🌹هن القوارير🌹 (في طور التنزيل )

part23

👑👑 هن القوارير 👑👑
شمس الغريب

الجزء 23:

داز السبوع كله حيوح والعائلة مزال مجموعة غير القراب ما تفرتكو حتى مر أسبوع من ورا السبوع عاد خوات الدار بالمرة وغير غمض عينك حلها ها هما يرجعو ثاني لضريب الصداق ديال راحة لي مقابلينها بلي ماسك والوصفات ها التبييض ها التقشير ها تطويل الشعر ها اللمعان وكلهم كيطليو معها حتى ولاو كل وحدة تنسيك فالاخرى هما اصلا زوينات وكملو زينهم

راحة شافت فرحيمة لي كتقيس حوايجها قبل ما تحمل: ها نتي راه نقصتي أكثر من الاول
نعمة: ولكن هاد لا طاي جاتك تهبل
تحركات قدامهم: دبا نوليو فعقد راحة بحال الفراشات
سمعو بكاء تربية وتكلمات ضياء: وااا سيري رضعي ليا سيدي هارون سيري
نجاة: نسيبك هداك ولدي شي بنوتة مزيونة بحالك خليه يحارب على قبلها

هكا كانو كيدوزو أيامهم شقا وعناية بالجسم والشعر لي يشوفهم يقول هادو ما عليهم حالة توجاد للعرس وهما راه هاه وهاه كلشي مقاد ومزيان وكذلك عائلة العريس كيجريو ويجاريو والهدف واحد يطلعو مناسبة هاد الثنائي أكثر من واعرة

نزلات عندهم بحال الرعدة كتشالي بالتيليفون خلعاتهم نجاة لي من السبوع وهي مع نسابها سدات دارها كما كل مرة كتكون شي مناسبة اصلا البيت ديالها باقي عندها معاهم فالدار
نجاة: اا مالكي هابطة طافجة
راحة كتشير لتيليفون: صونا عليا معاذ
رحيمة كيعمرو فبريوات اللوز: ايوة راه ديما كيصوني ليك
راحة: واا لا قال ليا خاص نمشيو باش نختارو الخواتم ديال الخطوبة
طلقوها بثلاثة نجاة ورحيمة وضياء كيصليو على النبي ثلاثة المرات وكل مرة تزغرت وحدة حتى خرجات لالة فاطمة قالوها لها وجلسو شادين فيها عاد مشات معها ضياء تختار اش تلبس حيت تلفات ما كتخرجش معاه الراس فالراس اول مرة شي مرات كيصيفط أخته ومرات خوه زعما باش تخرج تقضى هي وياهم وهي كتجر معها نجاة ولا نعمة حتى كيبعث معاهم ولكن هاد المرة راه غير هي وياه

لبسات وتقادات كسيوة ف الأبيض موردة وعندها صميطة تحت الصدر بالاحمر دموي فداك اللون لبسات شالها وصنيديلة وحتى الصاك لي كان صغير يالاه هاز لها التيلي وشي براكة ديال الفلوس باش ما تخرجش طويلة حتى بغات تخرج وهزات غلوص باللون الأحمر الفاتح دوزاته على شفايفها باش ما يبقاوش ناشفين أما وجهها بقات بيه طبيعي وضارت قدام ضياء

ضياء: ما شاء الله عليك ربي يحفظك اا حبيبتي (قربات بايساها)
راحة: ها هو كيصوني انا نمشي
هابطة فالدروج وضياء من وراها وهي كتبرح: بقاو كلكم اونلاين غادي نصور لكم باش تختارو معايا قولوها لنعمة حتى هي باش تكونيكطا
خرجات للباب بانت ليها البي أم واقفة قدام الباب وهو متكي على الباب لي من جهتها بدجين مع تي شورت رمادي مطرطق عليه سبرديلة فنفس اللون فرجليه لي مكروازيهم نظارات شمسية سوداء على عينيه والساعة الرياضية فيديه هو حاط عينيه عليها غير هي لي جات كيف شي حورية أما هي عينيها على البنات لي كيطلو من أي ثقبة وريوgهم سايلين

