🌹هن القوارير🌹 (في طور التنزيل )

part94

👑👑 هن القوارير 👑👑
شمس الغريب

الجزء 94:

الأضواء كلها مطفية كاين ضوء الشموع فقط من الدخلة ديال الباب شميعات برائحة طيبة عطرة كتبقى متبعهم حتى الطابلة لي فيها اطباق خفيفة ظريفة كتشبع منها العين والعقل قبل الكرش وحداها طاغط شهية بالشوكولا والفريز وفجنب الطابلة كاين جلسة فالارض بالمخاد بمختلف الألوان والاحجام حداهم باقات ديال الورود البلدي ريحته طاغية وحداهم علب حتى هما بأحجام وأشكال مختلفة ها القلب ها المكعب ها الدائرة ها الأسطوانة وكل علبة معها وردة وكلمة بخط اليد ومقابل للجلسة تلفزيون كبير

وأخيرا خرج هو من البيت لابس ملابس انيقة ولكن ماشي كوستار والبابيون وداكشي لا لا كان لابس ملابس شبابية ما واتات حتى شي حد غير هو وقف أمام المرآة دقائق وقلب الساعة ديالو هذا هو الوقت لي خاص توصل فيه وفعلا شوية تدق الباب حل لقا قدامه نفس المحققة قابطة فيد نهيلة لي كانت لابسة كسيوة زوينة ومكياج خفيف تجمعو عليها المحققات دارو فيها حالة وخرجوها غزالة لكن ما كانت شايفة والو عيونها مغطيين بشال هو لي عطاه ليهم وكياكد على داك الشال بالضبط هو لي يتغطاو بيه عينيها

المحققة: نهيلة ياكما خايفة؟
نهيلة ضحكات بتوثر: مستحيل نخاف وانا جاية عند عماد * منقذي *
طبعا هي ما كانتش عارفة بلي راه واقف كيسمع وحتى المحققة ما كانتش متوقعة هاد الرد لي فوقته تماما.. مد يديه عماد وخدا نهيلة عنده والمحققة ودعاتهم.. جرها بشوية حط يده على منتصف ظهرها ومدخلها بشوية وقفها فبداية طريق الشموع والورود وجا من وراها حل ليها داك الشال وتحلو عينيها على مشهد رومانسي عمرها حلمات تكون بطلته دارت شافت فعماد لي هايم فيها وشدات فيديه باش تدخل هي وياه خطوة بخطوة كتشوف هنا وهنا بفرحة طفلة مراهقة وسيدة ناضجة وقفات عند الطابلة شبعات منها النظر وتلاحت فوق المخاد بكل طفولية وملي بانو ليها الهداية خرجات عينيها ويالاه غادي تمد يديها منعها عماد ووقفها جرها للطلبة

عماد: نتعشااو هو الاول وديك الساعة فتحيهم وحنا كنتفرجو
حركات ليه راسها جر لها الكرسي ويالاه بغات تجلس عاود ضارت عنده حاطة يديها على فمها ودموع عمرو عينيها قربات وحطات يديها على صدره كتحسس التيشورت
نهيلة: هاد اللبسة هي لي كنتي لابس نهار قلتي ليا كنبغيك وباغي نكمل حياتي غير معاك (شهقات) أنا عاااقلة
عماد ضحك: كون ما عقلتي كون سلخت يماك.. بالحق ديك المرة قلتها ناشفة.. هاد المرة باغي نقولها للبنت لي ما كاينش منها جوج فالدنيا وبالطريقة لي فمقامها
جرات ليه الشال لي كان على عينيها: هاد الشال ديالي شراه ليا بابا آخر حاجة وكان توضر ليا
عماد: عمرو توضر هاد الشال تشفر.. وانا لي شفرتو ولحسن الحظ أنني شفرته فاليوم لي عتقتك فيه من دوك البراهش فجردة كنتي تالفة.. وأحسن حاجة درت كان هو ونيسي فغيبتك وهو لي مصبرني على فراقك