🌹هن القوارير🌹 (في طور التنزيل )

part19

👑👑 هن القوارير 👑👑
شمس الغريب

الجزء 19:

صرطات نعمة ريقها وجراتها عنقاتها: وعلاش اا الحبيبة ديالي البكاء واش أنا ماشي اختك لي نحافظ على سرك هممم واش أنا حمقة نمشي نقول لهم الحاجة لي ما بغاتش اختي تقولها 
شرف: اش قلتي ليهم
نعمة طرطقات عينيها: زدت شعلت فيهم العافية وخليتهم يتيقو راسهم
حكم عنقها من جهة الاخرى: باش عزيزة عليا نتي دمك سخون بحالي فرحيني ها العار
نعمة طلع ليها الgراد: اييوة دزت من زنقتهم بلعاني وخرجات عندي ربيعة سولاتني على ضياء وغير بانو ليا عند الباب كيتصنطو ملي سمعو صوتي طلقت عليهم جميع انواع السلوgيات لي كنعرف استخدمت حقي فالكذوب اليوم يا ربي تسمح ليا

جلسو كلهم باغيين يسمعو اش قالت لهم حيت حلفات للوخرينات لا قالت شي حاجة غير إلى ما جات ضياء وخوتها أما راحة منين كتجيب الأخبار الله اعلم عندها الجواسيس ديالها ما كتخرجش من الدار والخبارات ديال الدروبة كاملين عندها

نعمة: قلت لها يا ختي شدينا محامي كبير ل اختي ومعروف وبلي غادي تاخد حقوقها كاملين منه سواء بالخاطر ولا بزز وبلي غادي يندم لا هو ولا عائلته مزيان.. اجي ياه راني gاعما هضرت بزاف واصلا ما كدبت فحتى حاجة غير هما غادي يفهمو هادشي بالطريقة لي بغيت انا (غمزاتهم) ماشي لي قصدت
حكم: العز العززز دبا هما غادي يربطو هادشي بالفلوس نيشان
راحة: وا غير دخلات هي للدار شوية حتى جا الرويجل هز خوه وقالت ليا واحد البنت حداهم سمعاتهم كيهضرو على شي محامي باغيين يمشيو قبل لا سبقت ليه ضياء

طلقوها بضحكة كلشي غادي كما باغيين هما هاد الساعة وريحة البسطيلة كتعطعط فالدار دخلات ضياء للصالة يالاه فرشات الزربية حتى دخلات أمها
فاطمة بابتسامة وجهها منور: صلي اا بنتي صلي باش ترتاحي وطلبي ربي يوقف معك
قربات منها ضياء: ديما كنديرها اا ميمتي واصلا راني ما باقيش فيا الحال اا مي عليه غير كوني هانية ملي عرفت كل واحد على حقيقته مزيان هو براسه مزال ما عارفش راسه بلي غدار وما فيهش الأمان مع الوقت غادي يعرف راسه بلي هو لي كان ما مزيانش ماشي انا.. انا طبقت أوامر ربي سبحانه كزوجة صالحة هو يشوف واش دارهم ولا لا
فاطمة عنقاتها: الله يكملك بعقلك اا كبيدتي دبا ربي يجيب ليك احسن منه هذا غير امتحان دزتي منه رضاي بيه 
عنقاتها: راضية به اا ميمتي غير ارتاحي من جهتي والله وما باغيا حد انا بغيت غير نبقا معاكم (ابتسمت) وشوفيها من جهة اجابية غادي نوقف اول مرة فحياتي فزيادة شي حد من خوتي ونوقف مع خواتاتي فعرس راحة ونوقف معاكم وما يبقاش بالي ديما هنا ملي كان يحبسني عليكم كنبقى نتخايل اش كديرو داكشي كان

