🌹هن القوارير🌹 (في طور التنزيل )

part99

👑👑 هن القوارير 👑👑
شمس الغريب

الجزء 99:

ملي دخل للدار ديالهم ولبيته وهو عقله غير مع نفس البنت الممرضة الغريبة اول مرة يتلاقا ببنت بحالها خوافة، بكاية، حنونة ومتسامحة وبزاف ديال الصفات لي بالنسبة لينا ولأي شخص عادي غادي يجيوه عادي مواصفات بنت وصافي ولكن هو لا جداد عليه
علاش لأنه البنات لي دايرين بيه ولي هما اخواته وحتى لي معاه فالعمل كلهم عندهم نفس الطبع تقريبا: القوة، الصرامة، المجابهة يعني صفات البنت الكيوت ما عارفهاش وعمرو سمح لنفسه يعرفها على طول ضغوطات
بقا فباله كيفاش هو عاملها بقسوة طول اليوم وهي غير شافت جرحه كينزف سارعت باش تعاونه متناسية وحتى فاش رمات ليه الكارط دياله تمنت ليه بقية ليلة سعيدة

على ذكر الكارط مشا هزها باقي ملفوفة فنفس الموشوار الحريري باللون الوردي البارد كيعكس لطافتها وفجنب دياله مطروز بالذهبي اسم * زينة * نطقها بصوت بحال فحيح الأفعى مرات متتالية وهو كيقول مع راسه واش اسمها زينب أو زينة هو آخر مرة قرأ فالملف اسم زينب ما عرفش علاش ملي شافها وهو كيغلط فكل حاجة فيها وهو لي معروف عليه الدقة والثبات حس بيها ظاهرة فحياته حيت هي لي غادي تثبت للناس انه انسان عادي وماشي خارق

هبط بثقالة لقا خواتاته بجوجات ماجدة ورقية مع أولادهم بجوج بيهم مخشيات فشي حاجة متعلقة بالأمن ماجدة "عميد شرطة" ورقية "طبيبة عسكرية" توجهو لهاد المهن لأنه ما كانش اختيار امامهن خصوصا وأنهم هما الكبارات وتزوجو من رجال فنفس ميدان عملهم الاختلاف فالدرجات فقط ولكن عايشين بخير رفقة ازواجهم غير بان ليهم خوهم ناضو كيسلمو عليه وولادهم كيخافو منه لأنه ما عندوش مع البسالة والفشوش الخاوي من طباعه يعني

رقية: كيف بقا الكتف ديالك؟
شاف فيها بنص عين ونصف ابتسامة: داك الراجل عندك ما كيخبي عليك والو
حركات عينيها بلا بابتسامة خفيفة: أبدا (غمزاتو) للحديث بقية معاك (وصلات حتى للباب) ولادي فامانتك انت عطلة هاد الاسبوع
هزهم بحال الى هاز دجاج من رجليهم وراسهم لتحت وهما كيضحكو جوج ديال التوأم أولاد كياكلو من العينين لقاها طارت عاود حطهم وأمه كتقلب فيهم ياكما تفلعصو
وقفات ماجدة باست ماماها: بلا ما تشوشي حتى إلى تفلعصو راه ماماهم رقية الرفاقي وباباهم آدم الفلالي يعني راه يبراو.. تهلاو ليا غير فولادي مساكن  
شاف فيها خليفة مصغر عينيه: هما والديهم أطباء يداويوهم ونتي وراجلك شنو ديرو.. تمينطوونا ولا كيفاش

سلتات حتى هي وبقا هو واقف وسط الدار كيشوف فيهم مصطانعين البراءة أولاد رقية توأم أولاد وماجدة عندها ولد كبير وبنية وكلشي كيفرفر يا ربي السلامة
خليفة بتهديد: نسمع غير ذبانة زنزنات نزنزنكم
دخلات للدار من بعدما ودعات نيفين وخدات التسجيل ديال زاك وهو كيتعارف اعترافات خطيرة حسات بلي نوح غارق وما عارفش راسه بقا فيها وبغاتها فيه فنفس الوقت بقات حايرة واش تقوليه ولا تزيد تقلب على الدلائل باش تدين نيكول أكثر ما بغاتش تبان كأنها باغيا تشتت ليهم عش الزوجية ديالهم أكثر من أنها باغياه يفيق من القلبة ومن هاد الفخ لي تنصب ليه من طرف وحدة مستغلة حب واحد الطرف باش تشد طرف آخر هي باغياه ماشي الحب ولكن مرض