🌹هن القوارير🌹 (في طور التنزيل )

part96

👑👑 هن القوارير 👑👑
شمس الغريب

الجزء 96:

مشا للغرفة وسرح داك الشرطي وجلس كيتسناها تفيق وعينيه عليها ضغيا كتسخف وتهنى مع رساتها بقا فيه الحال عليها وحس انه مدين ليها باعتذار ومنها نيت ياخد لاكارط دياله.. بدأت كتحل عينيها بتثاقل لقات راسها فغرفة كيصحاب ليها واش داها نعاس ناضت قافزة غير بان ليها هرب منها اللون
الممرضة: والله والله ما درت شي حاجة.. انا بصح لقيت لاكارط شفتها فاش طاحت منك بالحق ماشي شفرتها انا ما عرفتش كيفاش نوصلها ليك والله
قاطعها كيحاول يهديها غير بيديه: مفهوم مفهوووم.. انا كنعتاذر منك
باقي باغيا تبرر بلي مشات لدارهم ورجعات جوج ديال المرات وما لقاتوش وهو ما كيحملش الهضرة بزاف اضطر انه يسمع كلامها من الاول للآخر لأنه غالط فحقها

تسناها خليفة حتى كملات: ممكن ناخد لاكارط دبا
هزات فيه عينيها بحال القطيطة وبكل براءة حركات راسها: لااا
خرج عينيه من برودتها: كيفاش لا وااش حماقيتي
عاود خرجاتو على السيطرة وهي المتضررة الوحيدة بدات كترعد: أنا ما جبتهاش معايا حيت قالو ليا كاين خصص فالممرضين هاد الليلة وما فكرت فحتى حاجة اخرى من غير المرضى ما هزيتش حتى التيلي ديالي
قرب منها بحال شي حنش: فين خليتي لا كارط؟ واش عارفة الأهمية ديالها ولا لا
الممرضة: أنا ما عارفاش ديالاش والله.. هي راه فبيتي فالدار غدا نجيبها ليك والله غير بعاااد الله يخليك

كان قريب منها بزاف ودراوعه مكاليها بيهم لدرجة قادر يقرى الخوف فعينيها اتجاهه هز يديه بغا يبعد راه طيرها منها اليوم غا يركب فيها بوصفير حتى شهقات ملي عطاها بالظهر خلاته يتلفت بخوف عليها ياكما وقعات لها شي حاجة
بحدة: مالكي ؟
الممرضة شيرات ليه لكتفه: كينزف.. خاص نشوووف
وقفات كتكابر من الدوخة وهو مبعد كيشوفها اش باغيا تصنع: بلاش عليك انا غادي نتكلف غير ارتاحي
حركات راسها: لا لا انا بخير.. راه جرح غارق خليني نشوف
كانت مصرة انها تعاين الجرح دياله وهو ما باغيش لأنه عادي ماشي شي حاجة فاش كانو فالغابة مع زين ضربوه أغصان واحد الشجر مشوك هو لي دار ليه جروح ولكن هي راه جبدات معداتها وتوجهات جنب السرير حتى جا بزز منه ملبي طلبها
دقائق طرطقات عينيها مصعوق

نوح قرب منها بسرعة ما جات فين تستوعب تهرب حتى شدها: دبا انا نسولك.. تجاوبيني بسؤال ممم؟
عايدة بثقة فالنفس: علاش اصلا غادي نجاوبك؟ ممم علاش نقولك على حياتي؟ علاش انا عارفة كلشي على حياتك ؟
ما فهمش لفين باغيا توصل موالفة كتحبس حد حياتها علاش هاد المرة تسائلت على حياته ما فهمش لاش كتلمح رغم أنه عارف ديك الجملة ما تقالتش غير هكاك قاطعهم صوت التيلي دياله غير شاف الاسم هزو وخرج للبالكون وسد عليه شكات واش نيكول ومشات للنافذة كتسرق السمع بالحق ما قشبلات والو

عماد هو لي كان على الخط: نوح اا خويا السكيريتي خبرني بلي عايدة خرجات ومزال ما رجعاتش تشوشت داكشي باش عيطت فهاد الوقت غير سمح ليا
نوح: لا ما تشغلش بالك هي بخير عيني عليها واخا تبعد
عماد: واش هي حداك؟
نوح: ممم بالحق صبري قرب ينفذ معها
عماد بتساؤل: ياكما خالقة ليك شي مشكل مع مراتك اا صاحبي؟ أنا بغيتها غير تكمل حصص الطب النفسي مع جون ونجي نرجعها
نوح: لا لا ماشي داكشي.. هي المشكل عندها معايا مدوزاني فاختبار تحت الضغط
عماد: نوووح ما تغلطش اا صااحبي هي اختي اه.. ولكن هي لي رفضاتك فالأول ما تهزش ذنب ديك المرأة عندك
نوح: المهم ما تخافش وصافي

