🌹هن القوارير🌹 (في طور التنزيل )

part4

👑👑 هن القوارير 👑👑
شمس الغريب

الجزء 4
دوزات نهار عند دارهم وشافت خوتها وجات العشية بسرعة حتى ظلام الحال وجالها عبد الخالق مهلوك من الخدمة لحسن الحظ نجاة ونعمة خلاو لجميع الرجال حقهم من الغذاء داتو معها ليها غير سخنات وعطاته يأكل وهي جالسة حداه كتشوف فيه ما هواش هنا متبع الماتش ديال الكرة يديه فالطبسيل وحواسه كاملة مع التيفي
ضياء قررات تجرب حظها: عرفتي اا عبد الخالق
باقي بنفس الوضعية: ياك لباس؟
صرطات ريقها: نعمة ختي وراجلها
دار عندها: ما تقوليش ليا مشاو لشي طبيب وقالو مزيان حيت كل مرة كتقولي نفس الحاجة وما كاين والو
صرطات ريقها اصلا هي عمرها قالت بلي امجيد هو لي ما كيولدش وحتى حد ما فراسو من غير عائلة نعمة وعائلة امجيد فقط وغير المقربين نيت ولي عارفين ما فيهمش تعاويد الهضرة وحتى ضياء قررات ما تشاركش راجلها هاد السر لأنه إلى ساقوه عيالات خوتو غادي العالم كامل يسيق الخبار ونعمة ما بغاتش راجلها يولي مسكة فالفام مخلية راسها هي لي فالواجهة يكفيها الناس لي مهمين فحياتها عارفين ومقدرين الوضعية وكيشجعوها وفرحانين ملي هي راضية بقضاء الله
ضياء: لا قررو يتبناو وليد
ضحك باستهزاء: صافي هادشي لي بقا ليهم غير يجيبو ولد الحرام يخشيوه وسطهم وزعما لا امجيد ولا نعمة واعيين وشافو مشاكل وقعو لناس آخرين
عصبها تفكيره ولكن ما قدراتش تبين ليه: ولكن هما ماشي ناس آخرين كل واحد واش مكتب عليه الله وهما ختارو ولد يكون كبير باش يعرف من الاول الحقيقة
اختاصر عليها الطريق وكأنه عارف اش غا تسولو من بعد: ما نعرف انا بعدا عمري نفكر نربي شي ولد ماشي ولدي من صلبي
ضياء بحال الى شديتي شي موس وغرستيه فيها: ايوة إلى ما كتبش الله إلى كنت ما كنولدش ولا انت ما كتولدش
شاف فيها كيحاول يهدنها: كل مشكل وعنده الحل اا ضياء الله يهديك هاد التوثر والعصاب والتفكير بزاف هو براسه كياثر عليك وعلى هرموناتك
ضياء: اا عبد الخا...
قاطعها: شربتي داكشي لي جابت لك الواليدة
ضياء: أنا راه عييت ما نشرب فداكشي اا عبد الخالق وراه ضرني آخر مرة فالمعدة راك شفتي حالتي وصلت حتى للصبيطار
عبد الخالق وقف من بعد ما تسمع الأذان لي حداهم: والله حتى عييت اا ضياء من نفس الموضوع راه حتى انا باغي وليدات منك ومعاك ولكن ربي ما كتبهمش
ضياء تابعاه وهو خارج: علاش ما نشوفوش شي طبيب علاش
عبد الخالق: يهديك الله سيري صلي انا غادي للجامع وندي معايا شي بواط نجيب الحريرة عارفها عزيزة عندك
خرج وخلاها ثاني غادي تبخر الملحة باغيا وليدات حتى هي باغيا تعرف فين كاين المشكل إلى كان بصح منها هي قابلة بأي قرار غادي ياخدو والى كان المشكل منه هي قابلة تعيش معاه واخا ما يربيوش والى كان المشكل غير هرموني ولا كيستدعي الطب ماشي هما الاولين أو الآخرين ولكن عبد الخالق متشبت بنفس

