🌹هن القوارير🌹 (في طور التنزيل )

part18

👑👑 هن القوارير 👑👑
شمس الغريب

الجزء 18:

تاجة حيدات زيف حياتي لي كانت عاكسة به ولاحته عامر بشعرها الشايب المنتوف رامياه عند رجلين عبد الخالق لي غير كيشوف تقول وأكل مخ الضبع
تاجة: علاش مالها لي طيح بكلامك وتخرج من الدار وهي لي تبغي طلب الطلاق وانت لي صابر على وحدة عاقرة
مرات خوه: اييه والله يا خيي غير طلقها من غدا نجيب ليك عروسة خير منها فكلشي
نقزات مرات لوسها عارفاها كضرب على اختها: علاه مالك لي نتي تجيبيها ليه انا لي ساكنة معاهم وعارفة خالتي تاجة والبنات اش يبغيو فمرات خوهم
سكتاتهم أخته الشالوطية لي ساكنة جنب الوزين: لا نتي لا هي اصلا خووويا لاقي المرأة لي تليق ليه

صدماتهم بجوجات وما ظنوش يكون كيخون ضياء وكون عرفوه غادي يجيب ليهم وحدة برانية كون شدو فضياء بيديهم وسنانهم وحتى هما ما كانوش من العاجزين غير غفلو عليهم كل وحدة شدات جيه ونشرو الهضرة فالدرب عبد الخالق لي كان يبان غادي غير مع الظل صدق كان كيخون ضياء لي حابس فالدار الخروج والدخول بالشوار وهو عايشها بالطول وبالعرض
ما جا فين يخرج عبد الخالق من الدار لقا راسه حديث كل لسان ومسكة ففام النسا والرجال ما بقا مشا من دارهم رجع وهو ما فاهمش شكون خرج الكلام

صابرين: ما يكونو غير دوك جوجات ملي ما بغيناش نزيدو من تريكاتهم خرجو ديعوها
أخته الاخرى: الله يديع ليهم القمل بين جلدة والعضم
تاجة: حتى حاجة ما كتخبى وها انت شوف هي راه بينات راسها كبيرة وسط الحومة وصغرات بك خالتك راه ساكنة جنبهم قالك مدخلينها بالعز وجيران يهضرو فيك انت بالخايب اييوة سمعتي علم الله اش كيقولو عليك لجيرانهم القراب حتى انت يصبح لتنين انت لي تسبق الدعوى للمحكااامة قبل لا ديرها وطالبك بشي حاجة ما تديش منك الفرنك اا ولدي راك راجل ونمشيو نخطبو البنت وغير يديرو معنا الواجب نعلق العلام بوووه فالسطح ما ينزل حتى تقول ليا عروستي حاملة

ضحكو كلهم بافتخار بامهم وكلهم جلسو كيقررو اش يديرو لهاد العروسة ماشي على زينها ولا زهرها المقاد لا غير باش يفقصو ضياء وعائلتها لي ما سمعو منهم حتى كلمة لا زوينة لا خايبة دايرين ليهم جواب السفيه ومخليينهم غايموتو بالفقصة

أما عريساتهم تقرصو من تصرفاتهم كيعاملوهم برانيين عليهم وفينما ولاو يخرجو كيسمعو غير بنات لالة فاطمة وعريساتها ما تعزلي البنت من العروسة كيف الخواتات عايدات كلشي يديروه مجموعات عاد كملو عليهم ملي بانت ليهم راحة كتقضى هي ونجاة ونعمة وشي مرات إلى كانت قريبة كتمشي هي ورحيمة كيقارنو راسهم بهم كتزيد تشعل معهم العافية داكشي علاش كانو كيتعاملو مع ضياء خايب لانها هي على الأقل عندها عائلتها كيعاملوها كيف الما القليل أما هما الشحط من نسابهم والى مشاو يبكيو على عائلاتهم كيلقاو عيالات خوتهم ليهم بالمرصاد 

