع مع حذاء فنفس اللون خلى لي ف الدرب كاملات لا العزبات لا المخطوبات المزوجات المطلقات حتى الهجالات والشرفات خرجو كيشوفو والشوف ما يبرد الجوف
حتى وقف عليه حكم ورضا أخ معاذ الكبير لي غير شافو ضحك حتى تحفرو غمازاته

رضا: العميم اش هاد التعطيلة
سلم عليه وعلى حكم بابتسامة: والله الى درت ما ف جهدي باش نوصل فالوقت ولكن الرجا فالله هادي هي الخدمة
رضا: واا قول شرفتي
شاف ف حكم: هما اا خويا لي كيطيرو ما كيحتارموش قانون السير انا عمهم أكبر منهم يتسناوني حتى نتزوج اا صاحبي تقول غايتقاضاو بنات الناس
دخلو مقشبين مع بعضياتهم كان الشخص عم العريس الأصغر أما ضياء مشات عيطات على اختها وتسناوهم فالكولوار حتى دازو عاد دخلات

دازت الخطبة عالي العال عائلة العريس مشاو غادي يطيرو بالفرحة وعائلة العروسة ماشي قل منهم كلشي هو هداك ولله الحمد وبقاو غير المداولات بين العائلتين كل عائلة كتقول اش بان ليها والحمد لله العيب ما كاينش

                                     ** عائلة راحة **

بقاو غير هما وولادهم وبناتهم لا امجيد ولا عبد الخالق بجوج بهم مشاو لديورهم
عبد الله: ونعم الشاب ونعم العائلة الحمد لله
فاطمة: لالة راضية هي هي سبحان الله القلب الصافي والكلمة الطيبة
شرف: حتى معاذ شاب مزيان وعنده غير نيشان نيشان
رحيمة: وشكون لي كان جا سول عليكم قالت لينا ضياء خوفها كيفاش كيسول
حكم ضحك: هداك عم العريس جلال الله يعمر ليه الدار راه رباه خوه سي محمد
شرف: كان عنده شي شغل داكشي باش تعطل كيعتابروه خوهم ماشي عمهم ما بيناتهمش بزاف ورباه خوه حيت توفاو والديهم وهو صغير ولدوه على الكبر يمكن
نعمة شافت فضياء: خلعتينا على والو احااي
ضياء: وا راه حيت ما شفتوهش كيفاش كيسول
راحة: كون راه غير بغا يخوفك بالضحك اا صاحبتي مالكي
حكم غمز خوتو: ها هي بدات كدافع على عائلة راجلها
شرف: راه قلت ليكم تبيعنا فنهارها
قلبوها ضحك ونشاط حتى ناضو والديهم ينعسو وهما حرام بقاو حتى قرب يطلع النهار توحشو لمتهم وضحكهم وجماعتهم

                                    ** عائلة معاذ **

حتى هما تجمعو فدارهم من بعد ما بدلو حوايجهم وجلسو فرحانين
نسرين زوجة رضا: فلتي اا خويا معاذ تشوف راحة اليوم تبارك الله كيف الوريدة
زينة أخت معاذ: يا ختي تبارك الله ما شاء الله لا راحة ولا خواتاتها كيف إلى خارجين من شي مجلة أما رحيمة تقولي شي سويدية سلمات ونجاة بحال شي برازيلية
حمزة: ما بقاتش عندهم شي وحدة واخا تكون غير من البرتغال هاا العار
طلقوها بضحكة وجاوباته نسرين: والو مول المليح باع وراح بقا غير الموزامبيق اا حمزة مشيتي فيها
راضية: الله يتمم لي بقا على خير انا فرحانة بالنسبة مع عائلة لالة فاطمة ونعم الناس والتربية تبارك الله
زينة شافت فنسرين: مشيتي فالمزاح
ضحك محمد وجر زينة من قرفادتها: اجي اا شعالة العوافي علاش نسرين رخيصة عندنا
راضية عنقات نسرين لي دايرة فيها غضبانة وهي حابسة الضحكة: نسرين نهار قال ليا رضا بلي هي لي بغا من الزنقة 6 حتى 21 وانا نزغرت ما وقفت حتى لقدام دارهم نعنق عائشة ونعاود بلي ولدي ختار بنتها والحمد لله
حمزة نقز: باينة اا الواليدة يا انا يا جلال غادي نجيبو ليك شي كوفرات من الصونطر غاتمشي تنيري من الزنقة واحد حتى لما لا