🌹هن القوارير🌹 (في طور التنزيل )

part6

👑👑 هن القوارير 👑👑
شمس الغريب

الجزء 6:

فلاش 🔙🔙

جلسات كتفكر ملي كانت كتعاود ليها راحة ماشي بعيد غير عامين قبل كانت راحة فالسانكياماني كانت عندهم ضياء ودخلات راحة حمرة بحال مطيشة للبيت ما رداتش البال لضياء بلي كاينة فبلاصتها قبل ما تزوج كتفرج فالتيلي حتى بانت ليها راحة كتصوط على راسها ووجهها لي حمر حاسة بالسخونية والتنفس ديالها غير منتظم وقفات غادية عندها خوفاتها جلساتها وعطاتها تشرب
ضياء: جلسي استغفر الله مالكي فهاد الحالة؟ (بخوف)ياكما تعرض ليك شي حد ؟
حركات راحة راسها بالنفي: لا لا لا (مدات ليها يديها اليمين مفرقة صباعها) عطيني عهد الله الهضرة لي نقول ليك تبقى بيني وبينك وما يدخل فيها حد
مدات ليها ضياء يديها معاهداها وكملات راحة: حيت الى ما عاودتش لشي حد دبا غادي نحماق (بعيون ديال القطة)
ضياء بقلة صبر: يالاه طلقيني قبل لا يجي عبد الخالق راه غير فدارهم
راحة صرطات ريقها: هانتي كل مرة كنخرج من المدرسة كنلقا معاذ ولد خالتي راضية حاضيني من بعيد بطموبيلته وكنت كنقول غير عنده شي خدمة (طلات عليها) ياك عرفتيه.. هو راه ولى ضابط شرطة (حركات ليها راسها باه) ايوة ديك المرة كان واحد الولد كيضصر عليا هبط سلخو مزيان ما خلاش فيه وعيط عليهم هزوه بحال شي جثة وغوت عليا باش نمشي للدار من الشارع الكبير ومانبقاش نختاصر الطريق من الدروبة
قرصاتها ضياء: عبر عليك ياك ديما كنقولو ليك جي من الشارع ونتي من عز عليك الدروبة باش تجي بالزربة
حكات القرصة كتغوت: واا راه كتزيرني بيبي
خرجات فيها عينيها: كملي
راحة ولاو عينيها فيهم القلوبة: اليوم كان الصداع فالمدرسة واحد المخوصمة بين الدراري وعيطو على البوليس وجا وعرفتي اش قال ليا قلب عليا فالاقسام كاملين حيت كنا مخبيين وخرجني قال ليا سيري لداركم قبل لا قطعتهم ليك وعاود عيط عليا قال ليا ديري فبالك بلي داك التخربيق ديال البنات راه ما كاينش من دبا بقاي غاديا نيشان راك ديال معاذ من نهار شافك وراه شافك من نهار جيتي للدنيا
ضياء: ويل الشيطان ويسمعوك الدراري
خرجات عينيها: واا حتى انا خرجت فيه عيني قلت ليه والله حتى نقولها ل خوتي بعد مني انا باغيا نقرأ
ضياء عجبها الفلم وأول مرة تشوف شي قصة حب حقيقية وشكون عايشاها اختها لي عنها 16 سنة: ايوة اش قاليك
راحة: قاليا حتى انا مخليك تقراي وغادي نزيد نخليك تقراي إلى شديتي معايا الطريق

