هاجر بتوتر : دخلتو لواحد لمدرسة هنا كيقراو فيها دراري صغار القرأن و رسلتو هو يحفظ معاهم ويتعلم اللغة العربية...
عصام خرج عينو وحل فمو ضرباتو لداخل فصميم لدرجة ما عرف ما يقول من غير الصمت و الدهشة واضحة على ملامحو ...سمعات خوها ايوب كيعيط عليها بحكم هو لي كيدي حاتم لمدرسة كل نهار..جرات حاتم عندها مدات ليه لكتوبة وكتقاد ليه فحوايجو و كتوصيه...
هاجر: ما دابزش مع دراري وسمع كلام المعلم ديالك وقرا مزيان عشية اتعاود تعرض عليا داكشي لي قريتيه ولا ملقيتكش حافض غادي نتفاهم معاك مزيان تفاهمنا ومتنساش من دخل لحمام توضى كيف علمتك عاد صلي معاهم صافي...
حاتم حرك راسو و البلدي وتاه جا كيحمق بزين : صافي اماما عشية انعرض عليك كلشي و نصلي بيك بحال معلم ديالنا باش تعرفيني تعلمت ..
بتسمات ليه وهزات بينوار طويل لبساتو وزيف غطات بيه شعرها ..دارت مشاية فرجليها وخرجات عند ايوب لي كيتسناهم فطونوبيل دخلات عندو حاتم و وصاتو يحضيه تا يدخل عاد يكمل طريقو لقهوى....
بقات واقفة تا غابت طونوبيل من بالها عاد دخلات ..بالحشمة مقدراتش دخل عند عصام لي صدمة ديال داكشي لي داز قدامو مزال لاعبة عليه ...نطقات حدا دروج بصوت ضعيف...
هاجر: عصام طلع تفطر...
كملات طريقها لفوق كتسوط بحالي طالعة فشي جبل و كتنفش بجهد فيها سخفة وفشلانة...
دخلات لكوزينة جمعات طبلة لي كانت حطا فيها فطور لولدها غسلات كلشي وبدات كتوجد فالفطور .. وتشكل وتقاد ومن كتلف تهز تليفون تقلب شنو ناقصها وترجع تصاوب..و الحاجة لي فيها زوينة كتقاد الحاجة بصمت ما كتقولش عيت ولا كتمل .... كتوجد وتحط فطبة لي حداها تا دخلات عليها زاينة هازة ولدها فيديها جلسات فكرسي كتراري بولدها وكضحك....
زاينة : تبارك الله عليك الالة هادشي لديد عندك ممولفاش ليك تفيقي مع صباح.."غمزاتها".. ولا قولي راجل كاين ...
هاجر مشافتش جيهتها حاضية شغلها وقالت : علاش شكون كيفيق قبلكم تفطر ولدها وترسلو لجامع وتصاوب ليكم لفطور عاد ترجع تنعس كتفيقو كتلقاو كلشي واجد ليكم بحال الملكات ولا تا هدي نسيتوها....
