لحمها تشوك عليها بضربة و عنيها دازو عليهم بضبابة لمدة عاد تسرح لها شوف ...خرجات عنيها فالياقوت لي نسات ان هادي ناسيها هي و اصلها و أنها ماشي هاجر لي وخا يوقع بيناتكم لي وقع كتبقى بيناتهم و تا حاجة ما كتوصل لعصام ..ضنات و ضن ما يربح مولاه ..هاجر العافية شعلات فوجها و دمعة قربات تهبط ليها ...
هاجر: انا ااش درت لييك كاع باش تضربيني نتي لي جايا هاجمة عليا .....
الياقوت بغات تعاود تصليها معاها مانعة راسها بزز: سمعي ابنت ناس شغادي نقولك نهار لأول انا لي زوجتك بولدي ساعة ما نتي من سهمو ما هو من سهمك باركة عطيتيه داك الوليد الله يجعل الباركة جمعي قشك و درقي عليا زلافتك دااابااا ....
هاجر مخرجة عنيها و قلبها رجع كيضرب بجهد بلأعصاب: سيري تزبلي هداك راجلي ونهار حليت عيني حليتها عليه وهو باغيني من لفوق ولا معجبك حال عطيني تيقار كما عاطياها ليك انا ياك ما هضرتك ما قربت ليك شباغى عندي....
الياقوت : مزال عندك لسان لي تهضري بيه بلا حشمة نسيتي ما دوزتي عليه الكلبة....
هاجر هزات صوتها : الكلبة هي نتي و بزاف عليك توصليني شوفي نتي لي جاية تنبحي عليا هنا ...
جرات الياقوت بغات دفعها من هاجر وهي تنتر يديها وخا كبرات مزال بصحيحتها و نوضتها خايبة لي جا في فمها تقولو مضرب ليه حساب وهي معصبة...
الياقوت: ما تشديني ما نشدك عيييت ما نسكت و نخبي فقلبي وفي خر يامي تقولي كلبة ....
هاجر تخلعات جاتها نوضة ديال الياقوت بحال نوضة ديال حليمة تخبات ورا أسماء: نتي لي قلتيها لي الأولى انا ما قلت ليك والو ....
أسماء : ماما لعني شيطان شوفي البنت كيف كترعد حشمي شوي راكي نتي مولات لعقل ....
الياقوت: ماااشي صووقي تكون مريضة ولا صغيرة انا لي كنعرف درت غلط و زوجتها لولدي وليوم نصلح الغلط ما هي من سهمنا ما حنا من سهمها ....
هاجر دموع فعنيها كتنخصص : وعلاش كتقولي ليا انا هاد الهضرة سيري قوليها لولدك هو لي شادني معاه مالك كتصحابيني شايطة تا انا عندي والديا يهزو بيا فوق راسهم....
الياقوت طارت عليها شداتها من شعرها و جراتها عندها باغية تفرصها ..و أسماء كتغوت مخلوعة اما هاجر رجليها كضرها وغير جبداتها الياقوت فقدات توازن ديالها طاحت في الأرض على رجليها المهرسة غوتات بحر جهدها مقصحة كتبكي بجهد و تنفسها قلال بالقلب لي كيضرب بجهد في قفصها الصدري...شعرها بين يدين الياقوت لي طار ليها العقل و كتنتف هاجر من نيتها تا كتخلي شعر بين صباعها ....
تتبع
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