عودة 🔙🔙

بقات كتسنى العودة دياله بفارغ الصبر خبراته وفرح بدوره لراحة وقرر يمشي هو وياها يباركو بعدا مسبقا وشرط عليها باش يخبرو عائلته بحكم جورة ونساب وغادي يتقلقو وحتى هي خبراته بلي أمها قالت ليها تقولها ليهم يعني ما عندهمش مشكل وهادشي كيزيد يخليه يحب نسابه ناس واعيين وخيرين
تاجة تبسمات ملي سمعات الخبر: ايوة تبارك الله على راحة الله يكمل عليها
نقزات زوجة لوسها: ربي اش دايرين ليكم والديكم غير توصلو 18 عام كتزوجو وماشي لأي واحد لناس زينين فالحومة
ما عرفات ضياء باش تجاوبها بقات غير كتشوف كمية الحقد والكره لي كيشوفو فيها بيه عيالات لواسها ولي صدمها هاد المرة حتى أخت راجلها الصغرى صابرين مغوبشة وزايدة عليهم وهي لي أكبر من راحة اختها غير بعام وشي شهورة
صابرين بغصة فحلقها: ايوة فين كتعرفو وكيفاش حتى بغاها
ضياء لمسات الغدر فسؤالها: ما عرفتش لي قالت ليا ماما بلي عمي هو لي هضر مع بابا فالمسجد
نقزات مرات لوسها الاخرى: ايوة بانت ليه غير راحة ها البنات عطا الله مالو ما جا لصابرين  ولا لشي وحدة أخرى (دارت علامة بصبعها) باينة كانت كتعرفو
ضياء قندشوها: الله يهديكم مالكم جاتكم عجب راحنا فحومة وحدة لوكان جا طلب صابرين غادي نقولو ثاني لا حقا راه كانت كتعرفو ولا كون جا لاختك غادي نقولو راه كانت كدلع معاه فالقهاوي
يالاه بغات تهضر مرات لوسها قاطعاتها مكملة: وراه جميع تخطبنا بنفس الطريقة
تاجة شافت القضية حماضت وهما لي ظلموها: نوضي اا بنتي سيري لداركم حتى يجي عبد الخالق ويلحق عليك
داكشي لي دارت كانت كتسنى غير الاذن منها كيف وصلات الباب لقاته يالاه غادي يدخل مقضي شي حويجات من شي باتيسري عرفاته لدارهم مشات هي وياه غير بالرجل بحكم قراب كما قلنا دقات وحل ليهم خوها الصغير زوج رحيمة "حكم"
حكم: دخلو مرحبا بيكم
عنق ضياء عناق حار مخلي ع.الخالق كيشوف مبتاسم وباركو ليه هو الاول عاد دخلو سلمو على البقية وباركو ليهم وراحة طايح عليها السر والحشمة من دبا 
حكم: واا عاد غادي يبردو ودنينا من صداعها
اشرف الأخ الأكبر زوج نجاة: وااييه يا خويا وربي كيعرف ما يلاقي جاب ليها بوليسي باش فينما تبغي تعواج يقادها
نعمة عنقاتها: ايوة ايوة باراكا عليها لا تصدقو مقوسين عليها ويخليها لينا هنا
طلقوها بضحكة عائلية صدماتها نعمة كيصحاب ليها غادي دافع عليها ساعة عاوناتهم عاد برداتها ضياء ملي عنقاتها من الجهة الثانية
ضياء: خليو عليكم اختي دبا تخوي عليكم الدار وتوليو تمناو غير تسمعو صوتها فالقنات
طيحات عليهم ضياء الضيم اصلا هما غير كيتلفو بديك الضحك حيت مجربين جوج كيات الأولى ديال نعمة والثانية ديالها هي نيت كيفاش كيخليو الدار خاوية وشحال كيبقاو يبكيو من وراهم كلهم حتى كيتنفخو عينيهم ما نساوهمش وعمرهم ينساوهم هما عمارة الدار  عاود رجعهم امجيد لسكة الضحك والنشاط
امجيد: وا حتى حنا ولدنا غادي يحضر للخطبة ديالك
كلشي ضحك وفرح إلا عبد الخالق لي بالعكس غوبش ما عاجبوش هاد القرار وما باغيش ضياء تأثر بيه وهي لاحظات تغير ملامحه
راحة: فوقاش غادي يجي معكم قانونيا
نعمة كضحك فرحانة ودموع الفرحة نزلو لها: بعد غدا غادي يكملو الأوراق وجلسنا معه قال بلي باغي سميته تبقا هي هي بلال وهي لي درناله ف الأوراق

