🌹هن القوارير🌹 (في طور التنزيل )

part20

👑👑 هن القوارير 👑👑
شمس الغريب

الجزء 42:

هز التيلي بان ليه اسم عمر: الو السلام عليكم
عمر: يا أخي كيف حالك ياك لباس قالت ليا ريحانة اليوم ما جيتيش
ع.الخالق: لقات فاش تمشي بعدا
عمر: ماشي مهم قلبات على طاكسي واخا ما وصلاتش فالوقت ولكن حيت أول مرة سمحولها.. واش هادشي لي كيدور فالقنات بالصح ولا
ع.الخالق: أنا نجي ونجلسو فشي قهوة

داكشي لي دار هبط عيان للقهوة لي قريبة لعمر هارب من جيرانه قد ما بعد قدما كان احسن ليه لقا عمر فانتظاره دخل هو وياه طلبو براد ديال اتاي وجلسو
عمر بدا الكلام: أنا فاهمك هي لي أنانية انا متأكد بلي غادي تكون عطيتيها كلشي ورفضات حيت العيالات هما هادو.. وتأكد غاتكون ما كتبغيكش كون كانت كتبغيك غاتقبل واخا غاتجيها صعيبة فالأول بحال مراتي ولكن سايست معها حتى هي ولات كتقول ليا ما تظلمش الثانية
ع.الخالق: قلت ليها نكتب ليك الدار والطموبيل حتى هي
عمر: أنانية هاد السيدة وسمح ليا بغاتك تبقى بلا أولاد
ع.الخالق: شدات ف مسألة أننا نمشيو للطبيب وانا من خوفي عليها تصدم وانا متأكد 75% بلي ما كتولدش ما بغيتش
عمر: باش انت متاكد؟
ع.الخالق: الطبيب لي مشيت ليه قلت له بلي عندها اختها ما كتولدش وقالت ليا الواليدة بلي أمها حتى هي ما ولداتش بكري قال ليا الطبيب يقدر يكون وراثي شي حاجة فالجنات هكا قال
عمر: خيرها ف غيرها
ع.الخالق بغا يفتح معه الموضوع: الصراحة راني كنقلب على شي امرأة صالحة مراتي راه ما نكدبش كانت ونعم الزوجة ولكن حتى حال ما كيدوم وانا بانت ليا الاخت ديالك
باقي ما كملش نطق هو: ريحاااانة هاديك راه بحال شي أمانة ما منهاش جوج احسن وحدة ف خواتاتي وشفتي لوكان هي ما تولدش هي تنوض تزوجك

بحال الى قاليه غير اجي خطب راه حنا موافقين: إلى جبت عائلتي ملي ينفك هاد المشكل واش عائلتك يقبلو
عمر: الله اودي انت اصلا عزيز عند الواليد والواليدة مرحبا بيك

هكا كمل حوارهم ناض وهو ما كيحسش بالفرحة قال مع راسه عادي حتى ضياء راه ما حس بوالو حتى تعاشر هو وياها عاد بغاها يعني من بعد الزواج راه عاد يجيو المشاعر مشا لدارو نيشان كيتسنى شي خبر من المحامي لي قاليه يزرب ليه الأوراق والمحاكمة قد ما قدر وحتى هو طلبهم ليه صحاح إلى بغا هادشي

مر أسبوع عليهم ضياء هي وعائلتها كيوجدو للسبوع رحيمة ما بقا لها والو وتحط لهم المولود وكيخطفو معاهم حتى لراحة لي ضريب الصداق ديالها بقا له غير شهر والعرس أربع شهور يعني مدروكين لحسن حظهم بداو من بكري ضياء هي لي تكلفات بالحلوى والسفوف ديال السبوع لانها كتفنن فيهم كطلع للسطح لي فيه كوزينة وكتجلس معها يا نجاة يا نعمة باش يقابلو لها الفران أما راحة كيعطيوها شي حاجة بسيطة حتى هي تابعاها العرس خاص تبقى مضوية

كانت فالسطح كما عادتها تعاشات العشية واليوم كانت عندها البهلة وهي كتبغي الخاطر وما كتبغيش كثرة اليدين والعينين طيباتها غير فالدار ظهرها كان غادي يتقسم حتى دخل عندها شرف لقاها يالاه غادي تهبط
شرف: الزين ديال العائلة (مد يديه حل السطل خدا حبة) الله على يديك كيخرجو الشهد
ضياء بفرحة حتى هي كيعجبها لي يمدح طيابها وحتى هادشي كان عازو فيها: بصح كيف جات لذيذة!!!
حرك ليها راسه: ماشي غير لذيذة شي حاجة أكثر نتي طيابك اصلا عمري كليت بحاله غير الشلاظة كديريها مختالفة عليهم كلهم
عنقاته كيف فرحها ها هما غير كليمات بساط خلاوها أسعد وحدة فوق الأرض مالو هو كان زيزون لا كان غير لبق

شرف: نسيتيني فاش كنت باغي نقولك
حركات له راسها باغيا تهز السطولة حتى هزهم عليها: ياك لباس
شرف: لا والو باس المحامي ديال داك الشماتة راه دار شي حاجة مزيانة راه اول جلسة غادي تكون الاثنين الجاي يعني من هنا ل سيمانة
فرحات: وو ممكن اا خويا نطلق غير فيها نيت
هابطين فالدروج: راه هضر أحمد مع المحامي دياله باش بلا ما يطول داكشي قاليه ملي هما متافقين راه ما غايطولش وقال ليا أحمد راه المحامي دياله قال هاك ولكن القاضي ملي غادي يشوف بعينيه هو غادي يطلقك أسرع من الخيال عاد قالك إلى واحد القاضية هي لي خدات الملف ديالكم هي عندها غير الشن طن وما كتبغيش العيالات يتظلمو قالك غاتخبطو
ضياء: وسي أحمد ما قالش للمحامي دياله على داكشي لي عطيناه ولي قلنا له
شرف حرك لها راسه بسرعة: االااا مالك حمقة

هبطو لتحت شافهم حكم وبانو ليه السطولة عند شرف ناض عنق ضياء: شكرا اا ختي الغزالة واخا قلت ليك بلا ما تعذبي نشري كلشي
غوبشات: واا لا انا فرحانة ندير هادشي حرام عليك وزايدون هذا غادي يكون الكادو ديال ولد خويا الغزال
رحيمة: نتي لي غادي تسميه انشاء الله
خرجات عينيها بفرحة وكلشي فرح لفرحتها لي بانت عليها كبيرة: أنا غادي نسميه ** هارون **
عبد الله: لا اله الا الله عليها هاا نتي اا بنتي رحيمة سميته هارووون
غير قالها طلقات رحيمة غوتة تفيق الموتة: ااااااااااااااااع علاش عيطتي عليه اا بابا وااااكواااك الله اا ربي ...

                💣💣💣💣💣 توقاعتكم وآرائكم 💣💣💣💣💣

سمع سميته وجا كيجري مزرووب