جالسة فجليسة ديال سطح مسرحة رجليها و حليمة حداها كتمسدهم ليها و زاينة هي و سومية جالسين فلأرض كيتعاودو ..حتا هزات سومية راسها لعند هاجر...
سومية : شفت داك راجل عندك من نهار رسلك ما عمرو سول فيك ولا تاصل يدير غير صواب بعدا ...
هاجر من نيتها قالت: ما عرفتش هو قال ليا مشغول بالخدمة ....
زاينة : اوا لاا اختي تا لهادي مجاتش نتي كتر من شهر هنا و زيد مريضة حالتك حالة وما يسول فيك تا مرة مجاتش وكاع نتيقو الخدمة... اوا شهر كامل ما سالة تا نهار ولا ساعة يهضر معاك فيها ....
هاجر بقات غير كدور فعنيها ما عرفات باش تجاوب وهادشي مكانش دايز كاع فبالها تا زرعوه ليها بحال سم...هزات عنيها فحليمة لي قالت ....
حليمة : اودي رجال ما فيهم تيقة ها جارتنا مسكينة شحال وهي صابرة مع راجلها وخا هو لي عاكر خدات هي لومة من ناسها و صبرات على كلشي وفلخر حصلاتو كيخونها من وجهاتو قال ليها انا كنبغيها وغادي نتزوج بيها حيت هي والدة وانا باغي لولاد اما نتي فات فيك الفوت حيت مشات منها العادة شهرية مسكينة وها هو طلقها وغدا ايمشي يخطب ديك البنت و قبيلة جات عرضات عليا ختو بوجها حمر قلت ليها بنتي مريضة منقدرش نخليها بوحدها ....
سومية : راه تيقي تا تيقي تال دوك لي كيكونو كبار فسن و لباس عليهم تلقايهم شابعين فبلاصة خرا ....
هاجر خرجات عنيها بصدمة : ولكن هو ماشي هكدا هو قالي غير يسالي و يرجع ...
حليمة : وتيقتيه البقرة انا بغيت نعرف غير فين مشات بنتي لي كانت كتفهمها فسما غير تزوجتي بهدا طارت ليك كاع الفهمات و غير بقاي ناعسة هنا تسنايه يجي عندك لمكانش أصلا تزوج بشي كحلوشة تم عطاهم سيدي ربي غير كيتلوطو ....
هاجر ولات كيف صمكة وصطهم واحد يرسلها لواحد دخلو ليها شك بزز منها ..خلاوها غير كترمش بحال لعميا : ولكن هو رسل معايا حاتم و سمير وداير ايتبعني تا هو ...
زاينة : نكونو حقانيني سي عصام هادشي ماشي من سهمو ولكن هاد الفعلة لي دار ما يبغيها تا حد كفاش راسل معاك راجل ما هو خوك ما خالك ما كيجيك تا حاجة يرد ليك لبال لكبيرة و صغيرة وهو بقا حاضي شغلو ما مسوقش ليك ولا كلف نفسو تا يسول فيك ... ما عرفناك مزوجة بيه ولا بهاد سمير ....
سومية : وكاع نحيدو هادشي و نقولو الخدمة لي مزيراه اوا وديك مو و ختو علاش ميجيوش يشوفوك ياك وصلتي تال لموت وهانتي بعنيك شفتي من نهار جيتي عمر شي واحد من طاسيلتو عيط عليك ولا سول فيك ....
حليمة حطات يد على يد مصغرة عنيها : ما تكدبيش عليا ابنيتي و جيني صراحة وخا نكون واعرة راني مك و انا لي نفهمك واش قال ليك شي حاجة من رسلك عطاك شي وراق ولا جبد معاك حس طلاق ونتي كيف البهلة ما ديتي ما جبتي فهضرتو ....
تتبع
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
