🌹هن القوارير🌹 (في طور التنزيل )

part30

👑👑 هن القوارير 👑👑
شمس الغريب

الجزء 30:

ملي وصلو للدار هبطات وحطات بلا ما تعيق ديك 600 درهم بلاصتها وهبطات لقاته مهبط ليها لباسيها ومدهم ليها شداتهم بابتسامة انتصار وبادلها هو نفس الابتسامة ومشا كيعاون شرف فداكشي عاود رمات عينيها لبلاصتها بانو ليها الفلوس باقيين ودخلات مطلعة حوايجها للبيت

راحة: اووووه ياا ختي على الموطااارد.. وقفيهم باش نشوف الطرزات
وقفات الصاشي وهما يطيحو فلوس معاهم: عنداااك اا ضياء طاحو لك فلوسك اا صاحبتي هزيهم
حركات راسها: لا فلوسي فالبزطام
شيرات لها ليهم: وا تي راه الفلوس عند رجليك
هبطات لقاتها 600 درهم مطنطنة فلوس جداد 3 أوراق من فئة 200 درهم هزاتهم ولقاتو كاتب ليها فوحدة " ما بغيتيش هادوك مرحبا مزيانين نيت فيهم ريحتك خلي عندك نتي هادو "
راحة: ااا باسم الله عليك ما هرب ليا اللون حتى انا لي ما بقا ليا والو
طارت خبات دوك الفلوس فواحد الصنيديقة وراسها غادي يتفرق عليها واش مزوج يعطيها بالتيقار ما ناقصهاش هي مشاكل أخرى بقات كتشوف راحة فدوك القفاطن بغات تسولها على مراته جاها فضول ولكن راحة غا يمشي تفكيرها بعيد

راحة: عرفتي هاد اللون شحال بغات تحماق عليه مرات عم معاذ ومالقاتوش
بحال الى حسات بها: ااه مرات عمهم داك جلال
راحة خرجات عينيها: اويلي علاش جلال مزوج راه باقي باير.. قالت لك خالتي راضية لي تقبل لها على عصبية وهبال جلال كل عام دير ليها عرس جديد.. تي راه عصبي وعزيز عليه يعيش غير بوحدو كيف جن.. وكايغوت على أبسط حاجة عاد زيدي يا ختي فورمته انا غير كيوقف كنتخلع داير كي الباب.. وديما عاقدهم كلشي كيخاف منه

ضياء ما سمعات والو من هادشي لي كطرطر راحة حدها عرفاته مامزوجش باقي غير بوحدو صافي ضحكات على راسها كيفاش عصبها كيصحاب لها خائن شوية وهي تغوبش ثاني غير راسها هي مالها اصلا يكون مزوج ولا لا هي صافي قررات وقرارها لا رجعة فيه غادي تكمل قرايتها وتحقق أحلامها اش بغات بشي زواج 

كيف أي عرس مغربي داز على حقه وطريقه حتى هذا داز عرس ولا في الأحلام فقاعة وسط المدينة الفوق الرجال وتحت العيالات العريس كيتصور معاها ويبقى معاها ويطلع لعند الرجال شوية حتى مر العرس في أمان الله وحفظه
راحة من تما للاوطيل من بعد ما دارت لمعاذ جنازة شوية وتقولو سير بحالك ما بقيتش موافقة غير حشمات وصافي داها كيصبر فيها وعائلتها من وراها حتى هما كيبكيو عشرة للعين ملي كيكون شي فرد ف العائلة مشاغب وغير طالقها كيخلي واحد    الفراغ كبير فوسط الدار وهما عارفين البلاصة لي غادي تخلي راحة قداش

كانت مبعدة على الكل وكتشوف فيها غادي تركب تمشي هي أقرب وحدة ليها حيت هي لي تزادت من وراها كانت كتلعب هي وياها تمشي هي وياها للمدرسة وهي أول وحدة كتعاود ليها أسرارها واخا هي الصغيرة ولكن راه هي لي قرب منها بزاف لأنهم مزيودين بالترتيب كالتالي شرف-نعمة-حكم-ضياء وراحة هي آخر العنقود
بانت ليه وجا من الخلف بلا ما يثير الشبهات ووقف مد ليها كلينيكس من الخلف ونطق بهدوء تام ما حاملش يشوفها كتبكي

جلال بصوت رجولي يدب الرعب فعروق عباد الله: علاش هاد الدموع كاملين اختك راه غادي تكون غير فجنبكم وتقدري تمشي لعندها الوقت لي بغيتي وهي تجي الوقت لي بغات علاش دايرة جنازة
دورات راسها نصف دورة شوية ما تقول له وانت مالك غير حشمات على عرضها: علاش حطيتي لي الفلوس مع الحوايج
ضحك وعض لسانه من الداخل: واقيلة نتي الأولى حطيتيهم ليا فالطموبيل لا
غوبشات فيه: راه انت لي عطيتيهم الخياطة.. مالك يصحاب لك ما عندي باش نخلص
حرك راسه بالنفي كون شي حد آخر لي غوبش فيه وهضر معاه هكاك اصلا ما كاينش لي يتجرأ حتى لديك الدرجة
جلال: حاشا ما قلتش لك ما عندكش...
قاطعاته: ايوة صافي اذن هادوك فلوسك خاص تاخدهم (تمات غادية فحالها) غير ما هازاهمش  دبا
تمتم من وراها: غاترضيهم بالثني والمثني غير بلاتي

هي مشات لصقات جنب أمها وباها باش ترجع معاهم حيت خوتها كل واحد غادي يوصل نسابه لي معروضين حتى مد ليها باها سوارت الطموبيل
عبد الله: سوقي نتي اا بنتي أنا عييت بالسهير
شداتهم فرحانة خدات البيرمي فاش خدات الباك كان هو الكادو ديال باها وكانت كتسوق فداك العام لي كانت فدارهم وفمدة هاد خمس سنين لي كانت مع عبد الخالق ما كانش كيبغي يعطيها الطموبيل واخا تعواج بحجة أنه مستحيل يخلي شي امرأة تسوق به عنده تفكير رجعي بزااااف

شداتهم فرحانة ومشات ل بلاصة الشيفور كتجري بحال شي بنية صغيرة حتى كانت غادي تجي على فمها كلشي شاف فرحتها الكبيرة ولكن لي حس بسبب فرحتها هما عائلتها لي عرفو المزود باش كانت مخبوطة وحتى الناس القراب فهمات وحتى الناس لي ذكيين فهمو البلان

طلعات وتسنات باها وامها وشي وحدين من العائلة حتى هما كانت طموبيل ديال باها من نوع داسيا فاميلي كبيرة ومع ما كيستعملهاش بزاف كتبان جديدة مؤخرا كتهزها غير راحة لشي بلاصة قريبة حيت يالاه خدات البيرمي حتى هي

              💣💣💣💣💣 توقاعتكم وآرائكم 💣💣💣💣💣

اللهم يسر لكل وحدة فخاطرها شي حاجة يا رب