🌹هن القوارير🌹 (في طور التنزيل )

part27

👑👑 هن القوارير 👑👑
شمس الغريب

الجزء 27:

فاق فداره لي كانت جامعاهم بجوج قلب عينيه لجهتها كيتمنى يكون كلشي حلم حتى كيتصدم بالواقع ريحانة ناعسة كتشخر بشوية وشعرها ماشي رطب ولكن ماشي حرش صابح لاصق عليها بسبب الصهد والعرق ديال ليلتهم الأولى ناض لبس فرجليه وتوجه للدوش صغير لي دايرو فوسط البيت كلشي هي لي صمماته كلشي فالدار كان من اختيارها دخل دوش وخرج بانت ليه كتقلب كتستاعد تفيق

تبسمات ليه وسط الفراش: صباااح الخير
بادلها الابتسامة: صباح الخير.. انا نخرج حتى تكملي ونجي عندك باش تخرجي
حركات ليه راسها باه عاد خرج وهي تكسلات مزيان وهي كدور عينيها على الغرفة وتشوف هنا وهنا عاد ناضت للحمام اغتسلت وتوضات جمعات الدوش وقادات مساءلها ديال الحمام فبلاصتهم عاد خرجات لبسات كلشي ابيض وتريحات ودارت ماكياج عروسة جديدة وجلسات تسناه حتى جا شد فيديها وخرجو بجوج حلات فمها هي ملي بانو ليها عائلته كاملة كاينين كيصحاب لها غادي يكونو غير الكبار الساعة حتى البراهش كاينين كينقزو وريتلو الدنيا كاملة عاد هما باغيين يسافرو وهما غادي يعطلوهم

شافت فيه: صوني على عمر اا عبد الخالق باش يجيو بكري باش ما يضيعش لينا النهار
جبد التيلي صونا عليه حتى كيسمعو الكلاكصون لتحت شوية طلعو داك الفطور ولي كاضو دخلو كلشي وعائلته حاضيين اش جابو واشمن تكبيرة دارو لبنتهم الطمع كينقز من عينيهم غير كلاو ناضت هي من الصالون حيت كانو جالسين معزولين دخلات للبيت ديالها شوية عيطات على اختها شوية دخلات عندها أمها بقاو فداك البيت جهد شي نصف ساعة حتى خرجات اختها دخلات عندهم للصالون بابتسامة

أخت ريحانة: العرسان غادي يسافرو دبا انشاء الله
بالمعنى نوضو فحالكم تاجة بقات حالة فمها واش كتطرد من دار ولدها واشمن سفر اصلا ما فراسهمش ناضت أخته الكبيرة ودازت جنب أخت ريحانة
أخت ع.الخالق: عبد الخالق .. ااا عبد الخاااالق
خرج عندها من البيت: مالك
اخته: ملي انت مسافر قولها لنا ما نجيوش
ضرب راسه: راه غير الخدمة لي عطاوني سيمانة لمراكش كاضو ديال العرس وزايدون صافي حتى لغدا ونمشيو
رجعات كتمختر لقات ريحانة لبسات جلابتها واختها عند راسها كتقاد لها الشال وامها وعيالات اخوها بجوجات جنبها
أخت ع.الخالق: حتى لغدا وتمشيو انشاء الله ما كانش قايلها لينا غير بدلي عليك اا حبيبة

لا هي ارتاحت ليهم وهما من هاد الفلاش ولات عدوة ليهم باغيين هما عروسة لي تكون تحت رحمتهم باغيين عروسة لي ماشي أسرارها يكونو مع راجلها لا حتى هما خاص يكونو دارت ليها هاد البلان وعكسات لها فالمشية باش تدير فبالها بلي شي خطة من وراهم راه ما كايناش بلي هما الأولوية عند خوهم ومشات جلسات براحة جنب أمها لي عاد بردات حتى هي
اخته: غير الخدمة اا مي لي عاطياه سيمانة فمراكش كيباركو ليه ونسا ما قالهاش لك قالك جلسي براحتك ماشي ضروري اصلا هاد السفر.. بالحق قلت ليه حشومة غدا وسير انت وعروستك حتى هي تفوج

