🌹هن القوارير🌹 (في طور التنزيل )

part74

👑👑 هن القوارير 👑👑
شمس الغريب

الجزء 74:

غير عيط عليه العساس استاذن منها كأنه عرف بلي القضية فيها ديك الكارثة وضياء ماشي فحالة أنها تسمع أو تشوف ديك الخليقة خايف عليها وعلى البيبي أكثر من أي حاجة فوق الأرض هاد الساعة

جلال: نعام اا سي جبران
العساس: اا سي جلال غير واحد خيتي كتجي تبقا تحضي هنا الدخلة واليوم زادت فيه.. غير شافتكم دخلتو غبرات شوية .......
عاود ليه كلشي وجلال كيسمع مغدد: كيف دايرة؟
العساس: دايرة فحال موكة غير هي صفريطة
باقي كيهضر معاه وقفات نفس السيدة لي كانت معها هناء وسولاتها وجهها أصفر وخايفة على خدمتها من بعد المصيبة لي دارت ونيتها لي خرجات عليها وضعفها والفقر كلشي تجمع عليها وخايفة لا توقع شي حاجة وتكون هي السبب ودوك الناس مزيانين داكشي باش جات كتجري لقات العساس يالاه قطع دار لقاها فوجهه

العساس مصغر عينيه: اا مالكي؟
السيدة: واحد السيدة سولاتني ..... (عاودات ليه الحوار كله) بالحق راك عارف باينة ما ساكناش هنا حيت دوك البرطمات لي قالت هي ياك مولاتهم هي لالة فضيلة وبناتها دوك 4 البرطمات.. ويالاه مشاو البارح والديور خاويين
العساس الدنيا مشات وجات بيه: كيف دايرة هاد خيتي واش لابسة؟
قالت ليه لي كاين وطارت هي وياه وعساس آخر وعيط على لي مقابل الكاميرات يشوف واش طلعات وفين حيت هما ما عندهمش كاميرات فابواب البرطمات حدهم الأماكن المشتركة الكاميرة شداتها آخر مرة فالعمارة 6 نيت طالعة فلاسانسور

العساس كيصوني على جلال لي كان هبط كيدور يشوف ياكما دخلات من شي قنت وخلى تيلي فالدار بالسيلونص باش ما يبرزطش ضياء لي تكات ترتاح شوية ملي ما جاوبهمش تزادتهم خلعة فوق الثانية واحد طلع فالمصعد والثاني فالدروج والسيدة مسكينة كدور فكل ايطاج تشوف ياكما مخبية فشي قنت وكتبكي

وصل لي طالع فالمصعد وتصدم لحق عليه الثاني وبقا مبلق حتى هو عاد لحقات عليهم السيدة كتنهج بقات كتشوف شي كيشوف فشي كيحاولو يفهمو حتى تحل المصعد وخرج جلال حتى هو ماشي قل منهم
غير فاتتها ضرباتها بجرية ما وقفات غير فالمصعد طلعات ونيشان للطابق الثالث خرجات وبان ليها الباب لي جا فالشوكة وعريض شاد مساحة كبيرة تبسمات بشر وقربات بسرعة للباب جبدات داك الويل وواحد الورقة فين كاتبة اش خاص تقول كترش وتهضر على الباب وفداك الكولوار لي عازل دارهم بوحدها حيت 2 ديور آخرين جاو بوحدهم فالجهة المقابلة رشات داك الماء شوية جبدات واحد الغبرة حتى هي مسحات بيها جميع القنات كدمدم بداك الكلام لي فيه غير الشياطين وكبار الجن بحالها وبسرعة فائقة جمعات داكشي وكل مرة طيح ليها حاجة حتى طاحت ليها ديك اللعبة فين كان الماء وكانت بحال داك الكاس ديال الألومنيوم تسمع صوته فداك الصمت غير هو كيتقرقب هزاته بالزربة وطلعات فالمصعد وهي كتسمع الأبواب كيتحلو وركات على -1 لكاف