🌹هن القوارير🌹 (في طور التنزيل )

part52

👑👑 هن القوارير 👑👑
شمس الغريب

الجزء 52:

كملات ليلة الحناء لي كان فيها حتى العقد دارته ضياء من ورا ما جات من الحمام وهاهي فدارهم آخر ليلة غادي دوزها معاهم وهي مقبلة على تجربة جديدة اشنو مصيرها فيها هي ما عارفاش كان كلشي غادي مزيان حتى خرجات هاد البنت الغريبة
هادي يمكن المرة 20 باش تيلي ديالها كيصوني بنمرة جلال وهي كتقطع بلا كلل ولا ملل ما قادراش تهضر ما عارفاش اش غادي تقول ولا هو اش غادي يقول

مرت ربع ساعة حتى دخل شرف عندها للبيت لقاها فديك الوضعية ناعسة وعينيها محلولين فالسقف ما فكرش فشي احتمال آخر من غير أنها ما ساخياش وهو أكثر منها ولكن ما بغاش يبان ضعيف قدام أخته
شرف: ضيااااء.. نوضي اا ختي تكلمي لراجلك قبل لا يريب علينا الدار
خرجات عينيها ما توقعاتش انه غادي يجي: واخا
لبسات بانطوفتها وهبطات مع خوها لابسة بيجامة ديالها ديال النعاس بيضاء لايقة بعروسة كان كلشي مجبد الليل هداك وتابعاهم ليلة أخرى غدا عاد تمارة ديال الشقا أما هي غادي تصبح شااااخرة راه هي العروسة

حل الباب شرف بشوية باش ما يفيق حد لقاتو واقف بعيد على الباب جنب طموبيل دياله لابس كيطمة .. باينة النعاس حلف لا زار جفونه وباين بلي هو فقمة عصبيته جنناته ملي كانت كتقطع عليه يعني فايقة وا ما باغياش تجاوب ولي معصبو أكثر انها كترهق راسها بالتفكير بلا ما تقول ليه يفك ليها المنامة ويرتاحو جميع ولكن غير شافها زفر بجهد مخرج أعصابه كاملين وهو كيشوفها كيف الحمامة كيف شي نويويرة ما تقدرش تقطفها وهي عاطية منظر ولا أروع

قرب منهم: خويا شرف بانت ليا حتى هي مستريسيا.. ما غاديش نتعطلو غادي نمشي جنب البحر تشم شوية للهواء نقي ونرجعها
شرف ما عنده حتى حق انه يمنعهم راه مراته شرعا وقانونا: ملي تكون جاي صوني لي نحل لها الباب
جلال: كون هاني
بقات كتشوف فيهم كيفصلو ويخيطو ما حاشاه ليها حد ولكن تكذب إلى قالت ما محتاجاش داك الهواء ديال البحر طاح لها على نقطة ضعفها غير دخل شرف رما يديه وجرها بسرعة من خصرها حتى ولا راسها تحت من ذقنه مخبي وهو مهبط راسه كيقلب على وجهها كيضغط بيديه على خصرها حتى تاوهات

جلال معصب منها: علاش اا ضيااااء؟ هممم علاش؟ منين خرج لينا هاد تقطعي فوجهي ثاني؟ ممم كنا مزيانين اش وقع؟
بداو كتيفاتها كيطلعو ويهبطو ماشي ساهلة عليها تشوف داك الصور وتبقى هادئة جرها عنده أكثر معنقها وغادي بيها لجهتها ركبها بلاصتها وزاد لبلاصته محرك فعلا للبحر لقاوه خاوي من غير الصيادة ولي كاينين فجهة ثانية بعاد على فين واقفين هما كاين غير الظلام وصوت الموج وانفاسهم هما بزوج
جلال تسنى حتى تهدنات: ضيااااء.. قولي ليا الله يرضي عليك.. نتي ترتاحي وانا نرتاح
خرجات سؤال بحال القنبلة وقلبها كله كيرعد: واش كنتي كتبغي شي وحدة قبل
صدماته وأول حاجة دار هي بلوكا البيبان كاملين: هناااااااء
نطق الاسم وكأنه كيتوعد لها بالعذاب أما ضياء غير سمعات كلامه بدات كتنتر فالباب باغيا تهبط جاب الله كان تفكيره سباق غير بدات كتنتر هزها كلها وهي كتخبط جابها عنده ما خلات ما دارت فيه قمشاته نتفاته وهو كيبعد وجهه وحجبانه معقودين لي باغي دبا هو يسيطر على انهيارها فاهمها مزيان باغي غير تهدن يشرح لها ولكن لا حياة لمن تنادي خبشاته كله الزيف طاح لها وشعرها مدلي عليهم
إلى داز شي حد غادي يفهمهم غلط ويدي الذنوب باطل مسكين ما غايقولش راه الحرب نايضة تما