🌹هن القوارير🌹 (في طور التنزيل )

part66

👑👑 هن القوارير 👑👑
شمس الغريب

الجزء 66:

هبطات لعنده ضياء من بعدما عيات معاه باش يطلع نهيلة وهو رافض تماما هبطات مانطات غلاض غطاتها وعطاتها دواء ديال السخانة وجلسات كدير ليها الفوطات على راسها لي طايب حتى حساتها نعسات والدواء خدام فيها عاد جات عنده

نهيلة مسكينة ملي جاها خبار محمود طاح وسمع الحقيقة كاملة ولي هي كانت عارفة غير جزء منها على لسان هناء تما بحال الى ضرباتها الفيقة واسترجعت روحها النقية لي الكل داير يد فيد متافقين باش يوسخوها ليها ومع الأسف انصاعت ليهم ولكن فور تلقيها الخبر استفاقت فديك اللحظة حسات براسها ماشي هي هاديك وملي سمعات كلام محمود وملي عاودات ليه على قصتها وعاشتها من جديد كلشي هادشي خربقها وحسات بالداخل ديالها شاعلة فيه العافية والمرضة بدأتها وهي ما حاساش

جلال جرها عنده كيحاول يتكالما: قولي ليا شنو وقع
ضياء ذبلات فيه عويناتها: راااك شفتي لي وقع
جلال حرك راسه غير مقتنع: عاودي ليا ملي مشيت وخليتك دخلتي للدار اشنو وقع
ضياء عاودات ليه اشنو بقات كدير وشنو قيدات القربالة نايضة عندها وهي مزال كتاكد على العراضة حتى وصلات لوقفتها مع السيدة على الفرارج وتسمع الصوت لوصول هناء وللهضرة لي ضارت بيناتهم حتى لهنا كلنا حضرنا

ضياء: يمكن هضرتي ما عجباتهاش.. ولا هي ما توقعاتش انك تكون عاودتي ليا.. هزات يديها باغيا تضربني وطلقات واحد الغوتة بحال المجنونة.. ديك الساعة المعطي العساس لي كان غير وراها شد ليها يديها لي مهزوزة فالسماء.. والعربي مسكين لي كيقابل جردة جمع ليها اليد الأخرى.. ودوك الدراري لي كيخدمو فالكوارا جابو الحبل وكتفوها ومشا المعطي كيصوني عليك

مع كملات كلامها يالاه جات تغوت بسبب القرصة لي جاتها فمسعودة لقات فمها مسروط غوتات ففمه قرصة وبوسة دقة وحدة باش ما تكونش فيها الشوهة

جلال بتانيب: ضغيا حفظتي سميااااتهم همممم؟
خرجات عينيها وطلعاتها التزنيgة هادي ثاني بنة أخرى: مممم دبا ما فهمتيش دبا
خنزر فيها حتى دخلات فبعضياتها: كتعلمي تجمعي الحروف ليا هنا ولا اش.. فهميني اا لالة ها أنا كنسمع
ضياء كتشرح وتشابك صباعها: دبا هما عاونوني مساكن.. وكيبقاو يتعاملو معايا ديك المعاملة ديال (غير كتفتف جمعاتها خوف وحشمة وكلشي)
نهض فيها بلعاني باغيها غير تكمل الهضرة: معاااملة ااش ؟
ضياء قالتها دقة وحدة: مراات مول الشي (هبطات عينيها لصباعها) وانا ما بغيتش فهمتي.. يعني نكونو بحال العائلة هنا وصافي وتعرفت عليهم.. با محماد لي عرفني عليهم وصافي

متبعها بنفس النظرة المغوبشة وتحت منها كاينة نظرة عاشق ولهان تفحصية فيها جرها وتخشى هو هاد المرة فيها هبط ليها السنسلة لي فالبيجامة بشوية وخشا راسه فصدرها كيلعب فيه بوجهه بلا ما يحرك حتى حاجة مخلي غير لحيته الرطبة منوضة فيها العافية وعاملة فيها العمايل