🌹هن القوارير🌹 (في طور التنزيل )

part31

👑👑 هن القوارير 👑👑
شمس الغريب

الجزء 31:

من عند ضياء نمشيو نطلو على العريس الزين فين وصل سي عبد الخالق لي هاد الزواج كان ثالث أسوء خيار دارو فحياته لأنه الأول هو ما سمعش كلام ضياء فالتحاليل والثاني طلق ضياء والثالث هو هذا كيفيق هو وريحانة فنفس الوقت كتحط فالفطور غير لي كاين ما كيدي معاه والو للخدمة حتى كيشري من شي قنت وماشي غير ليه حتى هي خاص يعطيها فلوس باش تاكل فالكلية ما كترجع للدار حتى يدوز من وراها واخا تكون عشية خاوية كتبقى فالبيبليوتيك ولا كتمشي مع صاحبتها للسكن الجامعي تغدا معها وتضربها بنعسة حتى وكان يصوني لها وتخرج يمشيو للدار طيب ليه يا البيض يا الكفتة الدار مرونة بحال الى ساكنين فيها زوافرية كتجمعها حتى ترشق لها

طلع ليه فراسه داكشي وانعاكس حتى على خدمته لي ما بقاتش متقونة كما كانت وتبدل فحالته ضعاف وحوايجه مابقاوش كما كانو كان كيجي للشركة كأنه من اسيادها حوايجو ديما نقاية وريحة الصابون كتشم من وهو جاي وديما مصلوحين حياهم الله حتى ولا شي مرات كيجي بيهم مطبعين مكمشين حالته

ميكانيك معاه: سي عبد الخالق.. المدير بغاك
خرج من تما ورسم ابتسامة على وجهه وأخيرا شي حاجة تفرح لأنه الديبو كمل الفورماسيون دازت بخير وعلى خير المعدات دخلات الأوراق جابهم ليه لي قاله  يعني المدير عيط باش صافي يقاد آخر الإجراءات وغادي يتسلم البوسط الجديد وصل وعطاته الكاتبة الاذن بالدخول وهي مصدومة من حالته كيف ولات واصلا عرفوه عاود تزوج وواخا ما عارفاش قصة زواجه وطلاقه من حالته عرفات بلي ذنوب الأولى خرجو فيه أو هي غير غريزة فالنساء اتجاه بعضهم حتى وحدة ما تبغي راجلها يجيب عليها الضرة ولا يطلقها ومباشرة يجيب الثانية

المدير غير شافو وقف بابتسامة مقجوجة سلم عليه: تفضل اا سي عبد الخالق جلس
جلس وهو غا يطير بالفرحة: شكرا اا سي آيت عسو
جا تقابل معاه المدير دياله: سي عبد الخالق كنا هضرنا فموضوع الديبو جديد
حرك ليه راسه فرحان وديك الضحكة بدات كتنقص بشوية بشوية مع كل كلمة كينطقها المدير كيزيد يخرجو عينيه: شوف اا سي عبد الخالق فوق مني ومنك فهاد الوزين كاين بزاف لي يطيروني ويطيروك واحد منهم جا حتى للبارح وجاب البادجي والوراق ديال واحد الولد من عائلته مهندس ميكانيك وراه حطو تما وملي هضر السيد لي اقتارحتك عليه وحتى هو من الريوس الكبار رجعو لهاد الأيام الأخيرة لقاو بلي خدمتك تدهورت وبدا كيقلب غير على الحاجات الخايبين ونسا شحال من حاجة مزيانة درتيها معنا وهذا ما كان سمح لي ما لقيت ليك جهد

