🌹هن القوارير🌹 (في طور التنزيل )

part73

👑👑 هن القوارير 👑👑
شمس الغريب

الجزء 73:

نيكول تعلات هي وطالونها باش وصلات لفمه باستو: نووووه حبيبي مزيان ملي رجعتي ضغيا لقيتيني صافي حليت المشكل
دار شاف فيها ودور يده على خصرها داخل هو وياها ثاني فعلا كان نوح لي مدة هادي ما شافتو سنين ولكن مستحيل تنسى آخر حوار بيناتهم

🔙🔙 فلاش باك 🔙🔙

كانت هي باقي صغيرة وحتى نوح لأنه هو ماشي فعمر جلال وعماد هو كان اصغرهم وحتى هو من عائلة ميسورة مستقرين فكندا وتعرف على جلال وعماد فواحد العشاء عملي لإحدى الشركات وتما تلاقاو وبقات صداقتهم خصوصا مع عماد وقرر هو وياه انهم يقلبوها شراكة فاحد المشاريع ويكون عربي وفعلا نجحو فيه مزيان ولكن اضطر انه يبيع نصفه لعماد وعمرو باقي يرجع للمغرب بسببها خلا علاقته مع عماد وجلال غير فالتيلي والى هما مشاو لشي بلاصة وكان هو فيها فقط

ملي مشا مع عماد إحدى المرات عارضه للدار وتعرف على عائلته تما عجباته عايدة حس بقلبه مال ليها بالحق من ديما كان كيلاحظ ميولها لجلال وكيلاحظ ثاني بلي جلال كيعاملها معاملة الاخت لا اقل ولا أكثر وملي عيقات نفاها جلال نهائيا وتبرى منها وباش زعما تنتاقم من الكل حيت دعمو جلال وقالو لها بلي نتي مزال صغيرة وجلال بعديه راه ما باغيكش قررت أنها تنتاقم بعقلها الصغير فداك الوقت ومشات مع شي صحاباتها لشي بواط لي ممنوع عليها وقررت أنها هي تكحلها أكثر وتشرب هي gاع

طبعا نوح كان دائما كيبغيها رغم هادشي وفداك اليوم بالضبط قرر يراقبها حيت حلفات حتى دير شي كارثة وفعلا ملي بانت ليه دخلات للبواط جنون طلعو ليه لراسه هما لي رجال وما كيمشيوش لبحال دوك البلايص وملي دخل تابعها بانت ليه ناوية على خلاها وملاها جرجرها من وسط صحاباتها وخرجها برا كتغوت وتنتر ليه

عايدة كتغوت وتجدب: طلق مني علاش تابعني اش بيني وبينك فينما ضرت نلقاك؟
نوح معصب أكثر منها رغم أنه هو من طبعه انسان هادئ ورزين: حيت نتي عمية كتشوفي غير جلال وما كيهمك حتى شي حد حتى من راسك ما سلمش من العمى ديالك
ما رضاتش كانت كتكره تسمع هاد الحقيقة: ااااه بصحتي ااه كنبغيه وغادي نبقا كنبغيه حتى يبغيني حتى هو
نوح بحال إلى خرجات فيه بالقرطاس: عمرو غادي يبغيك الحب ماشي بزز
خرجات عينيها بحال شي قطة: ياااااك عاارفها اييوة قولها لراسك ماشي بزز مني خاص نبغيك فهمهاااا حتى انت عاد اجي قولها ليا
نوح: كنقولها ليك حيت نتي ماشي كتبغيه نتي باغيا تملكيه بحال أي حاجة كتبغيها وكيجيبها ليك باباك ولا عماد.. نتي غير مهووسة وحاسبة بهذا تحدي بينك وبين نفسك وطال الزمان ولا قصار غادي تراجعي

ضحكات باستهزاء: اهااااه انت كتقول هادشي غير باش تبرد على راسك.. حيت ما كن-ب-غي-كش.. بقيتي فيا.. إلى كانت فيك شوية ديال النفس بعدني وغبر من حياتي
كفراته حيت ماشي اول مرة تصرف بهاد التبرهيش: ممم واخا اا عايدة.. غادي نمشي من حياتك ومن المغرب.. بالحق (هز صبعه فوجهها وأول مرة تخاف من نوح) كنصحك نتي ما تبانيش قدااامي حتى بالغلط ما غاديش نرحمك اا عايدة