مرو أيام قليلة والدار خوات عند عائلة ضياء بقاو غير صحاب الدار هبطات راحة منزلة الحوايج من السطح ومشات للكوزينة فين كاينة ضياء ورحيمة محاميين على الغداء وامها جنبهم شادة هارون كتراري بيه
راحة: ماما.. خالتي راضية عارضاني للغداء وباش ما نحشمش قالت ليا جيبي معاك ضياء اختك ونيت حتى هي تونس
فاطمة: لا اا بنيتي نتي راك دبا عروستهم سيري راه راجلك هداك بالحق اا بنيتي ضياء ها هي فدارهم حتى تكمل عدتها وتخرج
راحة كتغبن: وانا نمشي بوحدي
مدات ليها هارون لي كيضحك وهي كتهزهزو: ها نتي دي معاك سيد وزين الرجال وليدي هارون
ضياء: سيري بوحدك اصلا باينة غادي يجي لك معاذ دوزي معاهم النهار عادي راه راجلك اا حنينتي إلى بغا يديك حتى تسكني معاهم راه الاشهار درتيه فاش درتي الحناء مع العقد والهيلالة

مشات مغوبشة طلعو عاونوها غير ف اختيار اش تلبس حتى جا ليها معاذ نزلات ركبات حداه مغوبشة مخلياه طايح على زنافرو أكثر من قبل
جر ليها قنانفها بين صباعه: باغيااني نطيرهم هممم.. فين ضياء؟
حركات راسها: ما غاتمشيش
بصدمة: وعلاااااااش ؟ (فخاطره: اليوم يقتلني جلال)
راحة: قالت لك ماما خاص حتى تكمل عدتها
حرك راسه: الله الله.. حولك مغوبشة نتي.. وراه انا لي خاص نبكي gااع
شافت فيه: وعلاش مالك انت؟
دار خطف بوسة بزربة من فمها وهو مخفض السرعة: ماايل ليا انا اا الكبيدة.. اجي ما نديروش العرس السيمانة جاية

وصل أمام دارهم لي كانت بعيدة بمسافة كبيرة شوية عليهم حيت تحولو هما من الدرب أما كانو قبل جيران هبط وجا حل ليها الباب باقي ما توجهش لباب الدار فرانات المرسيدس دياله عند رجلين معاذ عنده الزهر حلات نسرين الباب هي وزينة وحمزة ملقيين ليها بالحليب والتمر
نسرين بابتسامة: مرحبا مرحبا بعروستنا الغزالة
حمزة: عار الله إلى باقي شي تيتيزة ف العائلة قولهم يخبيوها ليا 
جراتها زينة: بعدو ليا من صاحبتي
ضغيا لقات الهبال بحالها وتحلات تضحك معاهم ولا صوتها حتى هي مسموع معاهم طلعات لقات راضية هي لي باغيا طيب لعروستها بيديها اليوم سلمات عليهم وجلسو مجمعين تقول صافي راه ليها معاهم سنين عايشة

معاذ كيصرط ريقه حصل حصلة الكلاب: فين ضياء ياك قلت ليك دير شي لعبة
معاذ: واا صاحبي راه السيدة مطلقة خالتي فاطمة قالت لك حتى تكمل العدة
ضرب على طموبيلته: اش داهم يعطيوها للكلب النهار الأول
معاذ كيسايس معاه شحال ما شاف هاد الوجه من عمه جلال: هااا انت تكمل العدة نمشيو نخطبوها لك
كيدور فراسه وكيعض على شفته: دري صغير انا؟ البنت مليون واحد كيتسناها تكمل العدة.. بالحق أنا لي عارف اش غادي ندير

ما جا فين يجاوبو معاذ حتى كان طار بطموبيلته مخلي غير الغبرة وراه خلاه تنهد مبتاسم لعمه عمرو ظن أنه غادي يبغي شي نهار ويطيح بحال هاد الطيحة

                💣💣💣💣💣 توقاعتكم وآرائكم 💣💣💣💣💣

اش بغا يدير سيدي جلال