🌹هن القوارير🌹 (في طور التنزيل )

part125

👑👑 هن القوارير 👑👑
شمس الغريب

الجزء 125:

" دوام الحال من المحال " مثل شعبي مغربي.. مفهومه كيقول سواء كنا فحالة مزيانة وبخير راه ما غاديش تدوم وتكون سعادة أبدية.. وإلى كنتي فحالة حزن وحالة خايبة راه دوامها حتى هو من المحال .. الحالة كتغير فيوم واحد تقدر تفرح تحزن تبكي تخاف... مجموعة من الأحاسيس غير فيوم فما بالك فحياتك طول ما انت عايش
هكا كان حال زهور ضاغي توسطت السيمانة وجات أمها واخوها الكبير الشقيق وهضرات معهم فاطمة وعاودات لهم كلشي على عتيق إلا شيء واحد انه شاف كبير ومعروف وغني هادشي خلاتو مستور لسبب ما اكتفت أنها تقول أنه السيد على خير وعايش خارج الوطن وبس.. عائلتها قبلو طبعا اصلا هما كانو باغيين يزوجوها بأي طريقة وينقص عليهم فم كياكل الزرع

كيف داز النص فالسيمانة داز حتى النصف الثاني وزهور محتاجزينها بنات خوتها الكبار البعض منهم الفوق ضياء وراحة وبنت خالتهم وخالهم هادو لي كيفهمو فالماكياج من غير ضياء لي غير شوية وصافي.. أما لتحت راه كيوجدو فاش يسبقو واش يتليو من مأكولات ومشروبات كلشي واقف على قدم وساق علاش لا وهذي خطبة الخالة الصغرى لي كتفهمهم كلهم وكتبغيهم كلهم ووقفات فأفراحهم كلهم هادشي قليل فحقها
أمها فاطنة: اا فاااطمة واا حنا يالاه غادي نتعرفو على السيد ودايرين البنات هادشي كله؟
فاطمة: خالتي فاطنة.. غير من الهضرة عليه قلتي من خير العرسان.. ما تنسايش نتي لمن كنتي باغيا تعطي البنت لشمكار الدوار
فاطنة حطات يد على يد وزممات فمها: واا وا انا غير ما بغيتش نبقا نشوف عيالات الولاد يحرشو عليها فخوتها
فاطمة: وا هذا خير من كلشي ليها
فاطنة: وشكون يجي يخطب معاه ونتي قلتي والديه توفاو
فاطمة: راضية نسيبة راحة ومرات خو جلال راجل ضياء.. هما لي غادي يجيو معه وراك كتعرفيها وتعرفيها مزيان

ضربات يد مع يد بفقصة عمرها تنسى كية راضية كانت شافت زهور عند فاطمة فريعان شبابها وتمناتها لخوها لي كان يالاه تخرج مهندس خارج البلد وطلباتها من فاطمة لي طارت بالفرحة ديك العائلة مزيانين وفرحات انهم طلبو زهور ولكن ملي مشات قالتها ل فاطنة وخوتها وقفو عصبة وما بغاوش حقا ما يقدوش هما على دوك الناس هما غير دراوش ووققو فرزق زهور لله في سبيل الله .. ومن بعد ندمات فاطنة أشد الندم على مستقبل بنتها لي ضيعات
فاطنة: وعلاش ديك الكية تبرا اا فاطمة
فاطمة: داويها بهادي.. والزواج غير أرزاق  
كما جرت العادة عتيق دار تكبيرة لزهور لدرجة خوها وامها وحتى اختها الكبيرة الشقيقة لي التحقت ما قدروش يغمضو عينيهم من جمال هادشي لي كيشوفو ما خلى ما جاب وكأنه دفوع ماشي خطبة ضياء وراحة غير قربو يجيبو الخطبة جات من وراهم نسرين جاو معاهم من دار راضية محيحين والزغاريد ناضت فدار راضية والباهية كملوها فدار فاطمة والجيران هاد المرة ما عرفو اش كاين كلهم مشا بالهم مع السابع ديال ضياء لي مزال ما وصلش لأنه اش باقي غادي يجمع العائلتين.. شوية مشا بالهم لحمزة ولد راضية لا يكون بغا شي وحدة من عائلة فاطمة ولكن ملي شافو عتيق هو لي هاز الورد ما بقاو فهمو والو وزهور ما طاحت على بال حتى واحد بالنسبة لهم صافي مات لها الحوت وكملات فالدنيا