رجعات هي وياه للدار بجوج بيهم ما باغيينش يهضرو على الموضوع حيت قراو تعابير بعضياتهم تما ما يحتاجوش يتكلمو
ع.الخالق: بغيت نتشاور معك فواحد المسألة
ضياء جلسات قبل ما تبدل حوايجها كانو فبيتهم: لي هي الله يسمعنا خير
ع.الخالق:

ضياء: اه عقلت عليها مالهم مساكن؟ 
ع.الخالق: أخته مسكينة غادي تقرا فكلية الشريعة لي الفوق
ضياء حركات كتافها: وراه جميع الكليات لي كاينين فالمدينة ديالنا كاينين الفوق
ع.الخالق: اييه وكاين السكن الجامعي ولكن خوها ما بغاهاش تبقى فيه
ضياء: ايوة الله يدير ليه تاويل ديال الخير
ع.الخالق: أنا الصباح ملي بان ليا كيقلب على الحلول وكيلمح ليا ما بغيتش نتاخد شي قرار حتى نشاورك نتي الأولى
تقادات فالجلسة كتسناه اش بغا يصنع: اشمن قرار هذا؟
ع.الخالق: أنا قلت بما انها طريقي إلى ديتها معايا ورجعتها ما كاين باس
خرجات عينيها ضياء بصدمة واش من نيته: اجي نقول ليك ملي غادي دير الخير ديرو بلاتي نتقيد حتى انا وبقا تدينا بجوج وجيبنا بجوج ولا جاك عادي انت وبنت بوحدكم فديك الطريق كاملة ويوميا (وقفات ما حملاتش حتى يجي يتشاور معها فهاد المسألة) فكر فيها مزيان اا عبد الخالق
مشات للحمام دير روتينها المسائي قبل لا تنعس وهي مفقوصة واش من نيته كيقتارح عليها هكا اقتراح لقاته باقي كيتسنى فيها ملاهي بالتيليفون ناوي يعتاذر يمكن ولا ما بقاتش عرفات مزال راجلها فاش كيفكر ولات كتحس بيه بعيد عليها أكثر من أي وقت داز يمكن فكرها فبداية زواجهم فاش يالاه بداو كيتعرفو على بعضياتهم
تخشات بلاصتها وعبد الخالق شدها من كتافها وهز ليها راسها باش تشوف فيه
ع.الخالق: ضياء انا راه ما قلت للناس والو وما قلتش ليك غادي نمشي نديها راه غير تشاورت معك وعرفت رأيك
ضياء أول مرة تخرج فيه عينيها وتهز عليه صوتها واخا ما كيبانش واش رفعت صوتها عليه ابدا: اا عبد الخالق اصلا ما خاصش تفكر فيها باش تشاورني حشووومة والله
قرب منها حتى تخالطات انفاسهم: اذن صافي سمحي ليا غلطت وما بغيتكش تنعسي ونتي مقلقة مني
تبسمات باستحياء لي باقي فيها ما بدلوش الزمان وهمسات ليه حتى بورشاتو: المسامحة اا عبد الخالق
من بعد المغازلة البسيطة بيناتهم تمموها بمعاشرة بعضهم بحب وحنان كأي زوجين بغاو بعضياتهم بعد الزواج خصوصا عبد الخالق لي حس بالفرحة لأنه عرفها غارت وهو عمرو جرب هاد الإحساس لأنه اصلا ما كيديرش ليها علاش تغير اصلا

وفالصباح فاقت ثاني موجدة راسها ضياء باش يوصلها لدارهم باش يبداو التوجاد واخا راه بداو من البارح فشي حاجات ودبا اتافقات معه باش كل يوم يديها ويرجع من وراها فالعشية باش يكملو التحضيرات