🌹هن القوارير🌹 (في طور التنزيل )

part34

👑👑 هن القوارير 👑👑
شمس الغريب

الجزء 34:

بداو المهمة ديالهم كل واحد منهم كياخد مجموعة فيها 10ديال الأطفال وكيخليهم يخدمو معه الحلوى لي ختار وكيديرو المداورة عاد ينوضو 10 آخرين وهي غاديا والحلويات لي مصايبين حاطينهم فبيفي زوين مطبقين فيه فنون الديكور لي تعلمو طلبة الديكور ملي بداو فالصونطر وضافو عليه مهاراتهم الخاصة 

وصلات عندها مجموعة أخرى وكل مرة كتعاود لهم على هاد الحلوى بلا كلل ولا ملل وبنفس الحيوية واخا تعيا ما غاتقولش عييت كدير لخاطر ليهم أكثر من أصدقائها لي حتى هما دايرين أكثر من جهدهم مي هي الوحيدة لي نسات أسس العمل اليوم الطربوش ديالها تلبسو لهدا طابليي لهادي حتى من خاتم ديالها على شكل وريدة كانت مزينة بيه يديها عطاته لواحد البنوتة ملي شافتها كتشوف فيه

كان واقف بعيد عارف بلي غادي تكون هنا ولكن ماشي على قبلها دار هادشي هادي هي طبيعته الفرق هو أنه اليوم دخل مع شي جمعية تبرع لها وماشي حتى دخل معاهم لا دخل راسو وبقا بعيد مراقبها غير هي وكيتامل فرحتها وعفويتها معاهم بلا هواه تبسم وضحك وجهه العبوس زاد قرب جنب واحد الشجرة باش يسمع اش كتقول لهم حيت كان بعيد بزاف

ضياء: ..... هاد الحلوى هادي نتوما لي ختاريتو شنو يكون فيها يعني غادي تكون أول حلوى تاكلوها ونتوما ...
نطقو كلهم: صاااايبناها
كانت الفرحة بادية عليهم كلهم شوق ل مذاق هاد الحلوى لي اغلبيتهم طلبو يكون فيها الشوكولا والفريز هادشي لي عزيز على الأطفال
ضياء: غانسميو هاد الحلوى "* حلوى أطفال دار الطفولة *" ديالكم كتكتب لكل واحد قصة فالمطبوع وتكتب ليه سميته جنبها وكل واحد خدا مطبوع كتعطيه حليوة من لي طيبات من قبل أما هادي لي صايبات معاهم بوحدها بسيطة من لي شراو لهم وكتبوسهم كيمشيو من عندها ناشطين

يالاه مشات ديك المجموعة وبغات تستقبل وحدة اخرى حتى حسات بظل ديال شخص كبير هزات عينيها وهي توسعهم
جلال: أنا ما تعطينيش شي قصة ونذوق (شير لها بعينيه للحلوى)
بانو لها الوليدات جايين بغاته باش يمشي مدات له وحدة خداها وبقا عاصر لها تما والوليدات تجمعو عندها مبتاسمين لها من صباح وهما كيتسناو نوبتهم عندها ملي كيسمعو صحابهم اش كيقولو وحتى كيفاش كيشوفوها كتصرف معاهم
حركات له حواجبها زعما سير دار راسه مكلخ ملي لحات عليه: مزال ما خديت قصتي.. وزايدون (شاف فالوليدات) بغيتوني نمشي
غوتو كاملين: لااااا لاااا.. يبقا معانا عمو جلال
هي مستغربة منين كيعرفوه وهو غمزها: يالاه انا غادي نكون بحال هاد الوليدات.. كنسمعوك.. وبغيت نفس الحاجات لي كياخدو (عاود غمزها عرفاته كيهضر على ديك البوسة لي كتبوسهم)
مع كملو دوك الأنشطة توجهو فرقو على الوليدات فطباسل بلاستيكية وجلسو مجمعين معاهم هو بقا فنفس القنت مراقبها وكل مرة يجي عنده وليد ولا بنيتة كيعرفوه مزيان حق المعرفة يسلمو عليه ويمشيو فرحانين وهي حتى هي كتشوف فيه بلا ما تعيق
وقف عليه معاذ: العميم ااش جاك حتى بقيتي وسط جوقة ؟
شاف فيه عارفو كيطنز عليه: وانت اش جابك وسط هاد جوقة كون راك كتحل خيوط شي عصابة ولا جريمة
معاذ شاف فراحة منيم عينيه: الحب ااا العمييم الحب
قرفده: واا ترجل معانا اا صاحبي
خزر فيه معاذ: حلال عليك وحرام علينا ولا كيفاش
جغم من قهوته: بحال داكشي.. فاش غاترجعو؟
معاذ ببلادة: ف طموبيلتي (غير بان ليه عقدهم وشاف فيه) ااااه فطموبيلتك صافي صافي فهمت.. انا غادي نتهنا من طموبيلتي
خلاه كيشوف فظهره وهو دوز لابيل لواحد خدام معاه قالو يجي لعنده باش يعطيه السوارت يدي ليه الطموبيل تغسل قبل لا يغسلو جلال هو نيت