مر داك اليوم والأحد حتى هو وأصبح صباح الاثنين فاقت بكري كما دارت مع خوتها لبسات عليها سروال دجين أزرق دروة مع شوميز قصيرة بيضاء فوق منهم لبسات مونطو اسود طويل قادات زيفها بطريقة زوينة واحترافية هزات صاكها الأسود مع بوط فنفس اللون طالع شوية ونزلات لقات حكم كيفطر ورحيمة بكريشتها كتحط لي بقا

ضياء خزرات فيها: شي نهار تولدي فالدروج
رحيمة: ماما راه ولداتني حدا الفران غادية قالت ليك طيب البهلة للسبوع
حكم هز فيها عينيه غامزها: حولك خرجتي مبوهلة
ضرباتو لكتفه بغنج: ما كاين المبوهل قدك
سلمات عليهم ضياء: حولك كنتي غاتهبلي لينا السيد غير خدم قال ل ماما يا هي يا الموت
جلسو كيفطرو وموضوع عبد الخالق ما بقاش تجبد من غير ضياء لي قالت للبنات ملي ناخد طلاقي نعاود ليكم لي بغيتو فطرات هي وحكم وكل شوية يهبط شي حد من الفوق حتى تجمعو عاد تحل باب للدار
حكم شاف ف ضياء: يكون غير شرف.. صافي موجودة
حركات راسها وناضت تعاود تلبس صباطها وتغسل يديها وسنانها حتى دخل شرف امتنع على الفطور لأنه عاد فطر
شرف: قالت لكم نجاة ما طيبوش الغدا غا تجيب البسطيلة ديال الحوت قالت رحيمة تشهاتها
شافت فيها راحة: علاه الوحم كيبقى تاال التاسع؟!؟!
فاطمة ضحكات: خليها يا ختي مالك حسدتيها ولا بغيتيها نحيبوها تاللخر وتحكها لنا فالوليد

خرجات هي وخوتها والوجهة لعند المحامي لي كيتصرفو معاه عائلتها ولي كيشد لهم أي قضية خاصة بهم وهو من عائلة الاب ديالهم كان رجل اربعيني والمكتب دياله كان قريب نيت من المحكمة خبراته الكاتبة لأنه علمها من قبل بلي غادي يجيو
وقف فاستقبالهم: مرحبا مرحبا بولاد سي عبد الله تفضلو
شرف: جزاك الله خير اا سي أحمد
عاود ليه شرف كلشي ما نسا حتى شي حاجة: وهذا ما كان اا سي أحمد
احمد: ونتي اا بنتي بغيتي شي حاجة من هاد الراجل
حركات راسها: بغيت غير الطلاق صافي ما بغيت منه والو
حرك راسه وخوتها مايدينها هي عارفة بلي هكا غادي تزيد تمرضهم فحياتهم قلبهم عامر من جهتها وغاينوضو يبغيو يجيبو احسن محامي باش ما تديش الفرنك باغيا هي تصدمهم ملي يلقاو بلي راسها خاوي من داكشي باش معمرينو بغات تبين ليهم بلي دائما كانت تربيتها وتفكيرها واخلاقها كلشي بعيد عليهم وبلي ما اثروش عليها بلي بقات نفس البنت لي جاو طلبو وغا تخرج من حياتهم نفس البنت

المحامي قيد كلشي لي قالت ليه وبدا كيقاد لها الضوصيي حتى نقز شرف: الله يخليك اا سي أحمد ما تدفعش الضوصي حتى نقول لك
احمد: كون هاني التيلي بيناتنا وانا كنعرف شي ناس يوقفو معنا غادي تاخد طلاقها بأسرع وقت بنتنا ما يمكنش تبقى مع بحال هاد الشخص
حكم: فالجلسة الأولى غايتفضى كلشي انت اا سي أحمد غير خليه حتى يبين عيبه كامل عاد جبد ليه لي يلجم