🌹هن القوارير🌹 (في طور التنزيل )

part69

👑👑 هن القوارير 👑👑
شمس الغريب

الجزء 69:

وصلات للمكان لي نعت ليها كان حي ماشي غير شعبي فاتها لديك جيه قصدات واحد البعلوكة شعرها طالع للسما كتلعب هي وصاحبتها قربات منهم وقصدات هاديك بالضبط من عينيها باينة قافزة ومحتاجة أكثر من الأخرى لمعو عينيها ماشي بقات فيها إنما لقات فريستها هبطات لمستواها

هناء: السلام اا حبيبة (جبدات خمسين درهم وراتها ليها) إلى عطيتك هادي توريني دار فطوش قرقاش
البنت الأخرى غير سمعات السمية هربات أما الأخرى مسكينة بقاو عينيها كيلمعو ملي بانت ليها 50 درهم أما حتى هي خوفانة
هزات راسها فيها وتفكرات باها لي مرض ما بقاش يخدم وامها لي كتخرج تخدم فالديور مكلفة بيهم وباها تقاضا ليه الدواء قررات تغامر براسها
البنت: إلى عطيتيني 2 من هادي نوريها ليك غير من البعد ما نقدرش نقرب
ضحكات هناء بشر وجبدات ليها 100 درهم مداتها ليها وبقات البنت عينيها معلقة مع ديك 50 الأخرى مسكينة زادتها ليها
وصاطت بعصبية: كيعلموكم السعاية من الصغر.. يالاه زيدي وريني

البنت مسكينة فهماتها مزيان وما تسوقاتش من بعدما خدات الفلوس زادت بيها وسط الدروبة حتى وصلو لواحد الدرب الضوء ما فيهش كتقربي منه كتحسي براسك باغيا تهربي من المكان كان آخر درب تما فيه ثلاثة ديال الديور كبار باينة كلهم رياض وحدة فالراس ووحدة على اليمين والأخرى الشمال شادين الزنقة كاملة وشي بلايص رايبين بقا غير ترابهم المهم كتخلع ديك البلاصة

البنت كلها كتغزل لا إراديا: الدار هي ديك لي فالراس
حدها قالت هادشي وجرات مسكينة شعرها كيزيد يطلع ويديها على السروال كيطيح وتهزو ومزيرة معاه الفلوس لي خدات هما لي كيحفزوها تزيد تهرب باغيا تبعد بقات متبعاها هناء حتى غبرات وصرطات ريقها بقات هي فراس الزنقة وباب الدار فالراس الآخر حسات بخوف رهيب شوية شهقات ملي بان ليها الباب تحل راسو وماشي غير ديال ديك الدار حتى دوك جوج آخرين لي ما مصلوحينش فكرات أنها ترجع بحالها حيت فعلا خافت

قفزاتها واحد المرأة دايزة من تما: ماالك اا بنيتي تالفة.. بغيتي لالة فطوش ولا.. زيدي زيدي ندخلك كلنا خفنا نهار الأول بالحق غير تقضا الغرض ولينا عادي

شجعاتها وزادت هي وياها ملي معها ديك المرأة نقص خوفها غير وصلو حدا الباب قالت ليها يالاه دخلي انا نمشي دخلات وديك الدورة لي جات دور تسد الباب تصدمات صدمة
بقات كتسنى فيها امها تهضر وهي تلونات: هضري ا بنيتي قولي لي كاين
ضياء: ماما انا خايفة لا يكونو التحاليل لي درت ديك المرة غالطين وانا ما كنولدش
فاطمة جراتها لحضنها: الله يا بنيتي الله وراه يالاه تزوجتي باقي يالاه شهرك الأول
مسحات دموعها: ماما نجاة ماشي حملات فشهرها الأول
كطبطب عليها حاسة بيها: اا بنيتي نجاة هزات ولدتها فالأيام الأولى من زواجها في ساع.. ونتي ما تعرفي تكوني هازاه دبا نيت وما عايقاش.. جاتك حق الشهر
مسحات دموعها: باقي عليها الحال
كتلف فيها امها: واا حتى نتي باقي عليك الحال مزال صغيرة عيشي حياتك شوية بعدا.. ياكما جلال قالك شي حاجة
حركات راسها بسرعة بلا: بالعكس ما كيخلي ما يدير عليا
فاطمة: واا ا بنتي أنا راه شرف ما ولدتو حتى لينا وقت