🌹هن القوارير🌹 (في طور التنزيل )

part28

👑👑 هن القوارير 👑👑
شمس الغريب

الجزء 28:

ما وقف ديك الطموبيل حتى لقدام الشركة لي خدام فيها شرف صونا ليه وخرج الآخر عنده مستغرب تسالمو وطلعو للطموبيل ديال جلال

شرف: ياك لباس اا خويا جلال؟!!
جلال ما عارف اصلا كيفاش وصل هنا وكيفاش غايبدا: شوف اا صاحبي غادي نجيك نيشان انا جاي طالب راغب فيد اختك عارف باقي ف العدة انا غير درتها لك فبالك باش إلى جا شي حد قبل مني عاوني الله يخليك راه عمري ظنيت نعمر راسي بالزواج
شرف بقا كيشوف فيه كيفاش كيطلب ويرغب فاخته قرأ الحب والعشق لي كاين فعيون جلال لي كيلمعو وكيتسنى فيه يهضر شرف براسه عمرو توقع انه جلال بجلالة قدره غادي يبغي يتزوج ولا الله يخليكم غادي يعشق شي وحدة
شرف: احمم صدمتيني
قاطعه: أنا براسي مصدوم شوف راه ربي مكتبها ليا انا لي عارف علاش وما غادي نقولها لحد من غيرها نهار تولي على سميتي بالحق بغيت الموضوع يبقى بيناتنا بلا ما تقولها للدار ديالكم باش ما يظنوش فيا شي حاجة خايبة بلي شفت فبنتهم وهي فعدتها ولا شي حاجة بالحق كوفري عليا ما تخلي حد يديها الله يخليك اا شرف..
يالاه غادي يبدا وقاطعه: صاافي اا صاحبي اصلا ما نلقاوش ل اختي شي حد احسن منك اا جلال خاص غير هي تبغي
بهمس قاتل: علاه هي لخاطرها

مشا مهني من هاد الناحية صافي كلف شرف بهاد المهمة وارتاح نوعا ما قصد داره لي جات فالخرجة ديال المدينة ما هي فيلا ما هي فيرما شي حاجة روعة خصوصا وأنه تصميمها دياله على طول الطريق من البوابة لي جات على الشارع حتى للدار لي توسطات الأرض كاين على اليمين واليسار أشجار مثمرة مختلفة ها الزيتون ها التفاح، الحامض، المشمش وحويضات فيهم نعناع، ربيع، مطيشة وفلفلة حارة أما فالخلف ديال الدار لي فيها بيسين من اللور وبيت ممزوج بالخشب والزجاج كيبان من البعيد اسطبل وشي بقيرات تما ومنزل كبير متماشي مع الفيلا ديال السيد لي مقابل ليه

دخل لهاد الدار لي كيرتاح فيها لأنه عنده بيت آخر وسط المدينة ولكن كيجي فغالب الأحيان هنا دخل رما السوارت بلاصتهم لي على الباب وطلع نيشان للبيت دياله الكبير لي بالعود الرفيع وعصري بامتياز دخل نيشان للدوش وخرج لابس سروال كيطمة وعريان من الفوق تلاح فسريره وجر التيلي دياله جبد الصورة ديالها بقا كيشوف فيها ويتامل حتى غفا وصورتها بين عينيه
كان عنده الحق كل يوم تقريبا من 2 ديال الناس فما فوق كانو كيجيو عند لالة فاطمة يرميو ليها المعنى على ضياء وهي كتجاوب بما قل ودل البنت بقا ف العدة ديالها وحنا ملتزمين بدينا الحمد لله تكمل عدتها ويدير الله خير كل يوم ناس يعرفوهم وناس منعتين ليهم وهما على داك الحال وملي يشوفو ضياء يقولو خلاص منها نخلاقو وهي الزنقة ما كتخرجش لها إلا للضرورة وكتسنى حتى يكون واحد من خوتها حتى جيران ما شافوهاش من عقد راحة تقريبا

على حالهم بقاو حتى بقات لعرس راحة شي ثلاثة الأيام فقط العائلة ثاني مجموعة عندهم فالدار صيفطات لها أمها المرسول باش تكلم لها فبيت والديها عرفات الموضوع اش غايكون ومشات على استحياء لابسة بيجامة طويلة حيت الدنيا مخلطة دقات ودخلات لقات غير أمها لي كاينة جابدة قفيطناتها جداد
فاطمة: اجي اا بنيتي عزلي معايا لي نبقا نلبس هاد الايام
قربات ضياء عارفاها باغيا غير ترخيها بهاد التصرف: هادو كلهم زوينين وجداد اا ماما
جلسو بجوجات كيعزلو فيهم عاد نطقات امها: بنيتي راه سيمانة هادي باش كملتي العدة ديالك يااك؟
حركات لها راسها ضياء باه حشمانة
فاطمة طبطبات عليها: راني غير ميمتك اا بنيتي وراك شفتي الخطاب عليك إلى عجبك شي حد من لي تقدمو ليك غير قوليها ليا وانا نتكلم مع باك عاد هو راه هضرو معاه شي وحدين فجامع
حركات راسها بالرفض خايفة لا دير شي خطوة مرة أخرى اصلا هي ما بغاتش تزوج كتسنى غير الفرصة باش طلب أنها تكمل قرايتها غير يكمل فرح اختها وتقولها لهم

ضياء: لا اا ماما مزال ما مستعداش نعاود نتزوج
سدات الموضوع فاطمة ملي بانت لها بنتها تزيرات وحلفو اصلا هما لا باقي بززو عليها شي حاجة: على راحتك اا كبيدتي
تدق الباب وطل شرف: ضياء يالاه تجيبي حوايجك من عند الخياطة
فاطمة: كملاتهم ليها ايوة هنية عليك بقيتي نتي اللخرة بالحق نتي لي غا تجي فنة فيهم اا كبيدتي غير كوني هانية

ضحكات معها  مشات خلاتها تنزل لعند الناس ثاني وهي مشات لبسات جلابة أما حوايجها ضياقو عليها ولات كتلبسهم كيفصلوها حيت عمرولها جناب جلابتها وصنيديلة مع بوشيط ديالها قادات زيفها ونزلات لقات شرف راكب مع شي حد فالطموبيل صغرات عينيها وهي تصعق يالاه بغات ترجع عيط عليها

                💣💣💣💣💣 توقاعتكم وآرائكم 💣💣💣💣💣

فين غاديا فيناوا غااااديا