مر وقت طويل وهو كيتسنى بلا كلل ولا ملل على غير المعتاد حتى جات هي وراحة تفرقو على دوك الوليدات بالكشايف وجاو لفين واقف معاذ وجلال لي واقف بشموخ والتيلي على ودنيه وعينيه عليها فقط حتى وصلو عندهم وهو باقي كيهضر حتى كيحس بشي لويدة صغيرة كتجر له السروال دياله من تحت
هبط عينيه لقا بنوتة صغيرة فعمر خمس سنوات زعيعرة والعوينات خوضر تحلف عليها ماشي مغربية لوكان ما هضراتش: عمووو جلال فوقاش غادي تجي عندنا باش نلعبو
هبط هزها بين يديه مقبلها: نعيط عليك من بعد.. الغزالة رييمااا غادي نجي غير باقي كنقلب لك على الأميرة لي بغيتي نجيب لك
شافت فضياء وسبلات عينيها: جيب معاااك طاطا ضياء
جمع حواجبه بتساؤل: علاش طاطا ضياء غادي تلعبي بيها؟ (لأنه هي طلبات مونيكة تكون اميرة)
حركات راسها: امم امممم.. ولكن إلى جبتي معاك طاطا ضياء ماشي مشكل جيب مونيكة كما بغات تكون
حطها لأنهم كانو كيناديو عليها وهبط لمستواها: اووك غادي نجيب لك المونيكة الأميرة.. (شاف فضياء) وحتى طاطاك ضياء (باسها ومشات)

حتى واحد ما استغرب من جانبه معاذ راه عارف راحة ولات عارفة إلا هي لي باقي ضارها راسها ما كتبانش عليه عنده الخاطر للوليدات وهاد المسائل عاد بالها مشغول مع التيلي لي بقا هاضر فيه ومزال قال للشخص نعاود نعيط عليك يعني كيعطيه اهتمام مسبياها مرة أخرى فالفضول باغيا تعرف ولباس
راحة شافت فمعاذ: يالاه نمشيييو
معاذ حك مؤخرة راسه: غادي يوصلنا العميم حيت الطموبيل داها واحد دري صاحبي فيها واحد المشكل وكلفته بيها
قبل ما تفرشو وتقول ياك عاد ديناها وماكان فيها والو جرها وخلاهم هي كتشوف فصباطها وهو كيشوف فيها
جلال جبد التيلي وقبل ما يدوز المكالمة وهي حاضياه هاد المرة قالها: نمشيو

خلاته سبقها وتبعاته مصدومة فيه وهو كيهضر

               💣💣💣💣💣 توقاعتكم وآرائكم 💣💣💣💣💣

ماذا نسمي هاد الشيء؟ شي ريحة عطاااات من شي قنت ؟!!؟
ومعامن كيهضر جلال