🌹هن القوارير🌹 (في طور التنزيل )

part63

👑👑 هن القوارير 👑👑
شمس الغريب

الجزء 63:

وصلو للفيرما من بعدما تقضاو شي حاجات خاصينهم للدار وجلال داز تقريبا على جميع المحلات هز الملفات وأي حاجة خاص يراجعها ولا يدققها باش ما يرجعش إلا للضرورة القصوى ويبقا معزول هو وحبيبته تما

مع حلات الباب حلات فمها الصالون لي على الدخلة لقات البرزة ديال الحناء داك الكتان الأخضر المطرز بالصم الأصفر مع المخيدات والصينية النحاس برجلين طوال مريشات جوج كلشي نحاس الحنة مخلطة وريحتها عاطية والند والعود الغالي مطلوق فالدار والنقاشة جالسة هي ومرات العساس فالقنت كيهضرو غير شافوها تبسمو ليها وهي مصدومة من هادشي لي كتشوف

جرها بعيد عليهم وداخل الدار ما بقاوش كيبانو ليهم: بلا ما تشوفي فيا هكا
ضياء ضربات ليها طن فراسها: هذا علاش قلتي ليا البارح بغا صاحبك النمرة تالنقاشة قولي انت لي بغيتيها.. وعلاش هادشي؟
جلال بعيون هايمة تملكية عاشقة لي بغيتو: حيت اا حبيبتي من نهار مديت ليك القفطان ديال الحناء ديال راحة.. وانا بقيت بلا راحة
خرجات عينيها: اويلي !!!
جلال كيهضر معصب ومن نيته زعما السيد: تخيلي معايا كنشوفك قريبة وبعيدة فنفس الوقت.. عمري بغيت الحناء وفاش شفتها فيديك هااااااح.. تخيلي اش جا فبالي

الخجل مع الحب مع السر مع مزال باغيا تسمع المزيد: اااش؟!؟
ضحك بختورية وتكاها على الحيط لي من وراها وتكا عليها خلاها غير كتقاقي: بزااااف.. ديك اللحظة ما كرهتش نشد يديك نبقا غير كنبوس فيها وكنشمها نعضها نعنقها.. والأكثر اني ما كرهتش ناكل من ديك اليد.. كنتي بجمال خارق كنتي ما عرفتش كيفاش نقولك.. القفطان كيف واتاك ولا الحنة لي جات معاك ولا داك الذهب لي زاد عطا جمال وجمال آخر

بقات كتلوا قدامه وهو قرب منها أكثر كيهمس وكلما هضر ريحته الغزالة كدخل ليها بين اللحم والعظم: عرفتي دبا اش قررت
ضياء ما بقالهاش الصوت: ممممممم
جلال: غادي تعاود ديك اللقطة.. بالحق دبا نتي مراتي وحلالي يعني اا حبيبتي غادي تسمحي ليا من بعد هاد الايام لي جايا.. خصوصا اليوم

جرها طالعين فالدروج دخلو للبيت حلات عينيها أكثر من لتحت ملي بان ليها قفطان بحال لي كانت لابسة خوووه ولد مو وباه قميص جوهرة بالمسكي كمام طروا كار مخدوم بالراندة وعنده مجدول والVوال فنفس اللون محطوط جنب البلغة لي حتى هي نفس اللون وجنبهم بواطة كبيرة مربعة الشكل ووحدة صغيرة قربات بشوية حلاتها لقات فيها انصومبل ديال الذهب فيه براسلي غليض وGورميط ديال اليد مع كوليي وخاتم غزالين حلات الأخرى لقات فيها ساعة يدوية واعرة حتى هي ذهبية

جاها صوته من الخلف: حاجة وحدة اا الغزالة لي ما عرفت كيف ندير ليها هي داك الماكياج الخفيف لي درتي.. كان فيا ما يجيب الكوافورة ولكن عارف بلي داك الماكياج يا ديالك يا شي وحدة من العائلة.. وكنتمنى يكون ديالك