كان عايق بيها كتصنط داكشي باش كان كيهضر بالالغاز حتى هو دخل وهي بعدات ظنات انه كان كيهضر على نيكول مع شي حد من أقاربها
عايدة: بغيت نمشي للدار !!
نوح ببرود: ديك الساعة بقاي فيها علاش خارجة فداك الوقت وغادية لديك البلاصة
بدات كدور فعينيها حتى بان ليها التيلي ديالها كيصوني باسم نيفين صرطات ريقها وهو كيشوف فيها كيتسناها تجاوب
نوح بشك: جاوبي
شافت فالتيلي ديالها وهزاتو كتوريه ليه: هذا التيلي ديالي نجاوب لي بغيت وقتما بغيت.. ما كيفرض عليا حتى واحد نجاوب
بان ليها جاي صاعر قاتله الشك قطعات الخط بكل برودة وطفات التيلي بسرعة البرق

نوح: واش كتقلبي على شي قتلة ديال العصا؟ شكون عيط عليك؟
عايدة بنظرات ثاقبة: واش مرااااتك ما كتراقبهاش فاتصالاتها.. ربما حتى هي كتتاصل بعباد الله بلا خبارك.. وهادشي خطر عليك كتكونو فشي نقاش مشوق كدوز هي المكالمة ما لاحظتيش المهم انا علمتك
ضربات لنوح فراسه طن وبقا كيشوف فيها كيحلل كلامها
حيد التيشورت ونشر عليها بادرو لي ما كانتش ضاربة ليهم الحساب حسات بالصهدة طلعات معها بعدات كتصوط على راسها.. عمرها ظنات انها غادي تقابل شي واحد بهاد العظمة فكات شعرها وعاود جمعاتو وهو عاقد حواجبه مستغرب من حالها وخدودها لي توردو ونيفها لي ولا بحال شي حبة فراولة

خليفة: مالكي؟
هزات فيه عينيها المشفرين الخوضر: أنا (شيرات لراسها) لا وااالو.. حممم انا نشوف الجروووح
قربات ببطء بحال الى غا تقيس السبع حطات يديها سخان على بشرته الباردة هزات باش تعقم ليه الجروح عينيها نزلات عليهم الضبابة وهي كتقيس بشرته البرونزية القاصحة وكتعقم دوك الجروح وهي تالفة.. أما هو غير حطات صباعها السخان من الاول حس بحال الى ضربو الضوء لصقو لكن بقا ثابت كيكذب شعوره
بعدات يديها كأنها تدفعات ملي كملات صرطات ريقها وتنهدت كأنها كانت هازة الجبال

الممرضة: صافي كملت
وقف أمامها باغي يلبس التيشورت دياله ومنعاته: لا لا أراه ليا انا غادي نقرط هاديك البلاصة باش ما يبقاش يبان داك الدم
ما خلاتوش يمتنع جرات التيشورت ودخلات للحمام كاين الصابون تما ديال اليدين قضات بيه الغرض غسلات غير البلاصة لي فيها الدم وبدات كتنشف فيها فديال اليدين والباب ديال الحمام مفتوح مخلياه متبع حركاتها كتبان بنت عفوية ولي عرف عليها من خلال المدة القصيرة انها خوافة وعندها فوبيا من الشرطة وكل المتعلقات بيهم

خرجات عنده كتقلب فالتيشورت بين يديها: ما نشفش مزيااان بالحق راه تقدر تلبسو
مداتو ليه لبسو وهي كتقلب فعينيها ضيعو عليها نعاسها ما كاين لا حالات لا والو كون خلاوها حتى للصباح وتجيب ليهم لا كارط ديالهم بالحق فين هو الفم لي يقول هاد الهضرة كتقولها غير فخاطرها

طل خليفة بان ليه الحال مزال مظلم بالحق الفجر قرب: فاش كتمشي لداركم؟
الممرضة: جيت بالطموبيل ديال بابا
خليفة: ما تقدريش تمشي دبا وانا من وراك طلعي لداركم ورمي ليا لا كارط
حركات راسها: لا ما نقدرش
دعك جبينه خليفة بنفاذ صبر واش كتختابر صبره ولا كيفاش: واش باغيا تهبليني؟
الممرضة: لا لا دبا انا البيت ديالي الشرجم دياله كيطل على لا كور ما عندي كيف ندير
هز يديه المجروحة بفقصة: ما كاين شرجم فصالون فكوزينة والو.. كلشي كيطل على البالكون
تبسمت باحراج من كلاخها: لا كاااين.. سمح ليا.. بالحق ما تبقاش تحرك يديك بعشوائية إلى سمحتي

             💣💣💣💣💣 توقاعتكم وآرائكم 💣💣💣💣💣

ربي عطيوني آخر ظن ديالكم.. شكون هي الممرضة؟