🌹هن القوارير🌹 (في طور التنزيل )

part32

👑👑 هن القوارير 👑👑
شمس الغريب

الجزء 32:

دخلات كتسمعهم كيهضرو عليها وتبسمات كتحمد الله على عائلتها ربي عطاها احسن عائلة واقفة جنبها كتبغيها ما كاين ما احسن منها
شرف لوالديه: ... واش اا با متأكد باغي لها عريس بحال هداك
عبد الله: ما فيها شك ملي هو دار هادشي كله على قبلها راه باين اا ولدي
فاطمة مصممة: وااا ييه بالحق اا سي عبد الله واش نبززو عليها البنت بفمها قالت ليا ما باغيا زواج وانا ما بغيتش نضيع بنتي مرة أخرى
عبد الله: معقووولة إلى ما بغاتش ما كاين تبزاز المرة الأولى حنا لي قنعناها وشوف لاش صبرات على قبلنا ما عمري نسمح ل راسي
طبطب عليه شرف: لواه اا الواليد لواه وهي ما يعجبهاش الحال إلى سمعاتك قلتيها

دارت الحس بحال الى يالاه دخلات وهي باغيا تعرف شكون علاش كانو كيهضرو وعلاش قالو بلي دار على قبلها شحال من حاجة عندها فضول كبير وعندها شك صغير وفضولها أكبر شكون هذا لي دار على قبلها شي حاجة وبلا خبارها وفراس غير كبار عائلتها وغير لي الذبانة ما كدخل لفمهم ما كيهضروش إلى وصيتيهم لحتيها فبير
ضياء حطات الصاشي: السلام عليكم
ردو عليها بابتسامة: وعليكم السلام
فاطمة والتسبيح فيديها: اش داكشي تما ؟ ومحاولة عليه
جبدات كارطونة من داخل الصاشي وحلاتها فيها فطائر منوعة كتشبع منهم العين قبل الكرش وريحتهم عطات فالدار فور ما تحلات الكارطونة ريحة شهية وطيبة
ضياء: ياك قلت لكم اليوم عندي امتحان فالصونطر.. ايوة هادشي لي طيبت لهم اصلا هذا كان هو موضوع الاختبار
شرف هاز حاجب بابتسامة جانبية: ايوة والنقطة
هزات يديها 💪💪: جبت اول نقطة لي شاف قالو ليا الذ فطيرة كلاو فحياتهم.. وواحد قال ليا عطيها اسم وراه باين فيها شي سر خليه يكون سر اطباقك لي كلا شي حاجة من ماكلتك يقول هادي من يد ضياء
شرف: ما نذوقوش
هزاتهم: أنا غادي نديهم يسخنو ونعمر اتاي ونصايب شي حاجة اخرى بالزربة على ما يتجمعو كلهم.. رحيمة ونجاة شوية ويجيو من دار القرآن
فاطمة: حتى نعمة راه تقيدات معاهم
طلات عليها: علاش مال جامع لي حداها؟
شرف: لا على قبل بلال كيدير السوايع مع الدراري معلمتهم مزيانة ومزال مامولف ليها الناس اللهم حتى يوالف مع ولاد خواله وصافي

