🌹هن القوارير🌹 (في طور التنزيل )

part86

👑👑 هن القوارير 👑👑
شمس الغريب

الجزء 86:

فاقت حاسة براسها مرتاحة وسط فراشه لي ما عارفاهش دياله حلات عينيه وسط البيت وبدات كدورهم هنا ولهيه وكتكسل وسط الفراش واخدة راحتها حتى كتشم ريحة الباندوش قوية وشي حد كيتحرك معها وسط البيت هزات راسها من وسط الغطاء وهي تصدم بتواجده لوهلة ظنات انه غير حلم خايب وأنها تزوجت به وهذا صباحهم كزوجين وناض دخل للدوش بالحق غير حركات رجليها عادي ما حسات بوالو وعرفات راسها راه هي لي كتحلم دبا بالحق اش داخل عليها يدير

جرات عليها الغطاء بشوية كتدخل تحت الفراش حتى قفزها: ما يسحابش ليا كنتي هنا.. جيت من الخارج وبغيت ندوش ودخلت ما رديت البال حتى خرجت من الدوش
صراحة كلامه كان على حق هو ملي خرج من عند نيكول خرج من الدار كاملة ومشا لواحد الفندق والصباح ما كان فيه ما يشوفها وقال يدخل لبيته القديم ناسي انه عايدة بايتة هنا ولا انه أمه ممكن تعطيها غرفته القديمة لي باقي كيستعملها بزاااف ملي خرج من الدوش عاد نتابه لشي حد ناعس والفراش مخربق وبانت ليه كطل بحال القطة وما بغاش تفكيرها يمشي بعيد.. لكن هي غير كمل جملته خرجات من وسط فراشه طبعا بديك الكسيوة الواسعة عليها ووقفات كتقلب على ما تلبس لقات قدامها غير صندالته ديال الصبع لبساتها وغادية كافرة باش تواجهه

بدوك الأعصاب وديك الصندالة لي كبيرة عليها تعكلات فالزربية وكانت غادي تجي على فمها لوكان ما تعرض ليها وشدها فحضنه بالبينوار دياله وهي حطات يديها فمكان ما كانش خاص تحط فيه يديها واخا ماشي شي بلااااصة ولكن نوح راه وصلاته حتى لقمة برج إيفل وخبطاته حطات يديها فجنبات خصره وضغطت عليه باش ما طيحش وقفها وهي بعدات كلها ملونة وما رضاتش خصوصا أنه كان كيحرك يديه لأنه الكسوى كانت من الحرير وملمسها كيزلق وكان كيحاول يضبطها باش ماطيحش ويوحل فيها

عايدة هزات صبعها فوجهه: مااا يصحابش ليك انا بنية صغيرة تفلى عليا حقا ما شفتكش مالك ما عندكش الدوش فبيتك.. باغي تخرج عليا وياخدو عليا نظرة خااايبة يااك باغي تنتاقم مني ياااك؟
بدات كتبكي غير بوحدها وهو مخليها كتجدب بوحدها عارف انه هاد البيت عازل للصوت وما بغاش يتجابد معها حتى هي الصباح هذا مشا للبلاكار حله قدامها وهي حلات فمها كتشوف حوايجه كلهم تما هز اش بغا ودخل للحمام وهي فبلاصتها مصدومة وما فاهماش اش كيوقع خرج مبدل وكيسد الصدايف بهدوء مشا ثاني للبلاصة فين ساعاته لبس وحدة ومشا للمكتب جر واحد الملف وجلس كيطالع عليه مشات ثاني كتزرب

نوح بلا ما يهز راسه: بشوية عليك هاد المرة إلى طحتي غادي تجيبيها غير فعظامك ما نقدرش نشدك من هاد المسافة.. وتنفسي ونتي كتهضري ما باغيش ندير شي تنفس اصطناعي ونحس براسي كنخون مراتي
وجهها مشا منه اللون فور ما قال جملته الاخيرة: دبا عرفت بلي هذا بيتك.. واش ممكن تخرج تخليني نلبس باش نمشي بحالي
هز فيها عينيه: باغيا تمشي هكا ولا بالقفطان؟ راه الواليدة يمكن وصات ليك على شي حاجة تجي باش تلبسيها
زادت خرجات عينيها: واااش ممكن تخرج الله يخلييك إلى لقاك شي حد هنا انا لي غا نولي مامزياناش
نوح: هاد المرة ما دخلي لشي بيت حتى تعرفيه ديال من.. والواليدة نيت خاص تفهم بلي هاد البيت راه باقي ديالي وفيه خصوصياتي.. نيكول وممنوع عليها تدخل
بمجاكرة: وهاااا اناا دخلت موت بالسم ااا المنحوووس

