🌹هن القوارير🌹 (في طور التنزيل )

part17

👑👑 هن القوارير 👑👑
شمس الغريب

الجزء 17

شافت فخوها وهو سايق وطارت عليه عنقاته حتى وقف الطموبيل جنب وزاد معنقها لعنده الأخ هو السند هو الاب الثاني لنا مهما تصرف بشدة وعنف شي مرات إلا أنه احن منه علينا ما كاينش هكاك حسات ضياء والأصل هاك ديما كتحس إلى كانت فمشكل خاصو العقل والهدوء والحل النهائي كتعيط على شرف كانت باغيا لشي حد شي سلخة ما ينوضش منها يكفي تعيط على حكم ما كيسول لا السبب ولا القصة أخته كتبكي ولا تشكات ديريكت كتعني مظلومة وخاصها حقها يرجع

ضياء: كون ما صونيتش عليك كنت نحماق
شرف: نتي صونيتي ونجاة صونات قبل لا يرجع حكم يسمع شي حاجة يصدق داير شي فضيحة داكشي باش مشيت عنده هزيته ديتو للدار وخليت الواليد والواليدة شادينو بالصخط والرضا
ضياء هبطات عينيها: ما توقعتهاش منه اا شرف
هز ليها راسها وباس جبينها هادشي لي ما باغيش هو: هووب هوب هوب هاد الراس ما نبغيش نشوفو محني هو لي ضاع ماشي نتي هزي راسك الفوق ونسايهم عليك حنا لي ما كانش علينا نعطيوك ليهم نهار الأول

تحركو من تما ومع بقاو شحال واقفين وصلو للحومة بانت لهم الطموبيل دياله تما قدام دار والديه ضحك شرف باستهزاء وزاد لدارهم غير هبطات بداو الناس كيوشوشو والكل كيقول بلي هي لي رابحة خرجات من ظلم ديك العائلة وكاين لي اكيد كيلومها وكيسمم بهضرته غير باش يهضر دخلات بلا ما تعير حتى شي حد اهتمام مخلية شرف كيدخل حوايجها

غير شافها حكم طار خاشيها فحضنه وكيبعدها يقلبها كل شوية واش فيها شي حاجة كون بانت ليه غير شي قمشة ما يشدو لا صخط لا رضا أما راحة طارت على اختها كتنخصص حتى بعداتها نجاة وغوتات عليها هي ورحيمة
نجاة: علاش كتبكيو مالنا عندنا جنازة انا راه ندير ل اختي فرح لي تفرقات معاه وتهنات بان عيبهم الكبير والحمد لله لي ربي فكها بلا حماد ولا محماد انا لي فاقصني هو الجيران اش عارفين على لي دوزوه عليها وحنا آخر من يعلم
ع.الله عيط عليها مشات عنده عنقها: كنتي صابرة لهم على قبلنا ياك اا بنتي.. حنا لي غلطنا فحقك اا بنتي غير سمحي لنا
انهارت فحضن الاب ديالها باكية وشرف كيقلب على نعمة قالو ليه راه مشات تجيب ولدها وتجي جرات نجاة ضياء وطلعوها الفوق دخلاتها نجاة للدوش ورحيمة كتوجد لها ما تلبس أما راحة كتقاد لها حوايجها لي طلعو لها خوتها للبيت

رحيمة: والله كونما كرشي لي متقلاني دوك خواتاته ما يفكهم حد من يدي
راحة مغددة: غييير بلاتي هادشي كله تلقايه غير حيت خطبني معاذ ناضت ديك صوبينة  كتعمر فامها
رحيمة: لاليااااتهم وتزوجتو بسيادهم علاه ديك لي مزوجة جنب الوزين ماشي نوضات القيامة نهار امجيد خطب نجاة باقي كلام ضياء وهاد الرويجل ما كاين ولا خطر على البال
راحة بهمس: قالت ليا خالتي راضية اليوم بلي تاجة كانت ما كتحملش ماما حيت ختارها بابا فداك الوقت (جهدات صوتها) هذا مشكل عريق يااا الراجل لي بغاوه كنطيروه ليهم
رحيمة ضحكات وسط فقصتها: حتى نتوما تعديتو عليهم القضية قولي من زماااااان ٩

دخلات نعمة وغير ما بانوش ليها معاهم لتحت صيفطات بلال لعند خواله وطلعات فالدرجة كدير جوج باغيا توصل ضاغي
شرف: اجي اا بلال اجي اا خالو (سلم عليهم وهما كيعنقوه ويبوسوه تقول ولدهم) سير لعند الدراري للبيت اا بابا سير
أما نعمة دخلات للبيت لقاتها يالاه سالات اللبس وهما دايرين بها كل وحدة واش كدير كيقادو ليها حوايجها فالبيت صافي غادي ت انسطالا
نعمة طارت عليها بتعنيقة: والله يا ختي كون ما عاايشة لي شدتني حتى كنت غادية نكدو ليهم
رحيمة: شكون قالها لك نتي
نعمة: ربيعة الكسالة هي لي صونات عليا قالت ليا لي كانت تعاود لالة ضياء ولي كانت صاراه فقلبها
راحة خزرات فضياء: ااش قالت ليك ربيعة راه جارتهم الباب على الباب أما هادي راه باقي ما باغياش تخرج اش دارو ليها
نجاة طبطبات عليها: صافي خليوها على خاطرها باغيا تنسى
ضياء تخشات فيها كيعتابروها اختهم الكبيرة ماشي زوجة اخوهم: غير نعس مزيان غدا نعاود ليكم كلشي أما دبا عيانة
نعمة: شفتي غدا كيف نفيق نمشي ليهم قال ليا امجيد سيري قولي ليهم بلي راه أنا لي ما كنولدش ودي ليهم حتى التحاليل ماشي باش يرجعوها باش خليه يعض فالضص ديك الساعة
ضياء بالقطع: إلى درتيها اا نعمة نخاصمك اسرارك مع راجلك ما عند حتى شي حد الحق يتقالو ليه وماشي حيت هما طلعو ما مزيانينش نخليك انا تهضري ف راجلك قدام الحومة.. كون كان راجل وبصح باغيني غادي نمشي انا وياه للطبيب ماشي ناض دارهم لراسه زعما انا راه ما فيا والو اذن هي وعلاش دارهم بالتخبية اصلا
رحيمة: باش كون لقا راسو فيه شي مصيبة يبدا يتحلبد عليك وعارفك تقدري تبقاي معه بلا أولاد
راحة: أما ملي لقا راسه مزيان كيتبورد كي البغل أما العود بزاف عليه
ضياء: حتى البغل راه بزاف عليه.. ولكن عرفتو ما عرفتش علاش ما بقاش فيا الحال حسيت براسي غير حمارة حيت كون هو لي كان فيه المشكل كنت نصبر معه
راحة: حيت ما كتبغيهش واصلا ما فيه ما يتبغى
نجاة غمزاتهم: يالاه خليوها ترتاح (شافت فيها) ونتي نعسي بلا كثرة التفكير انا شوية نجيب ليك عشاك

                💣💣💣💣💣 توقاعتكم وآرائكم 💣💣💣💣💣

💖 هذه هي العائلة 💖