🌹هن القوارير🌹 (في طور التنزيل )

part100

👑👑 هن القوارير 👑👑
شمس الغريب

الجزء 100:

ضياء شادة كأس من الحليب سخون مع الشوكولا: اييوة !!
زهور: ماماك قالت ليا ملي تقرري آخر قرار قولي ليا وانا نتكلف بالباقي
ضياء تبسمات بارتياح: شفتي ملي قالت لك ماما هي تتكلف صافي غير نوضي على سلامتك.. مبارك ومسعود
زهور هزات حاجبها: وجيلالي والعربي حتى هما.. وشكون قالك انا قررت اا ختي
طلقاتها ضياء بضحكة من القلب خلات جلال يبتسم لي كان فالبيت خدام غير كضحك ولا يحس بفرحتها قلبه كيفرفر عليه
ضياء: الله يعطيك الخير اا خالتي زهور وخلاص.. واخا نتي باغيا ديري فيها عزة نفسي وداكشي.. عيونك عندهم رأي آخر فاضحييييينك
هزاتها بقرصة: ما كاين لي فاضحني ومشوهني قدك (تنهدت) أنا باغيا نعرف قصته وكلشي عليه بان ليا مهموم أكثر مني

هزهزات ضياء راسها: مممم قولي باغيا تخرجي للقهاوي.. وتعيشي رومانسية قبل الزواج اا العفريتة
زهور: كنهضر بصح اا ضياء ونتي باينة عارفة.. ياااك؟
ضياء شافت فيها بجدية: راه عندك الحق حتى نتي خاص تلقاي بيه الراس فالراس عاودي ليه ويعاود ليك كما قال جلال ربما كاين شي حوايج ما فراسي لا انا لا جلال وباغيين تقولوهم لبعض
زهور خرجات عينيها: ومالك بغيتيني نمشي نقوليه اجي نتلاقاو؟
حركات لها ضياء راسها: لا اا خويلتي ما تقوليش ليه ديري شي حيلة ونتي أم تحراميات زعما

ضغيا جاتها الفكرة لبالها تقول إبليس هو لي ولدها: هيييه بالحق عنداك راجلك يفضحني؟
ضياء: علاش بالسلامة علاش ناوية؟
جمعات الوقفة ومشات للبيت تلبس جلابتها مخلية ضياء بلاكة كترد ليها الصرف بالبارد بقات كتسنى فيها حتى خرجات بجلابة انيقة وشدة الفولار مبدلة ووجهها صافي بقات هكاك على طبيعتها وقصدات الباب تحت نظرات ضياء حلات الباب وضارت غمزاتها ومشات أما ضياء بقات حالة فمها هادي خالتها ولا كدبت دخلت عند جلال

جلال: فين مشات اختي زهور؟
ضياء: قالت ليا المهم راجلك ما يفضحنيش.. والأمر متعلق بعتيق.. هادشي لي عارفة.. بالحق علاش ناوية والله ما عارفة
كيف ركبات فالطاكسي عطاته اسم المطعم ديال عتيق ديال آخر مرة حطها جنب الرصيف لأنه تما كاين تستيفة ديال المطاعم على جنب البحر تمشات بخطى ثابتة حتى وقفات أمام المطعم لي مطرطق بعباد الله
جات بغات تدخل ووقف أمامها سيرفور بابتسامة: لالة سمحي لينا المطعم عامر بالكامل
رجعات ليه الابتسامة: أنا هنا جيت نشوف سي عتيق بالخصوص
استغرب من طلبها: ولكن اا لالة الشاف راه فالكوزينة لتحت وما نظنش واش مسالي
كترطب معاه: شوف اا سيدي انا فاهمة خدمتك.. بالحق إلى قلتي ليه زهور كون متأكد راه غادي يقولك بلي باغي يقابلني

ما على الرسول إلا البلاغ مشا وهز فعلا السماعة أمامها ورجع عندها ثاني بنفس الابتسامة وهي كترجعها ليه بمعنى شفتي اش قلت ليك
السيرفور حس باحراج اتجاهها: سمحي ليا اا لالة بالحق راه كما قلت ليك مامساليش.. قالك رجعي من بعد
ايوة زهور حسات بالقرودة كيحنقزو فوق راسها كيفاش ترجع من بعد حسات بشي حاجة ما هياش وفنفس الوقت لعنات تسرعها ولكن ما بغاتش ترجع خالية الوفاض وماشي هي لي دوز عليها هاد الفعلة
رجعات ليه الابتسامة: شكرا اا سيدي