هي ما هياش هنا هي وعائلتها وهما غادي يحماقو ويهبلو فدارهم تاجة جالسة جنب السداري غير نصف جلسة بناتها الكبارات كل وحدة شادة سارية صابرين غادية جايا دوخاتهم أما عيالات خوتهم كل وحدة شادة الصغير فولادها حايزاه ليها وكيشوفو فيهم باهم ما عاجبوش هادشي لي كيديرو وبقوة الاحراج لي دارو ليه بدل جامع وولا يدخل للدار بكري باش ما يسمعش شي هضرة لي تأثر عليه وخوته الدراري مناوبين كل مرة يطل عليه واحد واش رجع وجيران كيتسناو معهم باغيين يعرفو المستجدات

دخل كيصوط لاح الكونطاكط فقنت والملف فقنت اخر: هوووووووف
وقفات تاجة: يااكما سبقاتك للمحامي ؟
معصب هضرة نعمة باقي كتعاود ليه: بزااااااف عليها بزااف ما يقدوش عليه غالي بزاف
أخته زيرات على يديه: وانت شديتيه ياك قوول هااا اللهم تعطيه لي بغا ولا تقسم معك كلشي هي اللهم فيه
كيغزز سنانه: أنا كون جاتني للخاطر كنت باغي نكتب ليها كلشي ما يصحابش ليا ولات طماعة أما دبا والله لا خرجات حتى فورشيطة.. ياك حوايجها هزاتهم والسلام
تاجة عاد رجعات فيها الروح: الله الله على راحة ايوة سيري يا بنت فاطمة باغيا المخير فالمحاميين ها هو عندنا باينة مشاو لداك لي كيجيهم
طبطب ليه خوه على كتفه: كون هاني انا نهضر مع العالمي يدوي معه راه صاحبه
اكتفى أنه يحرك ليه راسه وناض هز سوارته: أنا غادي للدار

خرج غير كيصوط زاد بطموبيلته داز من حدا دارهم وجيران كيخزرو فيه ريحة البسطيلة عاطية فبابهم وضحكهم مسموع برا حيت الباب محلول ولادهم كيلعبو فالزنقة ما علا بالهمش بيهم هما لي كيتكرددو غير بوحدهم هاد شي غير ما زاد فقصو ومخليه يتصرف بلا عقل عفط عفطة وحدة حتى للدار دياله غير شافوه جيران كحلو بالعمى

هبط من الطموبيل يالاه خطا الخطوة الأولى تسمع فوق راسو تشاااااخ والقشور ديال الخضرة فوق راسه هز راسه ما بان ليه حتى شي حد فشي شرجم كانت وحدة من جارات لي عرفات بلي وقع وشحال كانو كيتسناو فهاد اللقطة يديروها ليه وهي لي نالت الشرف ساس داك شي من على راسه ودخل لقا الباب ديال الدار فينما كان شي زبل محطوط شكون حطه الله اعلم تنهد وجمع داكشي وملي دخل تصدم بالكواغط ديال بيمويات والفانيد داخلين حتى للدار كانو أفعال دوك الأطفال لي مشات لهم ضياء لي رغم أنه ما كيخليهاش تخرج إلا أنها كل مرة طيب شي حاجة زوينة بكثرة الملل وتسناهم ملي يجيو من المدرسة كتعطيهم عاد كتقريهم فالواتساب بلا خبارو حتى هما انتاقمو منه ملي فهمو بلي هو السبب

دخل للدار الروايح لي مولف يلقا فيها كيريحوه والو ما كاينينش طيابها حت هو عمرو باقي ياكلو حوايجها طارو ما سماو دخل للبيت لي فيه تيفي بغا يهز تيليكوموند حتى بان ليه الخاتم ديالها ديال الزواج مخلياه ليه تما هنا ضربات ليه فراسه بلي خارجة معولة على الطلاق اصلا شدو وجلس كيلعب به بين يديه باقي ساهي صونا ليه التيلي ضحك باستهزاء باغي يفهم واش هادشي كيدار ليه بلعاني ولا شنو

               💣💣💣💣💣 توقاعتكم وآرائكم 💣💣💣💣💣

عبرو عليك
شكون صونا عليه