🌹هن القوارير🌹 (في طور التنزيل )

part103

👑👑 هن القوارير 👑👑
شمس الغريب

الجزء 103:

عايشين الحياة هما لي مهنيين يمكن وما عندهم لي يصدعهم رجعات للبوتيك ديالها لقات الروينة وقفات عليهم تصدمو مع طارت ما سمات ما عرفوها ميتة ولا حية أما ملي مشات للمصبنة لقاتهم مدوزين عليها الدكاكة عيني عينك وقفات لهم حسكة وقررت أنها دير مصبنة عصرية وجرات على كلشي بسبب الإهمال والشفرة هي فالاصل انسانة معطاءة ولكن تشفريها ما تقبلش خوات المصبنة وعيطات للناس جاو لحوايجهم وبدات من جديد   

بقا غير عامل واحد فالمصبنة هو لي حصلات عليه الصدق: اا ختي نهيلة والله الى الدنيا هانية انا راه نقلب على خدمة أخرى
نهيلة شادة التيلي كتصوني وواقفة بحال شي زوفري: واا جلس اا صاحبي فين تمشي.. انا واخا ندير مصبنة عصرية ونجيب لي يوقف على الماطيرييال غاتكون انت هو الشاف على باباهم كاملين.. واخا نعرف نخلص لك فورماسيون على حسابي
هضرات مع الناس لي فمدة وجيزة وقف عليها واحد منهم دخلاته للمحل باش يشوف الإصلاحات لي خاص والفلوس لي غايتخسرو وحتى هي كتجابد معاه على رزقها باينة فيها الحرفة حتى اتافقو على ثمن مناسب ليهم بجوج عطاته التسبيق والسوارت لداك لي خدام معها انه يوقف عليهم ويعيط عليها إلى وقعات شي حاجة

كان واقف بعيد كيشوف فيها ويضحك حتى قشعاتو وجات لعنده طلعات سلمات عليه وهو كيشوف فهاد الزوفري لي طاح فحبها بحال الأعمى
نهيلة هبطات المراية كتجمع شعرها: مالنا ما نخافوش؟
عماد ضحك بجهد: لا لا الصراحة وليت كنخاف نيت.. ما عارف راسي واش معايا نهيلة ولا عشيرها (غمز لها جهة المصبنة) تفك المشكل؟
نهيلة بحماس كتعاود ليه على المصبنة لي غا تولي عندها قريبا وهو كيسمع باهتمام عاد ديمارا فاتجاه مقهى يتغداو

يالاه دارو الدوموند على الغدا وجالسين كيتكلمو ويتناقشو حتى وقف عليهم واحد بابتسامة عريضة شاف فيها وهبط عنقها مخليها مطرطقة عينيها فعماد لي تقيسو ينفاجر وهي مزال ما استوعبت اش كيدور حواليها
الشخص: نووووهااااايلة توحشتاااااك بزااااف
ما عرفش علاش حاس بهاد الفضول كله دخل للغرفة وهو ما قادرش يتسنى أكثر يالاه جا بغا يحل الباب يخرج تحل من برا ودخل آدم
آدم الفلالي (الطبيب وفنفس الوقت زوج رقية اخته): كنتي هارب اا ولدي.. بالحق تشديتي ياك لباس؟
خليفة تراجع: لا والو كنت باغي نسولك على شي حاجة بدافع الفضول.. بالحق انت كلشي كتوصلو لرقية وهي كتفهم كما بغات وكتجي تفهم عليا
ادم بنكران: أنا أعوذ بالله اا صاحبي.. عيب عليك تقول هاد الهضرة
خليفة: عيب عليك هو انت.. مالي ما كنعرفكش واصلا هي مشوهة بعدا ضغيا كتفضح
آدم: واا غير تيق فيا اا صاحبي
خليفة: ماشي شي حاجة.. البنت لي كنت شاك فيها باقي شاك فيها.. علاش مبدلة الاسم واش زينب ولا زينة

ادم تكا على الكرسي براحة: راه انت خوفتي عباد الله.. عوض ما يجيبو ليك الملف ديال زينة الادريسي جابو لك ملف ديال زينب الادريسي واحد البنت هي وياها عندهم نفس النسب سبحان الله والاسم كاين تشابه
ضرب على البيرو الحمد لله باقي عنده العقل: واا كنت غادي نحماق
ادم كيحرك راسه: لا اا صاحبي انا راه غير بغيت نخليك تأكد على خاطرك أما ديك البنت راه مستحيل اا صاحبي ما يمكنش.. راه خوها عميد ممتاز معاذ الادريسي
خليفة: لا لا ما كنعرفوش
ادم: سول ماجدة راه كتعرفو مزيان.. قالو ليا سلختي ليا ولادي 
خليفة شاف فيه بنظرة كون كانت قرطاس كون غربلاته: واش هادوك أولاد.. انا بغيت غير نفهم خواتاتي علاش كيتوحمو
ادم: انت ما عندكش الخاطر اا صاحبي.. ودبا نشوفو أولادك غير بلاتي