🌹هن القوارير🌹 (في طور التنزيل )

part16

👑👑 هن القوارير 👑👑
شمس الغريب

الجزء 16:

هو خرج نيشان قصد دارهم ومع دخل مع الحومة فينما كانت شي امرأة كبيرة توقفو تسول على ضياء بحسرة ضربه الضوء وعرف بلي عائلته دارو الواجب كما كانت متوقعة هي وكما قالتها له مشا مكشكش دخل عليهم لقاهم كيوجدو فشي حلوى وناشرين شي توابات وكلشي كيضحك حتى من عيالات خوتو

ع.الخالق غوت حتى قفزهم: الوااااليدة ااا الوااااااليدة
طلات عليه من الصالة: عبد الخالق.. وليدي ياك لباس؟
حرك راسه معصب: ياك لباس نتوما كيفاش الناس عرفات بالسر لي قلت ليكم
كلشي قلب عينيه ونطقات صابرين: اييوة حتى انت شلا ما تبقاش فيك كون كنتي انت لي ما كتولدش كون راه ضربو ليك الطر
أخته الكبيرة: وزايدون إلى تزوجتي غير هكاك غادي ينوضو ليك مراته شهوة اللهم يعرفو السبب من دبا باش حتى حد ما يحل عليك فموو

بغا يهبل ليهم تما خصوصا وأنه لقا داكشي لي قالت ليه قدامه جراتو أمه لواحد البيت تما عنده الباب دخلاته وسدات من وراهم الباب جلسات متبعاه كيمشي ويجي
تاجة: يحسب ليك انا ما عزيزاش عندي ضياء (هزات نيفها للسماء) بالحق كما هي عزيزة على والديها حتى انا عزاز عليا بناتي (بقا كيشوف فيها مامستوعبش هاد المعادلة) راحة لي كطلع وتهبط ف صابرين بنتي راه صابرين جات كتنخصص ليا علاش ياك لباس غير تزوجات بالبوليسي تدفع على بنتي يانا كون بغينا ولد راضية كون راه زمان جا راه تعاود ليا صابرين كان لاصقها هي لي ما بغاتش
ع.الخالق: واش جاب ضياء للهضرة
تاجة: هي لي ولات تجي نيشان لدارهم ما طل ما تزور مالنا اش دايرين لها حنا لي حبسنا فيها الأولاد خواتاتك بقا فيهم الحال كانو يمشيو عندها وتكبر بيهم دورك ولاو يخافو يمشيو حيت هنا قالك ضل تحنزز فيهم وكما قالت اختك راه غا تزوج على الولاد ماشي هي الأولى ولا الآخرة لي دير لنا هاد الحالة
ع.الخالق هبط راسه للارض شاداه تالافة: وهي دبا بغات الطلاق إلى بغيت انا نتزوج
تاجة جنون بداو يتراقصو ليها عند راسها ضغيا قلبو ليها بناتها راسها على ضياء من محبة للكره
تاجة بغيض: ولي خلقها خلق غيرها اا وليدي وهاديك البنت لي كتوصل انت اختك قالت شهوة منها ومحجبة حتى هي ومالك
عاود لأمه قصته مع ريحانة وقالت ليه هي مستعدة تمشي طلبها ليه غير يفك جرة مع ضياء ويشوف اخرتها معها

أما فالباب كانو لاصقين خواتاته كيتصنطو وصابرين ملاهية عيالات خوتها لي كيصحاب لهم مزال كيقلبو ليه على العروسة وكل وحدة باغيا تبين ليه بنات تريكتها ها خواتاتهم ها بنات خلاتهم وعماتهم داكشي باش واقفين معاهم وهما مستاغلين هاد النقطة

كيخرج من الدار فحال ويرجع فحال عمروه ثاني قد لي يقدو وهو راجع باش يفتي عليها آراءهم باسمه أما هي كانت كطل من البالكون ديال الكوزينة بلا كلل ولا ملل والتيلي حداها الخط دايز كتهضر غير وقفات الطموبيل دياله خرج صوتها مبحوح بكثرة البكاء والخنقة مولفة كتبقى فالدار وما كتخرجش ولكن يتسد عليها الباب وتبقى بحال المسجونة واليتيمة بلا سبب لا

ضياء بصوتها المبحوح: هاا هو جا
الشخص: صافي نتي واجدة
حركات راسها ليه باه وجاوبات: ااه

فعلا كانت لابسة حوايج الخروج وملي خرجات من الكوزينة كان الكولوار فيه 2 باليزات كبار وصاك كانت جامعة حوايجها فيهم ما خلات حتى شرويطة من حوايجها ومستلزماتها الخاصة صاكها على دراعها حتى من احذيتها جمعاتهم فصاشي عند الباب واقفة بصمود عند الباب كتسناه شداتها رجفة خوف ملي سمعات خطواته عند الباب

هو غير دور البوانيي وحل الباب تصدم بالباgاج لي عند الباب ما مخليهش منين يدوز هز عينيه فيها واقفة قبالته باقي كيحاول يستوعب حتى تدفع بكتف الشخص لي وقف عند العتبة وجر داكشي مخرجو دار شافو وهو يتبنج أما الشخص متجاهله على الآخر

شرف: ضياء يالاه هبطي (مد ليها السوارت ديال الطموبيل دياله)
فاتو بلا ما تشوف فيه هزات الصاشي ديال صبابطها والصاك لي كان خفيف نوعا ما ودردبات مع الدروج مخلية ليه عرض كتافها متبعهم
شاف ف شرف لي مخنزر فيه: عطيناك اختي النهار الأول باش تحافظ عليها عمرها تشكات ولا قالت أي واخا شحال من حاجة راه كانت باينة ولكن كنا كنقولو الولد مزيان اش بغينا بعاءلته ولكن باش تحتم عليها بلي هي لي ما كتولدش بلا تحاليل بلا والو وتخلينا الحومة كلها تهضر عليها بالخايب هي وخواتاتي ووصلات بكم حتى للواليدة ولكن حرز عليك باقي بين يديك طلاق اختي لي طرقتي عليها هنا بحال المسجونة أما ما يلقاو ما يجمعو فيك

هبط جوج درجات وعاود ضار شاف فيه: يصحاب ليك الناس تيقو الهضرة لي عائلتك كتقول على خواتاتي بالعكس هما لي تلاقاو لنا كيقولو سيرو عتقو اختكم من يدين ديك العائلة.. هادشي كله على قبل الأولاد لي إلى ما بغاش يعطيهم ليك ربي واخا تجيب 1000 امرأة وها انت ولدتيهم غا يخرجو فيك الشيب بسباب الذنوب لي درتو فاختي

هبط شرف مكمل والجيران كلشي كيوشوش والكل رد اللومة ليه بحيث ضياء كتمثل ليهم تما الزوجة الحلم لأي راجل وقدوة للعيالات لي كيعرفوها واخا غير عن بعد لقاها شرف كيتوادعو معها العيالات لي تما وكيدعيو فيه وهزوه وطلعوه غير بالمنافق أما خواتاته معروفات وباينات عليهم شرانيات

غير بان ليها خوها ودعاتهم وشافت فيهم قبل ما طلع للطموبيل: شوفو ما تخافوش انا غادي نبقا نراجع مع ولادكم فالواتساب واخا مشيت للدار راه كاين الويفي عندنا وغادي نشري تيلي

                💣💣💣💣💣 توقاعتكم وآرائكم 💣💣💣💣💣

اش بان ليكم