نيشان للمسجد لي حداهم وحداه واحد السيدة كتبيع الحريرة خلا ليها البواطة كما العادة ودخل للجامع مع كمل صلاته خرج هو وصديق ليه من الإخوان ملتحي وكيسكن قريب ليهم سلم عليه وبعد السؤال على الحال والأحوال وقفو بجوج بيهم جنب مولاة الحريرة أغلبية الرجال كياخدو منها الحريرة فهاد الوقت من بعد صلاة العشاء
عبد الخالق: قليل فين كتاخد الحريرة من هنا اا سي عمر
عمر: شي ستة الشهور ما بقيت خديتها (جبد لحيته) غير الزوجة ديالي حاملة تبارك الله
عبد الخالق طبطب على كتف عمر: ما شاء الله تبارك الله ايوة على السلامة كان عندكم مشكل حتى نتوما لا ؟
تمشاو كيهضرو بجوج فنفس الموضوع: اييه وراه باقي المشكل
وقف عبد الخالق غير مستوعب: كيفاش اا سي عمر ؟
ضحك بجهد: اا مالك تخلعتي يا أخي عادي زوجتي الأولى ما كتولدش تزوجت مرة ثانية وربي كمل ليا ولله الحمد
دار عبد الخالق كله كيشوف فيه: ومراتك الأولى !؟
عمر مبتاسم: ونعم الزوجة لوكان ماشي الأولاد ما نتزوجش عليها ولكن تقبلت الأمر والحمد لله عايش مزيان راه هاديك فدارها والثانية حتى هي غير فالدار لي جنب شريتها من سي عبد العظيم وليلة هنا وليلة هنا والعدل ولله الحمد وبخير حتى هما متفاهمات
عبد الخالق: كيفاش صارحتيها اول مرة كيفاش تعاملات مع الوضع ؟
عمر مبتاسم: ياكما باغي دير بحالي ... بالله عليك كاينة شي امرأة تبغي الضرة ولكن بما انها حتى هي عارفة بينها وبين الله وثايقة فيا ما نديرش الفرز بيناتهم وعارفاني كيف داير تقبلت المسألة وهي لي جات عندي باش تمشي تسني الموافقة
وصلو أمام بيت عمر لي كان فالشطر الأول توادع معه والطريق كلها وهو غير كيفكر ويخمم دماغه حبس ما عرفش كيفاش طلع الدروج وكيفاش حل الباب ودخل سمع صوتها الشجي وهي كترتل القرآن بتخشع وبشجن فصوتها
دخل الحريرة للكوزينة ومشا جنبها للبيت ألقى السلام بلا ما يتسنى منها الرد عارفها غايبة على العالم الخارجي وكلها مع القرآن تسناها حتى كملات ورجعات المصحف لبلاصته وناضت كتحيد الاسدال رجعاتهم للبيت ونيشان للكوزينة ثاني
لقات الحريرة باقي سخونة يالاه بغات تخرج تسولو واش تسربي العشا ولا حتى لبلاتي لقاته داخل مع الباب ديال الكوزينة
ضياء ببراءة: لقيتيني غادي نجي نسولك واش نحط دبا العشا
جر كرسي فصال ا مونجي لي تما وجلس: غير حطي هنا نيت ما حدها سخونة
بدات كتوجد اش تحط مع الحريرة وتحط فوق الطبلة ملي قالها غادي يجيبها قبل ما تبدأ الصلاة دارت البيض يتصلق حطاته مع التمر والشباكية وبريوات حلوين كلشي صنع منزلي من تحت يديها لي يشوفها كيقول لا علاقة مع المطبخ وهي تحطيها على الجرح يبرى جبدات زليفات زوينين وسربات داكشي بحال شي مطعم محترف هكا ولفاته كلشي مثالي حتى ولا كيبانو ليه البلايص لاش كيمشي والديور لاش كيدخل كلشي موسخ كلشي معفون ما عارفش بلي هي لي ولفاته كثرة النقا
بقا كيشوف فديك الطبلة لي تخاف كما العادة تهز شي حاجة يخسر الديكور أما هي بقات كتشوف ياكما ناقصة شي حاجة عاد مشات ثاني كتزرب جابت الملحة والكامون عاد جلسات مقابلة ليه مسمية الله قبل ما تغرف ليه وليها