🌹هن القوارير🌹 (في طور التنزيل )

part84

👑👑 هن القوارير 👑👑
شمس الغريب

الجزء 84:

هي وياه على سريرهم كيماصي ليها كرشها بحركات مريحة كدغدغها: واش هاد صاحبك من أيام الصغر؟
جلال معنقها عنده وكيلعب فشعرها: ممم.. كبير عليا هو ب 12 سنة.. عنده بحال ديك 42 حتى 43 سنة
ضياء: وكيفاش قدر يعيش فالغربة وهو ماكانش حتى معول عليها؟

جلال: اييواا ربي ملي كيبغي ليك شي حاجة.. بقا عايش مع دوك الناس لي خلاه عندهم با إبراهيم وتعاملو معاه مزيان.. وهو كان ذكي بزاف حتى فاش كنا فالخيرية غير هو ملي مشا تما استخدم ذكائه فحاجات مزيانين.. جابو ليه أستاذ يعلمو اللغة والكتابة الإيطالية وهو اصلا كان كيحب اللغات وكيتعلمهم من المغرب.. قدر يتوفق بعون الله وداك الأشهر لي كانت عطلة صيفية قدر يتقن اللغة نوعا ما.. ودوك الناس قدرو بشي طريقة يصايبو ليه الأوراق دياله وأنهم هما لي تبناوه هما لي كان عندهم مطعم صغير كيقدمو فيه الوجبات الإيطالية.. وهو فديك المدة كان كيعاونهم وعجبو مجال الطبخ والكويزين.. قرر يكمل فمجال الطبخ (هزات فيه ضياء عينيها بصدمة) اييه اا لالة وكبر ليهم المطعم وزاد فيه المطبخ المغربي.. ومن إيطاليا لفرنسا لأمريكا لمجموعة من الدول ومجموعة من المطابخ قدر يمجزهم مع بعض وخرج نكهات واطباق دياله.. داك الزوجين توفاو وهما راضيين عليه وخلاو ليه ممتلكاتهم إرث لأنهم ما كانوش عندهم أولاد وهو راه كبر مشاريعه وراه كيصدق على روحهم وبقاو بالنسبة ليه عائلة

ضياء: سعداااتهم لا با إبراهيم ولا هاد العائلة.. شوف سبحان الله ربي ما كينساش عباده.. ما كانش حتى ناوي بالحق ربي بغا يعطيه ديك الفرصة
جلال: والواعرة بزاااف هي أنه داك الراجل ومراته سلمو وهو لي سماهم محمد وعائشة حيت الحب ديالهم كان نقي وزوين.. وسلمو بفضلو خلاهم يتعرفو على الدين وعجبهم من خلال عتيق وتربيته
غوتات ضياء وطرطقات عينيها: واش عتيق ايييvااااار يااك هو ؟
ضحك جلال حيت ملي بدا كيعاود ليها قصته وهو كيقول غير صاحبي فقط ما جبدش اسمه نهائيا
جلال كيطنز عليها: ااييه عتيق ايvااار.. مالنا ما نخافوش؟

ضياء بدات كتعبر ليه: عرفتي شحال كنت متبعة واحد البرنامج دياله إيطالي تعلمت منه بزاف ديال الحاجات.. وعمري توقعت انه يكون مغربي كان كيصحاب ليا عنده جنسيتين يعني عربي-ايطالي ولكن منين فالعرب ما عرفتش.. حتى بديت كنقرا فالمعهد وسولونا على لي شاف لي كيعجبونا ونهضرو عليهم وهو ما كانش قايل معلومات على حياته كيهضر دائما على الطبخ فقط ولكن الأستاذة ديالي قالت ليا راه مغربي الأصل ولكن حتى هي ما عارفاش التفاصيل غير كانت فشي فوغماصيون كان فلجنتها وكان داير قدام اسمه العلم المغربي

جلال شاف فيها بنص عين مترقب ردة فعلها: وراه قال بلي طريقة ديال الطبلة كيف محطوطة ديال المحترفااات
جات جالسة كترجى فيه بعينيها: حلف واا حلف واش بصح قالها؟
جلال: والحريرة عجباتو هو بغا يتزوج بلي طيباتها gااع بالحق قالك ما تكونش فالمطاعم
ضياء بتأكيد: ااه طبعا حيت خاص ديما تكون خفيفة.. شي مرات كيقولك تدور بطحين الذرة احسن باش تبقا خفيفة (ضحكات) ايوة قولها لخالتي زهور (عاودات ليه بلي تعصبات حيت حشمات جلال مع صاحبه بسببها)
عماد من بعد عشاه هو والأب دياله جلسو فالصالون كيتعاودو كاب مع ابنه حتى دخلات الدادا ديال عماد جات جلسات معهم بطلب من عماد اصلا راه تعد سيدة البيت من بعد وفاة أمهم المرحومة
عماد شاف فالاب دياله: بغيتك اا الواليد تسمعني حتى للاخير الله يخليك
شاف فيه الاب دياله بخوف وقاد الجلسة: ياك لباس الله يسمعنا خير
شافت فيهم داداه وضاغي عرفات موضوع عماد: لا اا وليدي خليني انا نقول للحاج