🌹هن القوارير🌹 (في طور التنزيل )

part118

👑👑 هن القوارير 👑👑
شمس الغريب

الجزء 118:

فاقت مفزوعة بلاصتها كتسترجع ذكريات الليلة الماضية فلاش 🔙🔙

غير قالها ديك نوريك الاحتجاز كيف داير حسات بالخطر وزاد أكثر وأكثر ملي بدا كيقرب تسلتات منه وهربات لقنت البيت جنب المكتب ووقفات هازة الاباجورة
عايدة: انت واقيلة ولفتي المصفرطات لي ما عندهم لا ملة ولا دين.. وانا ماشي منهم
نوح صرط ريقه وزاد قرب منها بخطى ثابتة حتى تقابل معها بيناتهم المكتب حط يديه عليه وشاف فيها بنظرات ثاقبة
نوح: أنا من ديما عمري قارنتك بشي وحدة.. سواء عندها ملة ودين ولا ما عندهاش
حسات انه جبهتها تقصفات: أنا كانو عندي تصرفات صبيانية وديال مراهقة.. وخسرت فيهم بزاف.. الناس لي قراب ليا وكانو سند ليا ماشي غير انت
نوح حرك راسه بتفهم وضرب على قلبه بجهد: بلا ما تشرحي أكثر حيت هاد ***** ديما كان يلقا ليك الأعذار واخا بعد بقا كيدافع عليك دائما

🔙🔙 عودة

كان هذا هو الحوار لي كان قصير ولكن فيه معاني كثيرة واعترافات تحت السطور تبسمات من قلبها حيت عمرو نساها ولا بغا غيرها طول هاد المدة تنهدات يالاه جات تهبط التنهيدة تفكرات داداها.. وقفات وسط السرير كعادتها فاش تزبلها وناضت كتجري للباب ببيجامتها مخربقة وشعرها أكثر من بيجامتها هبطات كدردك فالدروج ما حدها كتقرب وهي كتسمع صوت الضحك والكلام حتى دخلات عليهم بديك الحالة
هزو راسهم فيها بثلاثة نوح وأمه وداداها طارت بديك الحالة عليها كتعنق وتبوس والأخرى أكثر منها كلها شوق لكبدتها هي لي رباتها واخا ما قدراتش تزرع فيها داكشي لي بغات وواخا بزاف ديال الأخطاء دارتهم إلا وكتبقى بنتها عايدة لي واخا تغلط وما يسامحها حتى واحد هي غادي تسامحها

عايدة: توحشتك اا دادا بزاااف.. وتوحشت بابا و و (بقات مترددة) عمااااد وكلشي توحشت كلشي لي فالدار
دادا عنقاتها هي الاخرى: حتى هما توحشوك وكيسلمو عليك واحد واحد.. وعندي ليك خباار زينة
حلات عايدة عينيها وودنيها وحالتها مخلية الكل كيشوفو فيها بابتسامة: شنووو؟
دادا: نهيلة رجعات اا بنيتي الغزالة ورجعات تلاقات مع عماد
نوح فرح من أعماق أعماق قلبه: هي شي عراسية قريبة انشاء الله
دادا: بحول الله اا ولدي اا نوح.. عقبال تتفك من هاد العقرب ونفرحو بك على الأصول
تبت عينيه عليها هي لي ما تفاجأتش بالخبر: انشاء الله
الكل فرحان فدار راضية بقدوم مولودة جديدة تشرف عائلة الادريسي وعائلة جابر خدمو الموسيقى وجلسو على الشطيح إلا هي لي حالفين عليها كلهم أما جلال خلاص بالكشايف باش خلاها اصلا تمشي على قبل الدروج ولكن أصرت أنها تحضر معاهم
فاطمة لراضية: والله الى دازت عشية غزالة اا ختي راضية عقبال زينة انشاء الله نفرحو بيها وتشوفي وليدات معاذ وحمزة انشاء الله حتى هما ونسرين تخاوي وليدها
ما تهنات فاطمة حتى خلات كلشي مزنg بقات ليها غير زهور هي لي باقي باغيا دردك على نغمات الشعبي المغربي