🌹هن القوارير🌹 (في طور التنزيل )

part49

👑👑 هن القوارير 👑👑
شمس الغريب

الجزء 49:

بعد الكلام فعدة مجالات وتناقشو فبزاف ديال المواضيع وأخيرا محمد حنحن بصوت عالي نوعا ما خلى الكل ينتابه ليه
ضحك فوجه عبد الله: رجعنا عاوتاني اا سي عبد الله والله شاهد عليا إلى هاد المرة فرحتي أكبر لأنه جلال (عينيه غرغرو وصوته تغنغن) معزته عندي أكبر من ولادي.. خويا الصغير والعزيز فنفس الوقت
عبد الله تأثر بيه: الله يخليه ليك اا سي محمد.. والله يجيبنا فالصواب انشاء الله
محمد: اللهم امين يا رب.. الحاصول اا سي عبد الله جيناكم طالبين راغبين فيد بنتكم ضياء لولدنا جلال وكما سبق وقلت على راحة غادي نقول على ضياء انشاء الله يا ربي نهزوها فكفوف الراحة
عبد الله: وحتى انا كما شرطت عليك قبل اا سي محمد غادي نعاود.. ضيااء ديروها بنتكم وهي راه درويشة ماشي حيت بنتي ولكن انا لي عارف اش كنقول

من بعد الحديث فامور الخطبة والزواج وما إلى ذلك وأخيرا شرف قدر يفهم العريس ولا ماشي همه العريس باغي أخته تحط النقاط على الحروف
شرف: ملي تفاهمتو نتوما الكبار.. اجي معايا اا خويا جلال نعيط لك على ضياء تفاهمو حتى نتوما على شروطكم لبعض
شوية وينوض جلال يبوس لشرف راسه تبعه للبيت لي كاين غير تما نيت فالكولوار وعيط على نجاة كلمات ليه ضياء لي ما فهمات والو حتى دخلها للبيت وخرج ساد من وراه الباب بقات كتشوف فيه ساهية اول مرة تشوفو لابس البلدي كيبان بحال شي مودل ولكن ما تكونش قده هو لي كان جالس وقف ملي طلت عليه كطلت الهلال كيطلعها ويهبطها بنظراته المتيمة بشوية ما بقا ليه والو وياكلها بيهم

قرب منها وهز يديه حطها على راسها كيردد بصوت شبه مسموع: أعوذ بكلمات الله التامة.. من كل شيطان وهامة.. ومن كل عين لامة.. ياااا رب
حنات راسها بعيون دامعة وهي كتشوف فكمية الحب باش عوضها ربي سبحانه لأنه الله الأحد سبحانه ماشي غدار وليس بصير راه كيشوف عباده وكيجازي كل واحد على قدر الصبر والطاعة والعمل الصالح دياله ويكون خير جزاء

جلسها بحال الى كيحط فالذهب بشوية عليها وجلس حداها ويديه على يديها كيمررهم بحنان وحب كيخرج من قلبه وكيداعب جل حواسها وزاد كمل عليها قرب باس جبينها مطول حتى ترعدات ليه بين يديه أثر تماس بشرتها مع لحيته الرطبة
جلال بعد بعناء كيشوف فيها بعينيه النايمين: اهاااه على بالي عندك شي أوامر.. اما الشروط حاشا واش يكونو.. نتي خاصك أوامر ويتنفدو.. يالاه اا لالة اامريني

بقات غير كتشوف فيه بدوك العوينات باغيا تجيب اخرته هي ما عارفاش واش هذا حلم ولا خيال هي فخطبتها الأولى بقات حانية الراس وعبد الخالق مبعد عليها بمترو جالس كيفتي عليها شروطه وما قبل حتى شرط منها فاقت من الكابوس لي رجع لها وكتشوف فحلمها الوردي قدامها جالس كيتسناها غير تقول بغيت هادي بغيت هادي وهو ينفد ليها بقات كتشوف فاش كانت كتبكي زمان على شي حاجة ما دركاتهاش ولا على شي حاجة بغاتها وما حققاتهاش كان باها كيقول لها
هز ليها راسها بشوية: شوفي اا ضياء ما تحشميش.. قولي ليا لي بغيتي مني.. انا راه يبقى فيا الحال إلى بغيتي شي حاجة وما قلتيهاش ليا والى نتي بغيتي شي حاجة وسمعتها من شي حد آخر كما بغا يكون.. يالاه
ضياء تنفسات بعمق وهو كيهز ليها راسه كيزعمها: أنا بغيت نكمل قرايتي (زربات عليه قبل لا يهضر) وانا راه ما غاديش نهملك لا انت ولا الدار.. والله.. وصافي غير هادشي لي بغيت
بقا كيشوف فيها شحال حتى وثرها وخلعها وقرب ثاني باس جبينها: قرايتك عمرك تفكري بلي غادي تخرجي منها مفهوم (حركات ليه راسها) وانا لي كان كيصحاب ليا غادي تقولي بغيت داري بوووحدي وطمووبيل وشهرية.. طلعتي ضريفة غير وصلنا المعقول تهدنتي

جاب لها الضحكة وتفكرات تجاوزاتها عليه لي ما كانتش كديرهم وهي عاقلة بحال الى كترفع بسبب الغيرة لي جديدة عليها بهاد القدر كانت حانية راسها وكتفكر حتى بان لها الخاتم المعلوم بين صباعه كيدخلو لها لصبعها بشوية وكيتامل ديك الحركة ببطء مخليها تستمتع بجمالية الخاتم وهو متع بجمال يديها لي ضافو للخاتم نكهة جمالية أخرى
كمل ليها التلباس وجبد خاتمه هو مده ليها: ما تلبسينيش خاتمي؟
خداته منه ولبساته ليه بنفس الطريقة لاعبة عليها التقفقيفة كلها كتشطح حتى حط يديه جلال على يديها معاونها مثبتها