🌹هن القوارير🌹 (في طور التنزيل )

part45

👑👑 هن القوارير 👑👑
شمس الغريب

الجزء 45:

ضياء هزات عينيها مغرغرين: غادي تسمح فالمشروع الأول ديالك حلمك الأول
ضمها ليه: ششششش حتى إلى مشا ندير واحد آخر.. وزايدون ما عندها منين تجيب الفلوس باش تشري مني
ضياء: قلتي باباها لباس عليه
جلال: وهو لباس عليه بالحق هو براسه غا يبغي نشري منها .. ما غا يعطيهاش الفلوس .. وما باغيهاش تولي شريكة معايا حيت عارفني وعارف بنته
ضياء: وعماد؟
دور راسه ليها بسرعة عنقه احمر فالبلاصة: ضغيا عقلتي على سميته
ضحكها وطلقاتها له فوجهه: غير سولتك عليه حيت هو صاحبك زعما
بقا مخنزر: ااا لالة ضربو الجايحة ما صاحبي شاااي.. استغفر الله
عضات لسانها من داخل ناوية تجيب اخرته: ما جاوبتينيش
جلال طل عليها لقاها ميتة بالضحك حمقاته عاق بيها مستمتعة بغيرته: ياااك اا ضيااء وااخاا.. عماد اا لالة دار مشروع راسه خدام عليه الله يسهل عليه

قابلها معاه: دباا اا ضياء الله يرضي عليك ما غاتقوليش ليا اش كنتي كديري تما.. انا عارف فنفسي بلي شي بلان ما هواش بالحق بغيت نعرف منك
حسات براسها مدينة له بتبرير عاودات له كلشي بلا زيادة بلا نقصان: هادشي لي كاين
جلال: المرة الأولى والآخرة اا ضياء الله يرضي عليك.. اليوم شديت اعصابي غير بزز
حركات ليه راسها وشافت فالوقت: خاص نمشي
عيبها حيت قالتها بحال شي بنية: خاااص نمشي.. يالاه زيدي

طلعو للطموبيل وجنب لي ميني طاكسي وقف باش تمشي فطاكسي احسن هاد الوقت كيكونو الناس ديال الحومة كلشي خارج يقدر يشوفهم أي واحد فالشارع هو ما سوقوش بالحق راحتها أهم له من أي شيئ ثاني
جلال متكي راسه اللور: ضياااء (شافت فيه) الله يرضي عليك راه صافي براك عييت هذا الله معاك وليت تابعك كل صباح نوصلك حتى للصونطر ونرجعك حتى توصلي كنشبع فيك من البعيد وما كنشبعش منك راه صعيب عليا الحال راعي ليا شوية
بقات كتشوف فيه مصدومة واش لي فهمات صحيح وفعلا شحال من مرة كتبان لها بحال الطموبيل دياله من وراها ولا بيناتهم طموبيل وكتقول غير تشابه

جلال مكمل: أنا باغي انا لي نفيقك بطريقتي.. نوصلك لقرايتك بطريقتي ونرجعك نبوسك فالشارع وما سوق حد فيا باغي حقي فيك بالحق بالحلال ونتي مصعباها عليا أكثر من القياس.. ارحمي من في الأرض يرحمك من في السماء

جاب لها الضحكة هربات نازلة كتفرنس وتبعها هابط ركبات فالطاكسي لي فيه النوبة مد ليه جلال 100 درهم وقالو فين يوصلها حتى لباب الدار خلاه غا يطير بالفرحة يوصلها حتى للقمر بديك الفرحة الطاكسي غادي وهو من وراه وهي دايرة كتشوف فيه مبتاسم لها ما عيات ما ملات حتى قربو للحومة عاد قلب الدورة من بعد ما حرك لها يديه ببسلامة خلالها الفراشات كيلعبو فكرشها
اليوم الموالي هي غادية ورادة البال مع الطموبيل لي من وراها ولكن بعيدة كتقول هو ماشي هو حبسات بلعاني ودارت السينيال ودارت براسها كتقلب داخل الطموبيل وقف من وراها وهبط جاي عندها مخلوع حلات الباب وهبطات عنده طلعها وهبطها كيشمر بنيفه باينة عليه مريض شعره هابط على عينيه وحناكه حومر عينيه ذابلين خارج بكيطمة ديال الدار
تخلعات عينيها تحلو وحطات يديها على حنوكه طايب شداتها الخلعة على حالته: مااالك اا جلال ياك عاد البارح كنتي بخير
حرك لها راسه: راني بخير.. راه غير البارح ملي رجعت دوشت ونسيت وخدمت شوفاج فالبيت حتى سخنت مزيان وخرجت البالكون كنهضر فالتيلي فالبلاصة حسيت براسي ماشي هو هداك
كتقلب فيه من هنا ومن لهيه شدات يديه بين يديها: علاش جيتي اليوم
ضحك: خفت نولي سبب فشي حاجة اخرى
ضحكها واخا عينيها كيلمعو خوفانة عليه ولمسات الحب دياله ليها مريض وحالته وكيفكر فيها بقات كتشوف فيه حتى عيات وتبسمات ليه بحنان