🌹هن القوارير🌹 (في طور التنزيل )

part147

👑👑 هن القوارير 👑👑
شمس الغريب

الجزء 147:

أم نوح: شوفي اا بنتي إيمان حتى هي غلطات فالأول ما قالتش ليا هادشي.. زعما ملي يالاه جات فاش جابها مصطفى.. كانت فرحانة وكتبان بلي هي وياه بخير وبحكم انا ما كنبقاش ففرنسا بزاف ما كناش كنتشاوفو قلييييل.. كانت كتنفد لي قالها راجلها يصيفطها تبكي وتشكي.. حتى عاوناه فبزاف ديال الخدامي.. من بعد قالك بغا شي حاجة ديالو المطعم قول حنا لي درناه ليه.. البنت قالت بلا تفاصيل بلي هي كانت معذبة معاه.. هادشي قالتو ليا داك الصباح لي جات وخبراتني بلي اختي حماتها رسلاتها باش تكون وسيط لتنسيم والى ما قبلتش انا بنتها تبقى عندي كانو غادي يفرقو إيمان على ولادها.. كان عوال يديها للمغرب ويرجع معاه أولاده ويحرقو لها الأوراق
عايدة شهقات: هادو يهود ونصارى.. حرام واش مسلمين
أم نوح: قجرو عليها وزادو كطلب اختي منها هاد الايام باش تصيفط ليها شي سحور.. وحيت انا كنتيق فيها تجي تديرو لنوح فبيته وهادشي لي قالت ليا اليوم

وقفات عايدة بلا ما تحس: والى كانت ديك المخلية دارتو فاش جات
حركات راسها بالنفي: يالاه بغات تصيفطو ليها.. واصلا تنسيم ملي جات وقبل لا نعرف هادشي كنت حاضية منها.. وفعلا سولات على بيت نوح ولكن انا كنت موصية البنات قبل ونعتو ليها بيت آخر.. وحضاوها غير دخلات وخرجات أما بيوت نوح طرقتهم بجوج وتهنيت.. لي كانت باغيا دير هو تخاصمني انا وياك وانا وعمك وتخلي نوح تالف ما عارف اشمن اتجاه يشد
عايدة: كيفاش!؟
أم نوح: بدات كتحرشني على عمك ونوح بلي تلفتيه وكتعمرني عليك زعما.. وانا كنت دايرة راسي ضبعة ومتيقة كلامها وعايشة الدور (ضحكات) داداك علماتني التمثيل وانا عجبني ووليت أي دور كنتقنو.. وداك نهار تخاصمت مع عمك بلعاني ملي حرشاتني بغيت نشوفها واش غا تبعني وخليت الباب مشقق
خرجات عينيها: تبعاتك حتى لبيتك نتي وعمي
تنهدات: واييه

كانت شريرة من قبل ولكن هاد المرحلة عمرها وصلات ليها بالحق غادي ترجع كما كانت إلى بغاو بالحق هاد المرة فالدفاع على شي حاجة لي بصح عندها فيها الحق
شافت فيها: خالتي سمحي ليا واخا هما عائلتك.. بالحق الوجه لي غا يشوفو مني إلى قربو من شي حد فيكم بالشر عمر شي واحد شافو
أم نوح طبطبات عليها: حضي راسك وجنابك.. انا هاد الايام كنت مسايراها باش ما تقربش جهتكم.. الساعة نوح مشا وبقيتي غير نتي شاطناني
عايدة: نوح حتى هو شاك فشي حاجة حيت ما خلانيش نمشي عندك للدار
أم نوح: هو غير ما كيحملش عائلتي على لي داروه بالحق هو ما عارفش داكشي كله.. أما كون شعل فيهم العافية بلا تردد
كلشي تخلى عليهم عائلتهم القريبة حتى من عائلة تاجة ما جاو ما عيطو حسو براسهم منبوذين أما واحد خوهم نهار مات باه هو سكران باقي ما سحاش زاد فضيحة فوق فضائح هما بالحق جنازة الاب ديالهم مشاو فيها ناس الحي كلهم كان راجل طيب وبعيد على المشاكل وما كيدخلش فالناس بالحق تريكته ما عرفش منين خرجات ليه من جنب
فالدار كانو غير هما عبد الخالق وخوتو 2 وخواتاتو جوج وأمه أما عيالات خوتو مرات السكايري رافعة دعوة ديال الطلاق لأنه قبل ما يشوف بعينيه اتهمها أنها كتهضر فشرف خواتاتو وعطاها قتلة الكلاب وهي رفعة عليه دعوة الطلاق ومرات الأخ الآخر من بعد الحادثة طالبة انه يعزل ليها دارها بوحدها وبرا هاد الحومة إلى بغاها ترجع والا المصير هو الطلاق وهذا طلب عائلتها ماشي غير هي لي كتهضر من فراغ
وسط هاد الكوم من المشاكل والألم والحزن ديال فراق الاب ونفور الأحبة عاد الفضائح المتراكمة شاف فخواتاته لي مضورين أمهم لي لابسة الأبيض والدموع خط واحد بصمت الصوت ما كاينش