🌹هن القوارير🌹 (في طور التنزيل )

part65

👑👑 هن القوارير 👑👑
شمس الغريب

الجزء 65:

هو فالطموبيل وهي شادة ليه الباب ما ساخياش وهو جالس كيشوف فيها بحال شي بنية صغيرة غضبانة على باباها
ضياء: عفاااااك اا جلال عاافااك.. خليني نمشي معاك
جلال شد يديها وجرها عنده باسها: ااا حبيبة البلاصة ما تصلاحلكش كاين غير الخدامة وغير الرجال تما ما كاين حتى امرأة.. الديبو اا حبيبة
لاقات حواجبها: بالصح ما غاتمشيش للمحل ديال الديكور
حرك راسه بالنفي: لا لا.. غادي نمشي نسالي شغالي تما ونرجع نمشيو نتقضاو لي يخصك للعراضة صافي
قربات باسته فخده: تمشي وتجي بالسلامة
جلال: انشاء الله.. ما تحبسيش راسك فالدار خرجي غير ما تفوتيش الباب وصافي بقاي هنا الداخل برا الدنيا مقطوعة عليك
ضياء: والبحيرة؟
عقد غوباشتو: راه عليها نيت هضرت اا ضياء ما تمشيش حتى نجي ونديك

رجعات لامام الباب كتشير ليه بيديها حتى مشا ودخلات للدار قررت انها تقاد الصالون مزيان وتنفظو ودير لمسة لأنه الدار مفينية بالحق الفراش مزال ما كمل كتقاد على حسب شنو عندها ومشات للصالون لي كيطل على البيسيسن هو فين قادات ديك البرزة ديال الحناء كتحرك من هنا لهنا بحال شي فراشة جمعات البيت ما خلات حتى قنت ما عاودات ليه الديكور على ذوقها هي

بان ليها الوقت مزال طلعات دوشات ولبسات بيجامة بالسروال ودارت زيفها وهبطات فيديها مذكرة وستيلو كتبات اش باغيا توجد قررات انها تدير الرفيسة بالدجاج البلدي على طريقتها وبما انهم فجو ديال البادية والدجاج موجود والgوتي راه حلويات ومملحات وما الى ذلك المهم عمرات اش خاصها واش غاتحتاج لهاد العراضة وكتكتب اش غا تحتاج فالتقضية غادير لجلال السيزي

بانت ليها زوجة السيد لي مقابل الفيرمة كاملة وخرجات عندها بابتسامة عريضة اصلا هي ما عارفاش الدجاج ديالمن بعدا وجالسة كتقرر فمصيره
ضياء حشمانة من هاد السؤال ما بغاتش تبان زعما انا مرات مول الشي: خالتي ممكن نسولك إلى جات على خاطرك؟
المرأة: اييه اا بنتي مرحبا والي ما جاوبتكش نتي شكون نجاوب اا النويويرة
تبسمات ضياء: خالتي هاد الدجاج البلدي.. دبا إلى بغيت ندير الرفيسة واش نقدر نهز منه زعما بان ليا كثير تبارك الله

يالاه جات تجاوبها المرأة سمعو الغوات عند الباب الكبير ديال الدخلة العساس مع شي حد آخر بقاو بجوج
ضياء مستغربة: اش واقع ؟
المرأة: ما عرفت اا بنتي عمر وقع بحال هادشي.. يمكن شي حد غالط.. المهم اا بنتي هاد الخير كله ديال سي جلال.. وااا بنتي الصراحة راه حنا بيدنا كنهزو الدجاج والبيض كيقول لينا كولو ووكلو معاكم المحتاج فالدوار.. وتبارك الله الخير كثر ما حدنا حنا ناكلو ونصدقو وخميرته تفيض.. ما كنحسو بالدجاجة فين تبيض حتى تم مخرجة 12 ولا 14 ولا كثر فلالس من وراها حتى ولا هاد الرزق.. ايوة اا بنيتي ملي محماد شاف الرزق كثير كيصدق منه بالحق كيدي يبيع فالسوق البيض والدجاج ملي يكثر والفلوس كيشريو بيهم العلف لبهايم والنقب للدجاج.. بالحق أنا نقول لمحماد يجمع ليك الفرارج الكبار وعزلي منهم