🌹هن القوارير🌹 (في طور التنزيل )

part142

👑👑 هن القوارير 👑👑
شمس الغريب

الجزء 142:

كيف بانت ليهم حالة الممرضة وتبعوها الطبيبتين وجدو راسهم لأسوء الأخبار وكيتمناو يكونو غالطين أما ضياء بقات مثبتة عينيها ومتشبتة بآخر أمل عندها
الطبيبة شافت فالممرضة: ياك قلت ليك ارتاحي ليك هاد النهار نتي مريضة
طبيبة الاطفال: خليها بغات تحضر فهاد اللحظة طبيعي لأنها مرت بنفس التجربة (شافت الطبيبة فضياء) الغزالة ديالنا.. الحمد لله بنتك ما خيباتناش وفعلا طلعات قوية كما قلنا.. التحاليل ديالها كاملين خرجو مزيانين.. كتنفس مزيان تأقلمت مع البطن الجديد.. ودبا راه تقدرو تشوفوها من خلف الحاجز
طبيبة ضياء قربات عنقاتها لأنه ضياء ما بقاتش قادرة تحبس دموع الفرح ببنتها لي تجاوزت مرحلة من مراحل الخطر مرة ثانية وبينات على قوتها وهي مزال صغيرة
الطبيبة: تتبعك للتعليمات لي كنت نعطيك وأخدك ليهم بجدية وعين الاعتبار.. عاونو البنية ديالك الحمد لله.. لدرجة تبارك الله تزادت بوزن أكثر من ديال 7 شهور وبصحة جيدة وكتأقلم حاليا مع الحاضنة ديالها
ضياء هزات عينيها بطلب: واش نقدر نشوفها؟
الطبيبة: باباها يمشي يشوفها ويصورها لك من الحاجز حتى تتحسني وداك الساعة تقدري تشوفيها

كان احسن خبر تلقاوه هاد الايام وعليه دخلو عائلة جلال راضية، رضا، نسرين وراحة لي جاو مع الخبر السعيد وتقلب حزنهم لفرح عاد راضية اتصلت بمحمد راجلها لي غير سمع الخبر حالته ولات حالة وما قدرش حتى يجي يشوف جلال فهاد الأزمة ويزيد على ما بيه.. الخبر انتشر وفرحتهم اكتملت نوعا ما.. لأنه الفرحة ما تكمل إلا بعد تكملة التسع شهور في أمان ويقدرو يهزوها بين يديهم
قرب جلال وخدا ضياء وهي ففراشها فحضن حنين كله مشاعر الحمد والشكر لله سبحانه طالبين من الجليل يكمل فرحتهم بهاد البنية لي هي أول ثمرة حب ليهم
راضية: الحمد لله.. الحمد لله الله يكبرها وسط حبكم وحنانتكم يا رب
راحة عاد قدرات تجلس ترتاح وتتنفس: وهااد الخوينزة ديال خالتها بغات تحمقنا
نسرين: علاه بنت جلال وما بغيتوهاش تتدلع وتتفشش
رضا: مستحيل

الفرحة عاود رجعات للعائلتين لي متبوعين علاقتهم كانت وطيدة ولكن غير دخلات فيها النسبة الناس حاطين عليهم العين وكيتسناو تغير محبتهم لبعض للكره.. كاين شي ناس مع الأسف لي من هاد النوع كيبانو ليهم شي ناس مفاهمين كيبقاو حاضيينهم فوقاش ينوضو بيناتهم الصراعات باش يتفضحو اسرارهم الله يبعدهم من طريق أي واحد
تقلبات الغرفة من غرفة مريضة لمركز اتصالات واخبار كيطمأنو العائلة القريبة على حالة أميرة عائلة الادريسي الجديدة والكل كان وقت تلقي الخبر يا فوق الصلاية يا كيدير الدعاء يا كيقرا القرآن
اللجوء إلى الله سبحانه وقت الحاجة هو الواحد القادر على رحمة عباده وهو القادر على كل شيء سبحانه.. الطبيب هو الله والقادر على خلق المعجزات هو الله سبحانه الله يقدرنا على طاعته.. ويا ربي تشوف فينا بعين رحمتك
حسات بالخطر من التحذيرات ديال نسيم وكيفاش كتهضر وكأنها سيدة كبيرة فعلا راجلها غير كيجيه شي اتصال كيخوي ونوح زعما يكون غادي يجلس مع عايدة لا ما يمكنش شي حاجة بحال هكا.. واش هادي بغات تدخل ليها الوسواس لراسها
حركات راسها بالنفي: لا اا بنتي.. عمك من نهار تزوجت بيه وهو الخدمة ما كيهضرش فيها على الطابلة.. أما نوح راه ولدي وانا لي ربيته وعايدة راني عارفة شكون لي رباها حتى هي
نسيم قلبات عينيها: نتي تعرفي اا خالتي انا غير ما بغيتكش تبقاي على نياتك هكا وصافي.. بغيتك غير تفيقي شوية من نيتك
ما جات تجاوبها حتى هبط نوح من بيته ومشا باس لأمه جبينها هاد الأخيرة لي شافت فنسيم وعاود شافت فنوح
امه: فين غادي تبقا اا نوح اا ولدي؟
صغر عينيه على هاد السؤال الغريب عليه: غادي برا المدينة على قبل اجتماع.. علاش؟
عاود شافت فنسيم لي كتشجعها بعينيها: وعايدة غاتبقا بوحدها؟