🌹هن القوارير🌹 (في طور التنزيل )

part79

👑👑 هن القوارير 👑👑
شمس الغريب

الجزء 79:

كان لقاء مليء بالاحاسيس والحب لقاء أم وولدها حكم عليهم القدر يتفارقو إلى بغاو واحد يعيش حياة زوينة ومن حقه ضحات الأم بنفسها كما عوداتنا فغالب الأوقات باش ولدها يعيش مزيان لقاء خلى الكل يبكي بالفرح للقاءهم والحزن على الحياة لي فرقاتهم.. جلس حداها ولدها وبقا مخشي فحضنها وهي مسكينة كل شوية تهز الشال ديالها وتمسح دموعها كانو مجموعين فدار فاطمة أم ضياء جاو حتى بعض الإخوة ديال فاطمة الشقاق لي قراب لأنه زهور عزيزة عندهم ولكن ما لقاو ليها جهد

زوجة مصطفى لي مكلفين بولد زهور: والله اا الحبيبة إلى ما كرهناكش تجي وتعيشي معانا راه غير انا ومصطفى وعبد العالي (ولدها) بووحدنا.. بالحق الله يهدي خووتك وأمك حتى هي اا زهور
زهور مقهورة بالحق كتفرح كل ما شافت ولدها لابس وعايش وكيقرى مزيان هادشي مكفيها ومخليها فرحانة
زهور: اا ختي مي راه ضاغطين عليها خوتي.. علاه هي عايشة مزيان حتى هي لهلا يوريك والله الى كتبقا فيا
فاطنة والتسبيح فيديها: واا لا اله الا الله الصبر الصبر.. دبا ربي يعوضك بوليدك سيدي عبد العالي الغزال ديالنا

عبد العالي ولله الحمد دائما ما كيحس بالفرح مع أخوة أمه من باها كيحس انهم هما الاخوال الحقيقيين كيحس بالحب ديالهم ليه سواء ملي كان باقي فالبادية وملي جا هنا خلاص واخا هو مستقر عند مصطفى بالحق كل مرة كيمشي لعند خاله أو خالته بطلب منهم طبعا وإصرار مكسي مصبط وكيقرى فمدرسة زوينة عايش حياة زوينة خاصاه حاجة وحدة فالحياة ميمتو بالحق دائما فاطمة خالته كتجلس معه فاش يجي جلسة كلها أمل كتخليه يتفائل كتقوليه بلي حنا ما عارفينش ربي اش مخبي لينا حنا خاص غير نصبرو حيت كنزربو بزاف وراه ربي قالها《خلق الإنسان من عجل》بالحق ربي ما كيحافيناش وهو ثاني قال بلي《بعد العسر يسرا 》واكيد غادي يفرجها علينا ربي

هاد الحوار مع فاطمة لي كيكون طويل ما كيخليهش يحس بالملل بالعكس كيحس بواحد الراحة كبيرة وكيتجدد يقينه بالله سبحانه ويتقوى وغير كيكمل مع فاطمة كيشدو سي عبد الله لي عزيز عنده عبد العالي بحال ولاده وحفايده وهو لي خلاه يثبت فصلاته ويتشبت بإيمانه.. يعني الولد لقا واحد الجو زوين جو تربوي كيتعلم من اخواله وخالاته وزوجاتهم وازواجهم كلشي حتى أصبح من خيرة الأولاد تبارك الرحمان

عبد العالي: ماما كون تبقاي مع ضياء حتى تولد.. باش نشوفك بزاف
زهور عنقاته: واا وليدي حنا عند الله.. المهم انت سمع لخوالك وخالاتك ماشي غير جيت تبغي تفرعن.. وقرايتك قرااايتك اا وليدي
حرك ليها راسه وتمخشش فيها أكثر تحرم من حنان الاب وهو صغير وحرموه من ديال الام وهو فمرحلة المراهقة بالحق ربي كيبغي عباده عوضو بآباء هما وأمهات
دخلات للدار حاسة بالخنقة والعصاب ما عارفاش اش كيوقع ليها علاش كتخنق علاش ملي شافتو بدا حياته بعيد عليها عاد هي حياو عليها المشاعر لي اصلا ما كانوش ياك هي لي كانت تبعدو وتهينو علاش دبا بالسلامة تحس بالخنقة وزادت كملات عليها ملي عرفات بلي علاقتهم جدية وكيتعتابرو مخطوبين