بلا ما تحس قربات منه وحطات يديها بجوج على يديه لي كيشير ليها بيهم للساعة زعما تعطلتي ولكن صدماته بديك الحركة البسيطة منها وسرعان ما عاق بلي الغيرة كتخلي حواء دير شي تصرفات لا إرادية وباش حتى هو يزيد يعزها ضور يديه علي خصرها حل الباب وقبل لا تطلع باس جبينها عاد سد الباب ودار للجهة الثانية مبتاسم برجولة

حرك الروايد من تما غادي بشوية عليه كيلبي ليها رغبتها لي ما باحتش ليه بها باغيا كلشي يشوفها ويتأكد بلي هي ولات ليه والسلام وحتى هو عايق بها غادي بشوية عكس فاش كيكون دايز بوحدو كيخلي غير لاطراس ديال روايضو غير خرجو للشارع الكبير وغير بعد شوية باركا سيارته جنب الطريق ودار ليها

أصبح وجهها بحال مطيشة ما قدراتش تشوف فيه حتى دور ليها راسها بشوية بيديه وهزو حتى قابلو معاه مصغر عينيه فشفايفها خلاها دخلات فبعضياتها بقا ذقنها فكف يديه وصبعه الابهم كيدوز على شفايفها بطريقة خلاتهم بجوج يغادرو هاد العالم العالم ثاني جديد عليهم بجوج حتى عقد حواجبه معاذ

مسح صبعه فكلينيكس: واش أنا ما حدي كنمسح فيه وهو كيزيد يولي أحمر
ضربات الطم ما ظناتش يعيق بها وهو كمل: نتي اصلا فمك أحمر لاش درتي هاد الوسخ ليه همممم (كينقر عاقد حواجبه وهي فاهية فعصبيته) المرة الماجية انا لي عارف كيفاش غادي نحيدو لك
طرطقات عينيها فاهمة مزيان مغزى كلامه: هممم انا راه كانو شفايفي ناشفين واصلا هو راه غير بحال الماء درتو غير باش يرطبهم
معاذ غمزها مديماري: هاديك الساعة نتي غير اامري انا نفزgهم للحبيبة ديالي

لبداتها ما بقاتش هضرات بالمرة عاد عاود قاطع سكوتهم هو: ايوة الأميرة ديالي اش بغات دير من بعد الباك؟
ربعات يديها بحال شي بريهيشة كتحلم ليه تما: امممم بغيت نقرا اللغات بغيت نكون كنعرف بزااااف ديال اللغات ماشي بالضرورة نخدم ولكن انا بغيت نتعلمهم اصلا عندي لا باز فبزاف الاسبانية والإنجليزية وحتى التركية
كيحرك راسه باهتمام: كاينة واحد المدرسة قريبة من الدار ديالنا لي غانسكنو فيها خاصة باللغات نكمل شي شغال هاد السيمانة ونديك نقيدك
طارت ليه على يديه معنقاها فرحانة من نهار قالها بلي ما تحلم بحتى شي حد بلي هو لي غايتزوجها وهي حتى هي شرطت عليه تكمل تعليمها وها هو وفا بالوعد دياله لها

وصلو عند الذهايبي من بعد ما عاودات فطرات هي وياه ومن بعد ما فقصات الذهايبي اما معاذ قابل على حماقها وحمقات حتى خواتاتها وعيالات خوتها وزينة ونسرين عاد اختارت هي الخاتم واختارت حتى ديال معاذ وحلفات حتى يتنقشو عليهم أسماءهم عاد خرجات ليه من تما

             💣💣💣💣💣 توقاعتكم وآرائكم 💣💣💣💣💣

اااح على المقبلات ديال الحب فالقصة