🌹هن القوارير🌹 (في طور التنزيل )

part26

👑👑 هن القوارير 👑👑
شمس الغريب

الجزء 26

نزلو العروسة بالصلاة والسلام وهي قادات زيفها ولا على بالها بالفضيحة لي ناضت على برا واقفة هي وخواتاتها جنب راحة باش تطمان لانها خوفانة حيت عاد هبطات بداو يصليو الزيانات على النبي والنقاشة بدات ليها برجليها على ما يجيو عائلة العريس بهداياهم عائلتها كلشي ناقش وفرحان ها الخالات ها العمات ها عيالات العمام والخوال ها ولادهم وبناتهم النشاط لعلك ترضى حتى دخل حكم شافتو رحيمة وطارت لعنده يا ختي راه العرس هادي والزين غير مشير
قربات ليه باس يديها من داخل وبرا ندمات علاش جات: جيتي غزالة غير شدي الأرض شوية الله يرضي عليك عارفة دمي سخون.. نسيتيني حتى علاش جيت ااه شوفي قولي الواليدة والعائلة يخرجو يستقبلو عائلة العريس

دقائق وتستفو برا ضياء ونعمة وشي بنات العائلة هازين المراش عامرين بريحة خفيفة وزكية كيرشو عليهم والنسا الكبار كيستقبلوهم بعبارات الترحيب الجميلة وهما كيردو عليهم جايبين فيديهم تكبيرة ل راحة ومعاذ مكستر هاز فيديه بوكيه كبير ديال الورود
داخلين بالصلاة والسلام على الحبيب زين الخلق والدقايقية محيحين مخليين الناس كيطالو ولي فشي درب آخر جا يشوف منهم صابرين لي خلات عرس خوها وجات تشوف وقفو شحال كيشطحو ويردحو عائلة العريس خاشيينو الوسط والدقايقة كيغنيو عليه

هزات عينيها صدفة لقات عينيه مفيكسيين عليها غير هي هبطات راسها شوية ضارت كتهضر مع نعمة باش تلف
نعمة: ويل الشيطان مال وجهك تلون
بدات كتصوط عليها: مالي
نعمة: مامالكش غير بحالا صابغينك بالاحمر.. ياكما سمعتي شي حد قال شي حاجة؟
بانت ليها غاتصعر: لا لا غير صهدت
جات عندها نجاة: ضياء اجي معايا وقفي على السربايا يهزو الحلوى من البيت الفوق
رحيمة جات: أنا نمشي نعطي ل حكم 20 بلاطو للرجال راه جالسين فدار خالتي هنية
نعمة: و 20 كافية شيطو شي وحدين يبقاو لدار خالتي هنية مسكينة عطاتنا الدار
رحيمة: راه الرجال يكفاوهم 12 قولي وهاد الدقايقية يعطيوهم 2 ولي بقا ليها

فينما دور تلقا عينيه معها ولاو لاصقين فيها فينما تهز راسها تلقاه مقابلها عقلها بغا يخرجو لها وهي كيف النحلة بداك القفطان وملي بغاو يبداو يسربيو الغداء لبسات قفيطين مورد وكاتصخر من هنا لهنا حتى تغداو الناس عاد علموهم بلي من ورا الغدا تقريبا غادي يجي العدول جمعو الدنيا ثاني ولبسات هاد المرة فراشة خفيفة وزوينة وتجمعو على راحة لي بدلات قفطان الحنة الأخضر بقفيطين جوهرة ابيض والسلهام مغطيين ليها بيه راسها فتنات معاذ ملي شافها هابطة وجلال من وراه كتبان ليه غير هي بوحدها من دون لي معها ما كرهش كون كانت هادي عرسو وهي زافينها له عروسة ما فاق غير على تزغريتة زينة لي جاتو فودنيه نيشان جرها من قرفادتها حتى صرطات كمالت التزغريتة عاد طلقها
العقد تدار وجا من وراه عياء كثير كل وحدة فيهم شادة قنت فالبيت أما الدار راه مزال عامرة سمعو الدقان فالباب وناضت نعمة كضهسس حلات ولقات شرف لي دق وبعد تحسبا لا تحل رحيمة الباب واخا زوجة خوه ولكن الاحترام رغم أنه كيحسبها أخته

نعمة: شرااااف مااالك
شرف كيشوف فيها بمعنى من نيتك: اييه جبنا الطيابات ووجدو الفطور بالحق راه باقيين الناس هبطو شوية بانو حتى تخوا الدنيا وشركو الليل مع النهار نتوما.. عرفناكم عييتو بالحق غير صبرو معنا مزال شوية
زاد وخلاها فالباب دخلات وسداتو قلبات عينيها بانت ليها راحة ناعسة فبلاصتها مكروازية هي وضياء الرجلين ونجاة كانت مكروازياهم هي وياها فناموسية ضياء أما رحيمة كانت مفرشة فالارض منعسة حداها ولدها لي فايق كيلعب برجليه وكيغاغي كلاتو بوسان وبدلات ليه لاكوش عاد بدات كتفيق فيهم

ضياء كتحل عينيها وتسدهم بسباب الضوء: الله صافي غير خلي راحة ناعسة عيات بالتبدال وبكات البارح حتى طابو عينيها وضرها راسها
رحيمة كتفوه وضحك مع ولدها: اااا أي اا راسي بان ليا هارون نصيفطو ل مي تشدو ليا يااك اا نجاة
باقي بلاصتها كتلعب برجليها لي عياو: هبلتي الولد باقي صغير عيطي عليها ولا على اختك يشدوه ليك ملي يبكي رضعيه باغيا تنفريه منك باقي صغير
نعمة: عندها الحق.. انا نهبط لتحت نعطيوهم صوابهم حتى تهبطو
نجاة: أنا نطلع نيشان للطيابات على حسب الغداء

ملي كيكون التفاهم بين صحاب الدار واخا تريب ليهم دار وتقولهم عاودوها يعاودوها ويصايبوها لك احسن من الأولى كيكون الراي والشوار والتفاهم والقلب صافي من الغدر من ديما هما هاك لي ما دارتهاش هادي تكملها الأخرى بلا ما تقولها خليتيها ولا بلعاني ما كاينش الحسابات وحبهم لبعضياتهم صافي ما فيه غش

هبطات ضياء من بعدما جمعات الدار الفوقانية كاملة وسيقات لي طواليط ولات ريحة النقا كضرب دوك لي لتحت هبطات سلمات عليهم لابسة مزيان ما مخلياش ليهم فين يشفقو عليها ولا تبقى فيهم دازت لديك الدار حتى هي كطرف فيها من غير الصالون لي فيه الضياف لي باقين
جارة1: ايوة الحمد لله اا لالة فاطمة لي تهنات من ديك العائلة
جارة2: عند بالهم ملي دارو العرس البارح راه غاضوكم
عمة ضياء: الحمد لله لي تهنات منهم بنت خويا شهوة وبنت عائلة ما شايطاش علينا
خالتها عايشة برا: أنا إلى جات عليا تكمل بنت اختي قرايتها ونطلعها عندي تكمل تما مالو اش عطاها هاد عيفة الرجال حتى عائلتها ما كانت تشبع منهم

           💣💣💣💣💣 توقاعتكم وآرائكم 💣💣💣💣💣

الله الله اشمن حل تختاري يا ضياء