🌹هن القوارير🌹 (في طور التنزيل )

part54

👑👑 هن القوارير 👑👑
شمس الغريب

الجزء 54:

رجعها للدار وهي ما حاملاش تشوف فيه قالبة وجهها عليه وهو باغي يكمل ليها القصة باش تتهنى ولكن هيهات هي حالفة لا تصنطات خايفة تسمع لي ما يرضيها وخايفة تكون شي حاجة ثقيلة على قلبها وتستحملها بزز منها على جال حبها ليه داكشي علاش رفضات بالقطع وكتقنع راسها بلي هي باغيا تكمل فهاد الزواج غير على قبل مصلحتها وباش ما تخليش عائلتها تسمع الهضرة عليها وصافي
صونا على شرف لي كان تبوق بالنعاس صافي جاب الله نجاة بقات عاسة ودارت السيلونص بلعاني للتيلي دياله ملي بانو ليها تعطلو وجلسات تسنى غير صونا طلات من الشرجم هو الاول تأكدت عاد هبطات كتسلت حلات عليها دازت من حداها بحال التران حركات غير راسها لجلال وتبعاتها مع كتنعسش فالبيت غير بوحدها راحة اختطفها معاذ من الحنة حمقاته وما قدرش يصبر عليها وداها

نجاة طرقات الباب كتشوف فيها بخوف: اش كاااين اا ضياء ما تخلعينيش؟
ضياء شافت فيها ومباشرة تجمعو الدموع فعينيها: واااش اا نجاة انا مصخوطة ولا منحوسة ولا اش نكون ؟ غير قولي والله ما يبقا فيا الحال
نجاة: قولي ليا اش واقع بعدا.. شكون ديك خيتي؟
ضياء عاودات لها كلشي كانت محتاجة تخوي هادشي لي هزات فقلبها غادي تنفاجر
ضياء: أنا اا نجاة عمري ما حسيت بهاد الغيرة كاملة طول خمس سنين مع عبد الخالق تخااايلي.. يعني حتى فاش عرفتو غا يتزوج بقا فيا الحال غير حيت ما قال نمشيو للطبيب ولا والو بقا فيا الحال غير على تفكيري انا لي كنت نقول إلى كان فيه المشكل انا نصبر ونبقى مع راجلي لي خمس سنين وحنا مع بعض.. ولكن هادشي ديال جلال مخليني غادي ناكل لحمي واخا قديم
نجاة: وها نتي كتقولي قالك كانت غير بحال أخته ولا بنته؟
ضياء ما تصرطاتش ليها ديك الصورة ديال البوسة: والبوسااااان ااا نجاة البوسااان

بقاو ساكتات مدة وعاود هضرات نجاة: واا علاش ما جلستيش يكمل ليك تعطلتي تعطلتي دبا غادي تبقاي هكا وحتى انا معاك.. صوني ليه يكمل ليك راه غدا عرسكم
ضياء: بقات شي عرس دبا
خافت نجاة: اويلي اش كتقولي.. عرفتي راه والله الى نتي غير كتكذبي على راسك راك غرقتي فيه حتى للودنين 
ضياء كتغوت وتعاود تهضر بهمس: وراااني مراته.. وراه صافي تزوجنا اا نجاة.. اش غادير العرس دبا.. واشمن حب كتهضري عليه وحتى إلى كان واش أنا نتهنى من عايدة تخرج ليا المحامية مزال ما رتاحيت منهم بالمرة خرجات ليا هاد هناء
نجاة: وهو قلبه معامن هادشي لي خاصك تفكري فيه.. نسيتي انا مع شرف.. ياك ها بنت خالكم ها بنت عمتكم بجوجات كانو باغيينو.. نسيتي الحرب كنت نتخاصم معاه غير حيت كانو عزازات عليه بحالكم.. ولكن راه البنات لي خطار اا ضياء يعني.. سمعي وحكمي ودبا لي ديري هو نعسي وما تفكري فوالو.. شوفي باش تعرفيها سامة علاش ما رجعاتش شحال هادي حتى شافتو بغا يتزوج عاد كتصيفط كلابها

خرجات نجاة من البيت وتجبدات ضياء بلاصتها كتحاول تقلب على النعاس وفعلا لقاته فالاخير ماشي نعسات غيبات السيدة
القربالة نايضة لتحت كيطيبو الغداء حيت العرس غادي يبدا من ورا العصر ويتسالا مع ديك 3 ديال الليل ولا 4 وصلات 12 وهي مزال خامرة وحتى هما نساوها حتى جات راحة جايبة حوايجها باغيا تلبس فدارهم زعما ويمشيو
راحة دخلات عند البنات للكوزينة: اويلي باقي ما دوشتو ما وجدتو بشرتكم للماكياج.. ولا قولو مسبقين العروووسة ؟
شافو فبعضياتهم بصدمة وبداو كيتساطحو قدامها حتى حطو لها بلاطو بين يديها بقات تكشيطتها معلقة فكتفها والبلاطو بين يديها غير مستوعبة