🌹هن القوارير🌹 (في طور التنزيل )

part5

👑👑 هن القوارير 👑👑
شمس الغريب

الجزء 5:
ما قدرش يجبد هاد الموضوع خصوصا وأنه هو لي سدو قبل ما يخرج وفنفس الوقت هو ما متاكدش من القرار لي خاص يتاخد وخايف من ردة فعلها خصوصا وأنه ما يقدرش يستغنى عليها ولا يبدلها بوحدة أخرى وهي كاملة الأوصاف

ف صباح اليوم الموالي كان غادي للخدمة كما العادة حتى كيبان ليه نفس الشخص عمر بملابسه المعتادة ديال الإخوان ورفقته شابة غير منقبة الشيء لي خلاه يهبط عينيه لأنه عارف زوجة عمر الأولى منقبة قال مع راسه يمكن الثانية غير منقبة كانت عادي لابسة خمار ماشي نقاب يعني وجهها باين ما حققش فيها اصلا
وقف الطموبيل وألقى التحية: صباح الخير سي عمر ياك لباس؟
تبسم ليه عمر أما الشابة لي معاه رجعات اللور بخطوات قليلة: وعليكم السلام ورحمة الله وبركاته ااا صاحبي غير تعكسات ليا السيارة ولقيتيني كنقلب على طاكسي نوصل الاخت ديالي لكلية الشريعة الإسلامية
عبد الخالق حيد الصاك دياله من الكرسي لي جنبه ورده وراه: واا طلع اا صاحبي نوصلكم اصلا طريقي هاديك
داكشي لي دار عمر عارف المسافة طويلة وما غاديش يلقا طاكسي فهاد الصباح حل ل أخته الباب طلعات فالخلف وهو ركب جنبه كيتعاودو
عمر: اا خويا ديك الكلية بعيدة ولكن ما عندها ما دير تقبلات فالماستر هنا وأبي بغاها تكمل قرايتها
ع.الخالق: ما فيها عيب غير هي غادي تكرفص مع الطرونسبور
عمر: كاااينة وما عندهاش حتى رخصة السياقة أما نبقا نخلي ليها الطموبيل ديالي قلنا نشوفو السكن الجامعي لي تما ولكن خاطري ما غاديش يتهنى من جهتها
ع.الخالق: ايوة الله يدير شي تاويل ديال الخير
الطريق كلها وهما بجوج كيهضرو وهي اللور كتقرى الأذكار ما شافت فيهم ما دخلات فحوارهم اصلا حتى هما واخا كانو كيهضرو على تعليمها ما كانوش حاسبينها واش كاينة فالاصل عمر خوها كيشكر فيها ويمدح فاخلاقها وع.الخالق كيسمع ليه ويتدخل فشي حاجة ديال القراية وصافي حتى وصلهم بحكم طريقه هاديك كيفوت البلاصة فين مجموعين الكليات والمدارس العليا عاد كيدخل للحي الصناعي فين كاين الوزين لي خدام فيه

دخلات وتقيدات حطات وراقيها وتوجهات هي والأخ ديالها لفين كاين السكن الجامعي لي قريب غير تما نيت وباين على عمر ما عاجبوش الحال الاختلاط وكاين شي أشكال ونماذج لي خلاوه يرفض قطعا باش أخته تبقى هنا رغم محاولاتها باش تقنعو بلي راه لي محترم نفسه راه ما كيقيسو والو وبلي راه كما كين هاد النماذج كاين العكس ديالهم تماما كاين ناس مزيانين هامها غير قرايتها وهدفها فالحياة ولكن والو السيد مصمم
عمر: أنا نقلب على شي طاكسي نديرو ليه الشهرية يبقا يديك ويجيبك ونتي قلبي معك على شي بنات لي يعمرو معك الطاكسي ومرة مرة نبقا نجيبك انا المهم هنا لا مستحيل اا أنا نخليك هنا وأبي اصلا ما يرضاش عليك تكوني هنا
بقا كيفكر وكيردد: أنا نلقا الحل غير بلاتي صبري عليا انا نلقا الحل ...

أما ضياء ماشي غير مشا راجلها رجعات تنعس لا ناضت كما العادة تهبش هنا وهنا حتى جمعات الدنيا ورجعات ديك الدار كيف المراية كيف النملة الشغالة تجري هنا وهنا غير باش تحارب الملل ولكن الشقا تقاضى والملل ما بغاش دخلات للبيت جبدات البلاكار كامل وبدات كتعاود ليه الترتيب من أول وجديد حتى سمعات التيلي ديالها كيصوني واتساب مشات ليه بشوية عارفة غايكونو غير عائلتها وفعلا لقات راحة اختها
ضياء بملل: الو راحة ما تجيش تجلسي معايا شي سيمانة ملييييت اا ختي
طلقات راحة ضحكة رنانة كما العادة: لا نتي اا ختي لي خاص تجي واحد السيمانة تجمعي معنا القنات وتوجدي معنا الحلوى واصلا حتى انا اا ختي ما بقيتش ديال راسي ولا عندي لي يحكمني
ضياء فهمات وما فهمات: اش كتخرفي عليا ثاني ياك نتي قلتي لا ما بغيتش نتزوج دبا
راحة: ولكن قلت ليكم نتوما خواتاتي تاوع قلبي إلى جا معاذ غادي نقبل
ضياء خرجات عينيها ووقفات بفرحة: حللللفي دبا معاذ معاااذ ولد خالتي راضية جا يخطب فيك
راحة ضربات جنابها بالفقصة: ااه اا ختي دوزنا الخطبة ودرت العقد وحشمت قلت راه عندي واحد ختي حاطينها ديكور حشومة نقول لها تجي تحضر للعرس
سكتات ضياء كتسناها تكمل ضحكها الباسل: اا ختي زوينة اا ضياااءتي راه غير عمي هضر مع بابا وقال ليه نهاية هاد الاسبوع غادي يجيو وبما أننا اليوم الثلاثاء قلت نعلمكم بكري باش تعاونونا إلى قديتو
ضياء جلسات براحة على السرير: والله الى فرحت ليك على الأقل وحدة مننا تزوج عن حب وتحقق أحلامها
راحة: واا حتى نتي راه عبد الخالق ضريف ووالله وتقول ليه باغيه تكملي قرايتك ما يعزها فيك غير نتي حشومية
ضياء خلات جرحها ليها ما كتعاودش جل مشاكلها مع راجلها لعائلتها خصوصا المسائل لي عارفاها غادي تأثر عليهم وتخليهم يندمو راسهم وهي عارفة بلي عائلتها ما يبغيوش لي تقلق بنتهم داكشي علاش كتخلي همومها ليها
ضياء: يدير الله خير غير يجي عبد الخالق نقولها ليه ونرجع عليك بلي كاين
قطعات مع اختها ورجع ليها الحماس والفرحة فرحانة ل فرحة اختها وما كرهاتش طير وتمشي لدارهم عارفاهم غادي يتجمعو اليوم وغادي يشدو ف راحة وهي الوحيدة لي ما غاديش تكون وهادشي كيوجعها فخاطرها كتشوف كيفاش اختها نعمة راجلها وعائلته كيتعاملو معها مزيان وشي مرات كتقول يمكن حيت قبلات ب امجيد واخا عقيم عاد كتلعن الشيطان لي كيوسوس ليها وكتقول كل واحد وكيفاش كبر