🌹هن القوارير🌹 (في طور التنزيل )

part134

👑👑 هن القوارير 👑👑
شمس الغريب

الجزء 134:

هاد الايام كانت واخداهم راحة من الكلينيك عاطينهم ليها عطلة لأنه الشيء لي عاشت ماشي قليل ولكن فهاد الصباح كتفاجئ بالايميل لي وصلها مفاده انه تم نقلها من داك الكلينيك لكلينيك آخر وكان أقرب من الاول ما عرفاتش علاش هاد التغيير المفاجئ وعلاش حتى لدبا وهي طلبات أنها تخدم فهاداك ولكن قالولها ماشي بهاد السهولة علاش دبا اصبح بهاد السهولة يالاه ناوية تمشي تلبس ولا تصوني عليهم ولا تشوف اش دير حتى جاها اتصاله 
زينة: الو (كتفادى دائما تنطق اسمه) ما عرفتش علاش بدلو ليا المصحة
خليفة ببرود: أنا لي بدلتو من اليوم غادي تخدمي تما.. والسيد لي غادي يبقى يديك ويجيبك حتى هو راه غادي نجي بيدي نعرفك عليه
بقات كترمش فاتجاه واحد: ما فهمتش.. انا راه ما نقدرش نقبل هادشي
بقصوى: ماشي لخاطرك غادي تحولي لديك المصحة.. ومول الطاكسي غادي يبقا ياخد خلصة شهرية ويديك ويجيبك للدار.. من دبا ربع ساعة نلقاك جنب مركز الأمن لي حداكم

قطع وخلاها حايرة باغيا تشوفو من نهار جابها لدارهم ومن آخر اتصال ما بقات شافتو ولا عيط عليها ولا صيفط حتى ميساج وفنفس الوقت خايفة من لقائه وقفات بعد تردد واختارت كسيوة هابطة على الركبة بشوية، طروا كار بالازرق فاتح بما انه الحال بدا يسخن شوية فرجليها سبرديلة بيضاء خلات شعرها مطلوق وتفادات أنها دير شي حاجة لوجهها من آخر مرة لي ما عرفات واش بصح ولا كتحلم هزات صاكادو ابيض وفيه خطوط بالألوان دارت فيه لوازمها يالاه رشات ريحتها تحل الباب
راحة هزات حواجبها وتبسمات: اووووه فاااين غاادي هاد الزين؟
عايقة بيهم هي ونسرين باغيين يعرفو اش كاين بالحق هي براسها ما عارفاش اش تقول ليهم
زينة: واحد صاحبتي عيطات عليا نخرج انا وياها
راحة خرجات راسها من البيت: نسرييييين اا نسرييين
على القرص ضاغي بعتات معاهم وطلقات تصفيرة: باباباباباااباااااا هاد الزين كله عايش معنا.. (غمزاتها) على فين انشاء الله؟

دوروها تما كيتصرفو بحال الى هي ما كيناش وكيحللو ويناقشو جابو لها الضحكة وخايفة من الاخر لي تعطلت عليه
راحة: لا والو عيطات عليها صاحبتها وغادي يخرجو عادي
نسرين: مممم زينة وصحابات.. ما كدخلش للعقل
راحة بهمس: يكون المحقق البوgوص
نسرين: حتى إلى ما كانش هو غادي يكون شي بوgووص آخر
سلتات من بيناتهم وهربات جاتها القضية ساهلة مع السبرديلة ومع راحة ما تقدرش تدير شي حركة فشكل ونسرين هازة ولدها خلاتهم من وراها كيضحكو عليها وهي كتوصيهم يقولوها لراضية لي مشات تشوف اختها مريضة ما وقفات بجرية حتى لحدا مركز الأمن كدور فعينيها تقلب عليه
قدر وأخيرا يختار هو وعبد العالي الدار ولي كانت كطل على البحر بطلب من عبد العالي لأنه فيها بزاف ديال الامتيازات قريبة من البحر، واسعة وفيها جردة كبيرة فيه بيسين وميني فوت الشيء لي حمق عبد العالي ومن الداخل مامفرشاش وهادي اول مرة زهور تجي ليها كان جالها عبد العالي مع عتيق واليوم مشا عتيق هزها من عند ضياء وجابها باش تشوفها
زهور غير تحل الباب ديال الطموبيل: باسم الله ما شاء الله كبيرة وواسعة.. واش غادي دير فيها شي مطعم جديد؟
شاف فيها عتيق بابتسامة: لا لا اشمن مطعم
هبط ودار حل ليها الباب خرجات كدور فعينيها دار زوينة وباينة ماليها كانو مهليين فيها