🌹هن القوارير🌹 (في طور التنزيل )

part40

👑👑 هن القوارير 👑👑
شمس الغريب

الجزء 40:

صباح الاثنين فاقت معطلة على غير العادة جاب الله كتوجد حوايجها من الليل قبل لا تنعس لبساتهم وهبطات كتجري لحسن حظها الاب ديالها خلى السوارت لها فوق الحيط استغرب منها حكم لي عاد هابطة هاد الوقت راه كتكون شادة الطريق
حكم شاف فرحيمة: مالها؟
رحيمة: ما ارتاحتش هاد الويكاند من العراضة لعراضة
حكم ضحك: وااا سعداتها يا ربي شي تمارة بحال هاد الشكل

أما ضياء ركبات فالطموبيل وغادية بلا عقل باغيا توصل فالوقت ويقول المثل لي زرب تعطل وهي لي طرات لها كان الصطوب ما رداتش ليه البال الطموبيل لي قدامها فرانات وهي عطاتها من اللور مشات وجات بلاصتها جاب الله ماشي شي سرعة باش كانت غادية بقات دقائق مصدومة حتى بانت لها السيدة لي سايقة هبطات كدور على الطموبيل ديالها عاد فاقت ووعات على راسها هبطات حتى هي كتجري تشوف طموبيلة باها لي عاطيها لها وما كايحاسبهاش

البنت معصبة: واااش مااا كتشوووفيش الصطووب قداااش.. كلشي شد البيرمي فهاد البلاد.. راااه اا اختي معاك كندوي راه أنا لي طموبيلتي تبغجات أما نتي هاد التراكتور عندك ما وقع لها والو تبارك الله غير ضربة خفيفة
ضياء عاد فاقت: شوفي اا ختي سمحي ليا كنت باغيا...
قاطعاتها: مامسالياش انا لاعذارك البايخة بسبابك ضاعت لي شحال من حاجة
ضياء هي اصلا معصبة وزادت عليها: اعتذرت منك وزايدون كما تضربات الطموبيل ديالك حتى انا راه ما سلمتش واعترفت بلي لافوت ديالي اش مزال باغيا
البنت طلعات حاجب وهبطات الثاني: أنا غادي نوريك اش كيوقع ل اللي كيغوت عليا

صونات على شي حد ومنعات ضياء تماما باش تمشي شي ربع ساعة وصلو البوليس وقفو كيعانيو لاكسيدون مع كانو فطريق خاوية شوية غير هما ومرة مرة كدوز شي طموبيل تشوف فيهم شوية وتزيد
البوليسي: وي انسة رميلي
البنت: وي شكرا لحقاش جيتو الوغ قولهم يديرو خدمتهم
وقفات ضياء معصبة كانت جالسة على الكابو: ااا الشريف حبس حبس.. هاد السيدة راه ما خلات فيا غير لي نسات اعتذرت.. عطلاتني على قرايتي عايراتني
البوليسي باحتقار: ايييوة ولي تشوفي قدامك باش ما تعرضيش لهادشي
حسات الحgرة وجاتها البكية ولكن خرجات منها ضياء لي قالت واكواك اا الصبر: ااا سيدي ما غادي تقيد والو انا فبلاد الحق والقانون ماشي بلاد هذا صاحبي هذا كنعرفو عيطات عليك جيتي كتقلب على التهمة لي تلصق ليا نيشان
البوليسي: عرفي راسك اش كتقولي
بتحدي: عااااارفة
خرجو فيها عينيهم اش هاد الجرأة اش هاد الثقة ديك الساعة هزوهم للكوميسارية نيشان البنت تعصبات كانت ناوية تفاريها غير تما أما ضياء عاد رجعات عليها برودية اش دارت وحسات بالخوف وكتصبر راسها
وصلوهم للكوميسارية ودخلو عند واحد البوليسي آخر تما شي كيشوف فشي وهو كيشوف فيهم موووودة
البوليسي: ايييه ااا الشرفة.. شكون لي قالت بلي كنتعاملو بالوجهيات وباك صاحبي وهاد العجب
البنت: هي ااا الشااف
ميل راسه لجهتها: مااا شفت والو هاد الساعة اا انسة (قلب عينيه لضياء) اييه اا بنتي فاش خصرنا لك الخاطر
عاودات ليه ضياء كلشي وهي كترعد كتمنى غير تفك بخير وعلى خير ما باغية مشاكل وما باغياش تشطن عائلتها
البوليسي: ااراااو لي كااارط ااراااو.. على الصباح حمام العيالات.. الحووسين شي وحدة قاصحة بلا سكر
شد لي كارط كيشوف كل وحدة على حدى حتى نطق: اش كيجيك الرميلي مصطفى
البنت باعتزاز: عمي
البوليسي: هممم حول لالة ضياء كعات لينا(البنت تزيرات وهو مكمل).. ايوة نتي اا جابر اش كتجيك راحة جابر ولا غير تشابه ف الألقاب
هبطات راسها وكأنها فهمات اش وصلو لها راه باينة دارو عليها البحث فاش بغا يتقدم لها: اختي
ضحك البوليسي: وااا حتى نتي ديك الساعة ديري شغل باك صاحبي ولا راجل اختك صاحبي مالك عقدتي المسألة.. اووووك

هبط راسه تلاقاو معاه ناشط هاد النهار أما كون هبطهم يتغرباو بجوج ولكن دار بلان آخر صونا على عم البنت وعلى معاذ كل واحد بوحدو وقالهم اش كاين ديك الساعة قالو ليه ها حنا جايين
البوليسي: والله الى نتوما إلى ما عندكم ما يدار.. بالحق غاتصدمو غير بلاتي.. قصوحية الراس خلات وحدة مغيبة قرايتها والثانية اجتماع مهم فالخدمة.. على خبيشات صغااااار فالطموبيلات
وصلات قهوته تنغم بواحد جغيمات وشاف فيهم: ااش تشربو؟

دارت البنت رجل على رجل باعتزاز قهيوة عفاك ما شربتش قهوتي داكشي باش
شاف فضياء لي ما تصرطاتش ليها هاد البنت: ونتي اا انسة
حركات راسها بالنفي: ما بغيت والو بغيت غير نشرب
اش غا تبغي وهي تحشمات مع راجل اختها اش غادي يقول عليها دبا طلقات وتبرهشات بدات كتفكر فكلام ريحانة شوية مشات لجلال كل ما كتفكر ديك اللقطة كتبغي تموت وكتقارن كلامه فالتيلي مع البنت لي شافت زوينة بزاف وعاطية للعين حسات بالصهدة طلعات معها عاد ملي تحل الباب ودخل معاذ مع شخص آخر

               💣💣💣💣💣 توقاعتكم وآرائكم 💣💣💣💣💣  

اااش هذاا اممممم