🌹هن القوارير🌹 (في طور التنزيل )

part133

👑👑 هن القوارير 👑👑
شمس الغريب

الجزء 133

حلاقمو خرجو معها ولا بغات تفهم هي متشبعة بفكرة لي بالنسبة ليه هو لا أساس لها من الصحة هي كتقول بلي هي منحوسة غير فرحات هي براسها نكداتها على عائلات على قدهم وهو كيحاول يدخل ليها لراسها بلي هداك قدر الله وكان مكتب عليهم سواء دارو هما نهارهم أو لا ولكن شكون بغا يفهمو هو والو
حازمة راسها بزيف حياتي ومدوراه بالحامض وعبد العالي جالس حداها باغيها ترجع لعقلها أما فاطمة عيات كل مرة طالعة لعندها هي ولا وحدة من البنات غير يخرجو هما وتبدأ تفكر بكلامهم وكلامه وبلي هادشي قضاء وقدر كتدخل اختها تسممها بلي هادي غير الخطبة والعقد واش طرا وبلي هذا ماشي فال مزيان

دخلات رحيمة عاقدة حواجبها: واا عيقتي اا خيتي زهور.. وا هبطي دبا تفاهمي مع راجلك راهو لتحت
خرجات زهور عينيها أما عبد العالي طار فرحان لتحت خلى رحيمة مبتاسمة على حاله وفرحانة لفرحته وعاود قلبات عينيها لزهور مغوبشة لانها عيقات
زهور كضرب ففخاضها: اويلي على عتيق خويا ومي باقين هنا واصلا طالع ليهم الدم من هاد الزواج وقالك نمشي نطلق
رحيمة خرجات عينيها وسدات الباب ودخلات: واش حماقيتي واش كتفكري فدوك الخزعبلات لي كيقولو ليك هما.. احاااي سمحي ليا واخا عائلتك ولكن واحد اختك راه غير حاسداك.. وخوك ما نهضروش عليه لي قالها هووك مسرحة اش بغا واحد بحال هداك بزهور كون غير شاف وحدة فبناته أما خالتي فاطنة قالت ليك هي شكون يصبن ليها ويقابلها.. يعني كل واحد رافض على الغاية لي فنفسه.. والله كون انا منك يا حتى نوض نمشي معاه دبا نيت ياك العقد وكاين ايوة السلام عليكم.. وزايدون راك كبيرة ماشي سوقهم فيك.. شوفي غير ولدك وفرحته مسكين

خرجات رحيمة من البيت ووقفات أمامه كتسناها تهضم كلامها باش تهبط هي وياها حالفة يا حتى تخليها تهبط تقابله وتخليهم نيت يتفقصو.. عتيق غير بانت ليه هابطة بديك الحالة لي على راسها وقف مامسوق لحد استقبلها عند الدروج كيقلب فراسها واش طالعة لها السخانة
فاطمة: ربي اا ولدي لما شوف هاد الحمقة.. راحة تقبلات لي وقع وكتسول عليها حيت عارفة توسويسها أما ضياء خلاص
عتيق محمر فيها: دبا مالك على هاد الحالة.. فالعوض ما تواسيها وتمشي تزوريها ولا تواسي غير عائلتها زايداهم همك حتى انت وماشي حتى لشي سبب للتفاهات.. ها حنا درنا العقد اش من دخل عنده فلي وقع على هاد الحسب حتى انا نبعد من جلال ومن سي محمد وعائلته وهما بحال عائلتي حيت بسبب العقد ديالي طرا هادشي
حركات راسها بالنفي كلشي كيقول لها نفس الهضرة إلا عائلتها فكرات فيها رياضيا واش العشرات ديال الناس لي أغلب ولا ثلاثة

عتيق حرك ليها راسه: يالاه زيدي معايا
أمها، خوها واختها خرجو عينيهم فين غادي يديها ووقف خوها بحال العصبة كيشوف مخنزر ما ناويش على خير
وقف خوها مخنزر ومغوبش حالته حالة: لفين اا سي عتيق؟ راه زربتي علينا بما فيه الكفاية من خطبة لعقد.. ودبا بغيت نشوفها صدقتي باغي تديها انت gاع
قبل لا يخرج عتيق شي كلمة يصعقه بيها لأنه ماشي شخص لي يحشم ولا يهبط الراس تدخل شرف لي قدر يقرأ أجوبة تخلي الطايح أكثر من النايض
شرف: خالي راه مراتو.. وعادي إلى كان بغا يخرج هو وياها شوية ويرجعها
خلاه يفهم بلي راه غادي يرجعها ولكن هيهات: اا سي شرف الله يهديك اشمن يخرج هو وياها راه الليل هذا اشمن خروج بقا فهاد الوقت
حكم كان أقصى من شرف بالحق ارحم من أنه يتكلم عتيق: ااا الخال راه حتى إلى بغات تمشي معاه من ديك الوقت لي تدار العقد راه يمشيو وتجي وقت ما بغات راه مراتو هاديك دخلها لراسك