خرج من داك المكتب محطم أكثر من كيما دخل شريط حياته داز قدام عينيه وبقا مركز غير ف الفترة لي كانت معاه حياته كانت ميسرة وكان كيشيط ليه ف الشهر جهد لي دار شحال من حاجة كمل خلاص الدار وشرا الطموبيل وكان كيبقا ليه مبلغ مالي كبير كل شهر ملي تزوج بريحانة إلى شاطت ليه 500 درهم ما يقولها حد لحد صدق الكلام المغربي لي كيقولك كاين المرأة لي دخل على الراجل بالخير والرزق وكاين لي غير تدخل يتكشط
الأيام كدوز وراحة ضاع لها العام معلوم لأنها دوزاته من
ن العرس لشهر العسل لي تسارات فيه المغرب هي ومعاذ وباش ما تولفش الجلسة فالدار دخلات لواحد السونطر متنوع الاختصاصات كدير اللغة مع مجال ثاني اختارت اللغات لي بغات ولي اصلا عندها باز فيهم باش تمشى مزيان وبالموازاة معاه دارت الفصالة هاد الصونطر كان جديد وضياء هي الأولى تقيدات فيه قيدها حكم وهي لقات فيه داكشي لي بغات وما كرهاتش دير جميع التخصصات استقرت أخيرا على 2 تخصصات زائد اللغة لي ختارت الامازيغية الفرنسية والإنجليزية والتخصصات دارت الأول ديكور داخلي والثاني الطبخ والدريساج باها سلم لها الطموبيل لأنه الصونطر جا فوسط المدينة كتمشي وشي مرات تدوز على اختها إلى ما كانش معاذ وكترجعها ثاني وهي فرحانة بحياتها جديدة

كانت كما كل مساء راجعة للدار لمحها فالطموبيل بقا غير كيشوف ويصرط ريقه وهي ما شافتوش نهائيا رادة البال لا تزدح الطموبيل فالدخلة ديال الدرب لي شافها يلقي عليها السلام تبدلات ولات حالتها احسن رجعات ل شبابها السابق لي كيشوفها دبا كيقارنها براسها ملي كانت فالسن لي تزوجات فيه نفس الحماس نفس الرقة والأخلاق نفس الاجتهاد والمثابرة

هي غاديا وهو باقي موراها طريقه هاديك أو كاينين دخلات آخرين غير فضوله لي مخليه باغي هاد الطريق وقفات قدام دارهم وهبطات هو بلعاني نقص السرعة كانت لابسة كسيوة فالاسود تحت الركبة قطنية ما بايناش حيت فوقها مونطو طويل سخيخن ما هو أزرق ما هو أخضر وبوط طويل فالاسود شال مزركش غالب عليه لون المونطو وكاشكول على عنقها جرات صاكها ومحفظة كأنها امرأة أعمال حلات الباب جبدات منه صاشي وهي كتحاول عليه يمكن مدخلة معها شي حاجة للدار سدات الطموبيل ودخلات ما شافت لا هاه ولا هاه

غير سدات باب دارهم فاق هو من القلبة لقا ريحانة مضاربة مع الباب لي مسدود وكتغوت له فوجهه وجهها أحمر غاتفرقع
ريحانة: ...ملي مزال باغيها علاش جايبني انا.. واش أنا ما حيلتي ل عائلتك لي واكلين ليا رزق أولادي ولا ليك انت لي باقي كتشوف هادي كتحوال
ع.الخالق دار ليها مغوبش: هاديك لي كتقولي عليها هادي راا... 
قاطعاته: واااياااك اا عبد الخالق واا يااك تكمل وتقول شي حاجة لي ندمك عليها غادي نديرو بوز لهاد الموضوع هنا غير حيت ما باغياش تريكتك تشفا فيا.. دبا سير لداركم بالحق والله ثم والله لا زدتي شي حاجة على هاد الديسير
شاف فيها مبلق فينك اا ضياء لي كانت هي تفكرو لا ينسى شي حاجة وتزيد تطيب فالدار شهيوات مزال: واش حماقيتي راه نوبتي فالتقضية
حيدات الصمطة باش تهضر: مزيان تبارك الله الله علاش نوبتك بالسلامة مالنا حنا ساكنين معاهم كنجيو ضياف وكل مرة ندخلو حاجة فوقاش تدير ل ولادك شي حاجة ولا باغين نجيبوهم للقهرة ديك الدار بعدا راه خاص تبدل قبل لا نولد راه صغيرة.. وزايدون انا ما باغياش نبقى فالدار لي قاداتها هي على ذوقها نعيش فيها انا مالي مصخوطة

          💣💣💣💣💣 توقاعتكم وآرائكم 💣💣💣💣💣

اا ربي منين كطفى هادي شعلات شعلة وحدة