🌹هن القوارير🌹 (في طور التنزيل )

part76

👑👑 هن القوارير 👑👑
شمس الغريب

الجزء 76:

دخلات لدارهم هازبنها خوتها مع جلال كانت منهارة تماما الفولار فقنت وشعرها الحريري مطلوق على طولته ما بقاتش حاسة على راسها وففمها كتقول غير حرام عليكم حشومة عليكم.. كلمات كلها تأنيب نعسوها فوق واحد السرير وامها مسكينة حزمات ليها راسها بزيف وجابو ايزار غطاوها بيه عاد دخل الراقي راجل كبير فالسن مسكين وكتبقى فيه نجاة لأنه كان ديما هو طبيبها والمشكلة انه عمتها ساكنة غير على جنبهم وكانت كتشوف شحال نجاة كتعذب وما رحماتهاش

من بعد ما قرى عليها السور والآيات ديال السحر: نجاة.. نجاااة
كانت من النوع لي كنسمعو انهم كينطقو وما فيها حتى شي حد يعني ما مسكوناش ولكن كتنطق بحال الزوهريين مساكن وربما تكون حتى هي زوهرية وما عارفاش
مدة وهو كيعيط عليها: مممم مممم
الراقي: قولي نعم باش نعرف بلي نجاة هي لي كتهضر
نجاة مرهقة: نعم نعم

كانت تتألم لدرجة هما كيحسو بالمها: ياك لباس اش وقع
نجاة: سحر سحر سحر.....
إلى شدات الكلمة صافي والراقي كيحاول معها: فين اا نجاة فين كاين السحر فالطموبيل ديالكم
كأنها ناعسة وكتحرك راسها بالنفي: فالدار الدار .....
الراقي: فدارك؟ صافي انشالله خير
نجاة: ضياااء.. دار ضياااء.. العتبة كلشي ضياء فالدار

لي يشوفها يقول انها كتهلوس قرأ عليها الراقي مرة ثانية ولكن بقات ناعسة وخلاها ودار عندهم
الراقي: راه قلتها ليكم آخر مرة.. راه نجاة بنتي مسكينة غاتبقا كل مرة دازت من جنب شي سحر معمول ومفتوح تتزير ولكن والله الى حصنتها كما قلت للواليدة ديالكم.. وهاد الحالة لي خلاتها هكا يعني السحر قوي والعياذ بالله
شرف دايخ ما بيه لمراته ولا لاخته لي السحر ليها مديور فدارها وخوت نجاة حاسين بيه وما عرفو ما يديرو حتى جات أمهم

أم نجاة: واش اا شرف اا وليدي ضياء اختك هي لي عندها هادشي
حرك راسه مقهور: هي لي مشينا عندها كانت نجاة بخير حتى وصلنا لباب الدار
أم نجاة قربات من الراقي لي ما كيبغيش يمشي لجل البلايص كيرقي غير الناس لي كيعرف والقراب خصوصا وأنه كبر فالعمر وكاين شي حاجات لي فوق طاقته عيات تطلب فيه أم نجاة
الراقي: غادي نرسلكم عند واحد السيد راه حتى هو راقي وغير القرآن وارادة الله سبحانه باش كيفك السحر حتى هو وهو احسن مني
شرف: واخا الله يجازيك بالخير

خرج جلال من البيت بدعوى أنه غادي يمشي يشوف شي وراق بقاو فالطموبيل وهو راه كيهضر مع شرف لي كيخبرو بالمشكل وحتى جلال كان صريح وخبرو بلي كيشك فواحد خيتي
شرف: غدا انشاء الله تجي رحيمة ولا نعمة عند ضياء حيت نجاة ما تقدرش
جلال: والى قاستهم شي حاجة.. ها أنت اا خويا شرف الله يحفظك انت جيب السيد لي قلتي ليا يدير لينا الرقية للدار وعلى الباب حيت ديك خيتي راه ما دخلاتش اصلا يعني لي دارت دارته فالباب.. حتى تقاد الأمور ومرحبا بيهم ما بغيت حتى شي حد يتقاس