وجدات طابلة انيقة كما عادتها غير دبا مع القراية زادت تعلمات شحال من حاجة وحاجة حتى دخلو البنات نجاة مركبة هارون ولد رحيمة وهاد الأخيرة جامعة عليها البعالك ولاد نجاة 2 أولاد وبنت وبلال لأنه رحيمة اول ولدة لها ما كتعرفش للتربية صغيرة ولكن الكبار عندها عليهم واحد التأثير كتعرف تلعب معاهم وتشدهم من نقط ضعفهم كيوليو يسمعو ليها داكشي باش كتكلف ديما بالكبار أما نعمة مشات تلاقى لراجلها طيبات عرام ديال الملوي وقسماته على أربعة طرح ليها وطرح لعائلة باها وطرح لنسابها وطرح لراحة مد ليها 2 قسمات والثالثة داها لدارهم ومنها يطل عليهم
كانت عندها حصة ديال الباتيسري لأنها كتعلم كلشي فنون الطبخ ككل حتى دخلات المعلمة ديال الحصة ومعها أحد مدراء الصونطر لقاوهم باديين لأنه التعليمات ديال حلوة اليوم كاينة ف طاولة كل واحد
المعلمة ضربات بيدها: انتباه الله يخليكم.. كلشي يتجمع هنا
انصاعو ل أمرها وقربو من الطاولة ديالها لي متراسة القاعة وخلفها واقفة هي والمدير كيبتاسمو ليهم
المدير: السلام عليكم.. نتمنى تكونو كاملين بخير أولا شكرا ليكم على الانضباط ديالكم دخلت لقيت كلشي خدام مع شغله حسيت بحال الى داخل لشي مطبخ محترف ديال مطعم أو اوطيل فخم.. ثانيا جبت لكم واحد الخبر مفرح.. واحد الجمعية فيها بزاف ديال المنخرطين بغات تنظم يوم خاص بالطبخ للأطفال المتخلى عنهم.. وبما أنه الصونطر ديالنا عنده سمعة طيبة اختارونا باش نقومو بالمهمة..  حنا لبينا الطلب ديالهم وغادي تكون هادي اول خدمة ليكم يعني غادي يكون واحد الخلاص رمزي غاتوفرو هاد الجمعية ليكم
المعلمة: المطلوب منكم هو حلويات بساط ولذاذ كيفكروكم فالطفولة ديالكم شي مذاق باقي ل دبا ففمكم من صنع أمهاتكم ولا جداتكم ولا شي حد عزيز عليكم.. كيف كتعرفو هما مساكن ما يقدروش يجربو داك المذاق الوغ نتوما غادي يكون لكم هاد الشرف.. غايكبرو واحد النهار وغادي يتفكروكم بداك المذاق لي بقا راسخ فلسانهم
المدير: وحتى نتوما عندكم الحق انكم تساعدو إلى كان فاستطاعتكم وعلى قدر المستطاع ثاني التخصصات الأخرى لي عندنا فالصونطر ما غاديش يقدرو يشاركو ولكن غادي تكون البصمة ديالهم لأنهم كل واحد وشنو قتارح.. فرع الخياطة راه دارو مساهمة باش يشريو اثواب ويصايبو لهم ملابس تنكرية مثلا وفرع....

كمل المدير والمعلمة وخرجو خارج القاعة يكملو كلامهم وبقاو هما فالداخل متأثرين وخلاو العمل المطلوب منهم وتجمعو كفريق كل واحد كيقول اقتراح خاص بيه فيقوها ملي طلبو رأيها
ضياء: هااا.. انا بان ليا بلي هذا راه عمل لي حنا بريوسنا عمرنا نقدرو ننساوه.. كل واحد فينا يجلس ويفكر فالحلويات لي خلات له بصمة زوينة فحياته ويختار لي عندها شي قصة زوينة وايجابية وفيها تحفيز
نقز ولد: يعني حلوى تكون معها قصة على قد حلاوة القصة على قد حلاوة الحلوى
ضياء👍: تمااااماا.. ماشي نخليو لهم المذاق صافي نخليو بصمة أمل فقلوبهم
بنت معاهم: نصايبو الحلويات هنا واخا إلى ما جابتش لنا الجمعية بزاف ديال المقادير نديرو حتى حنا صندوق ونساهمو.. شكون متافق
كلشي هز يديه وكملات ضياء: ونخليو واحد القدر ديال لاطة لكل حلوى اختارها كل واحد فينا باش يصايبو معانا ونشاركوهم ديك الفرحة

دارو يديهم كل واحد يد فوق يد كفريق وهزوهم وكل واحد توجه للطابلة دياله كيختار الحلويات لي دوز بيهم طفولته ولي فيهم قصص معبرة وفيها أمل عملية ليست بالسهلة وكلهم كبار وراشدين وعارفين دوك الأطفال اش كيعانيو مساكن وباغيين يفرحوهم لأبعد درجة واتافقو بيناتهم باش لي عارف شي حد يبغي يساهم بشي حاجة يخبرو

              💣💣💣💣💣 توقاعتكم وآرائكم 💣💣💣💣💣

بان ليا هاد الخير فيه الخير