مشات كتنفض بفقصة للحمام وهو بقا كيحرك راسه بلا حول ولا قوة الا بالله العلي العظيم وفنفسه: لوكان ما بغيتكش تبقاي كون خرجتك
خرجات من الحمام كلها حمرة لقات غير ريحته لي باقي كدور تما أما هو ما كاينش مشات قدات الفراش لي نعسات فيه وجمعات الدنيا تدق الباب ودخلات مساعدة ديالهم فيديها صاشي من إحدى الماركات مداته ليها وشكراتها عايدة لبسات الحوايج لي كانو فيه وجمعات حوايجها فداك الصاشي وخرجات من البيت سالكة نفس الطريق لي طلعات منها هي وأم نوح
وشحال حشمات ملي بانو ليها كلهم مجموعين على طبلة وحدة وهي غادي تكون داك العنصر المختلف بيناتهم وحمارو خدودها ملي بانت ليها نيكول جالسة معاهم بشوميز دونوي قصيرة وصدرها كيبان رغم البينوار ولكن حيت حرير كتزلق وسيقانها عريانين

وصلات لتحت وانتابهو ليها وهي كلها ملونة: ممم سمحو ليا.. وشكرا بزاف على كلشي.. ونهاركم مبروك
نوح هبط راسه مكمل فطوره ونيكول غير حاضياه أما ماماه وقفات غادية ليها والأب دياله كيتسنى التدخل دياله وقتاش يحين
أم نوح: الله يا بنيتي فين تمشي بلا فطووور.. وانا معمرة اتاي على قبلك ودرت البغرير ممم زيدي زيدي قالاك تمشي
يالاه بغات تعتاذر هضر الاب دياله: واا والله اا بنتي ما نتي غادية حتى تفطري زيدي

صبحات عليهم كاملين وعينيها عند نوح لي مقابل معاها هو ونيكول بان ليها ما مسوقش ليها ونيكول كتخنزر فيها ما حاملاهاش جلسات كتسرط ريقها جنب أم نوح ومقابلة مع نيكول نيشان ومامات نوح كتحط ليها وتقرب وتهضر هي وياها بالدارجة
وقف نوح مستاذن: غادي نخليكم هاد الساعة عندي اجتماع.. نهاركم مبروك
هز ملف تحت نظراتها لي كان فالبيت نيت يعني ما كانش باغي يبقى فالبيت غير حيت هي تما باس رأس الاب دياله وقرب جهتها لعند أمه باس يديها وراسها حتى دخلات ريحته حتى للرئتين ديالها وهي عينيها على الطبسيل
نيكول: حبيبي ممكن توصلني معك للشركة خاص نمشي نسني على شي أوراق
شاف فالساعة دياله: إلى فتي نص ساعة نمشي ونخليك

خرج وهي طلعات كتزرب عايدة فطرات على خاطرها ورافقاتها أم نوح حتى للباب كتاكد عليها باش تزورهم مرة أخرى ما حدهم ففرنسا وعايدة واعداتها ومشات لسيارتها حطات داكشي ديالها فالمقاعد الخلفية يالاه ضارت باش تركب لقاتو فوجهها
نوح كيشوف فالسروال لي جاها شوية مزير: ما لقيتي ما تلبسي
هبطات عينيها لراسها وعاود هزاتو: وانت مااالك نلبس لي بغيت
عض على شفايفه وبغضب قال: ااه ماشي سوقي غير على وجه عماد لي موصيني وصافي.. أما اش مشا ليا فيك
غرغرو عينيها حتى الكذبة ما جاتش ثابتة أما كانت بصح تفرح إلى خوها وصى عليها: ما عرفتيش تكذب خوويا اصلا ما غايسولش فيا.. وما نستاهلش اصلا يسول فيا.. ارتاحيتي دبا.. واا ديها فلباس مراتك وبعدني انا

حلات الباب حتى ضرباته بيه وطلعات عينيها مغرغرين توحشات خوها وبغاتو يسمح ليها عيات صافي أما نوح فداخله فرح حيت ظنات انه غير كيكدب لأنه عماد كان كياكد عليه أنها ما تعرفش بلي موصيه عليها وهو ملي استفزاته خرجها بلا عقل وفنفس الوقت بقات فيه والحالة لي وصلات ليها براسها

             💣💣💣💣💣 توقاعتكم وآرائكم 💣💣💣💣💣

عايدة يا عايدة